అవును మన తెలుగు సినీ హీరోలలో చాలా మందికి ఫైన్స్ పడ్డాయి. ఆ ఫైన్స్ వేసింది మరెవరో కాదు ట్రాఫిక్ డిపార్టమెంట్ వారు. ప్రస్తుతం హైదరాబాద్ పోలీసులు ట్రాఫిక్ నిబంధనలపై దృష్టి పెట్టారు. రూల్స్ పాటించని వారు ప్రముఖులైనా వదలటం లేదు. ఈ నేఫధ్యంలో ట్రాఫిక్ రూల్స్ పాటించకుండా భాద్యత రాహిత్యంగా వాహనాల్లో వెళ్లిన టాలీవుడ్ సినీ ప్రముఖుల జాబితాని హైదరాబాద్ పోలీసులు వెల్లడించారు.
ట్రాఫిక్ రూల్స్ ఉల్లంఘించిన వారిలో మహేష్ బాబు ముందు వరుసలో ఉన్నట్లు పోలీసులు పేర్కొన్నారు. మహేష్ బాబు గత మూడేళ్ళ కాలంలో 7 సార్లు ట్రాఫిక్ రూల్స్ బ్రేక్ చేసినట్లు చెప్తున్నారు. ఈ మూడేళ్ళ కాలంలో మహేష్ బాబుకు చెందిన ఏపీ 09 సిఎం 4005 నెంబరు కారుపై 8,745 రూపాయలు జరిమానా నమోదైంది. కానీ మహేష్ బాబు ఇంతవరకు జరిమానా చెల్లించలేదు.
అలాగే చలానాలు చెల్లించని వారి జాబితాలో పవన్ కళ్యాణ్, బాలకృష్ణ పేర్లు కూడా ఉన్నాయి. పవన్ కళ్యాణ్ కు చెందిన కారు నంబరు ఏపీ 09 సీజీ 7778 పై మూడుసార్లు చలానా విధించబడింది. ఈ మేరకు పవన్ ట్రాఫిక్ చలానా కింద రూ.505 బకాయి పడ్డట్లు తెలుస్తోంది. పవన్ కళ్యాణ్ కు మాదాపూర్, బంజారా హిల్స్ పోలీసులు ఈ చలానా విధించారు. ఇక నందమూరి బాలకృష్ణ పై రాజేంద్రనగర్ లో ఫైన్ విధించబడింది.
బాలయ్య అతివేగంతో ప్రయాణించిన కారణంగా 1,035 రూపాయలు జరిమానా విధించారు. వీరితో పాటు హీరో నితిన్ పై కూడా జరిమానా నమోదై ఉంది. అల్వాల్ ఏరియాలో నితిన్ ట్రాఫిక్ రూల్స్ ని బ్రేక్ చేసినందుకు గాను రూ 1,035 జరిమానాని పోలీసులు విధించారు.
వీరందరితో పాటు కమెడియన్, హీరో సునీల్ మాదాపూర్, ఔటర్ రింగ్ రోడ్డులో అతివేగంతో వాహనాన్ని నడిపిన కారణంగా ఇప్పటివరకు జరిమానా రూపంలో రూ 4,540 బకాయి పడ్డట్లు తెలుస్తోంది. పోలీసులు ఈ వివరాలతో సదరు హీరోలని మరోమారు హెచ్చరిస్తూ….చలానాలు చెల్లించాలని ఆదేశించారు.