విజయనగరం జిల్లా వైఎస్సార్ కాంగ్రెస్ పార్టీ మాజీ ప్రెసిడెంట్, జెడ్పీ చైర్మన్ మజ్జి శ్రీనివాసరావు తన అనుచర గణంతో కలిసి తెలుగుదేశం పార్టీ లోకి ఎంట్రీ ఇచ్చిన తర్వాత జిల్లా రాజకీయ చిత్రం పూర్తిగా మారిపోయింది. వైసీపీని ఖాళీ చేసి టీడీపీని బలోపేతం చేస్తున్నారనే హడావుడి పైకి కనిపిస్తున్నప్పటికీ, క్షేత్రస్థాయిలో మాత్రం సరికొత్త అంతర్గత కుమ్ములాటలు మరియు తీవ్ర అసంతృప్తి తెరపైకి వస్తున్నాయి. తాజా సమాచారం ప్రకారం.. జిల్లాలోని ప్రధాన టీడీపీ కార్యాలయాలు ఇప్పుడు పాత తమ్ముళ్లతో కాకుండా, నిన్నటి వరకు వైఎస్సార్‌సీపీలో చక్రం తిప్పిన మాజీ నేతలు, కిందిస్థాయి క్యాడర్‌తో నిండిపోతున్నాయి.
ఇది కాస్తా దశాబ్దాలుగా పార్టీని నమ్ముకున్న పాత తెలుగుదేశం కార్యకర్తలకు మింగుడుపడటం లేదు. గత ఐదేళ్ల వైఎస్సార్ కాంగ్రెస్ పార్టీ పాలనలో జిల్లాలో తెలుగుదేశం పార్టీ కార్యకర్తలు, ద్వితీయ శ్రేణి నాయకులు ఎన్ని రకాల వేధింపులకు గురయ్యారో అందరికీ తెలిసిందే. కేసులు, పోలీస్ స్టేషన్ల చుట్టూ తిరగడం, వ్యాపారాలు దెబ్బతినడం వంటి అనేక ఇబ్బందులను స్థానిక పాత టీడీపీ క్యాడర్ భరించింది. అయితే, ఇప్పుడు చిన్న శ్రీను రాకతో అప్పట్లో తమను ఇబ్బంది పెట్టిన, వేధించిన సదరు వైసీపీ నేతలే నేరుగా పచ్చ జెండా కప్పుకుని వచ్చి, టీడీపీ ఆఫీసుల్లో కూర్చుని పెత్తనం చెలాయిస్తుండటంపై తీవ్ర విమర్శలు వ్యక్తమవుతున్నాయి.
నాడు పార్టీ కోసం రక్తం చిందించిన తమను పక్కన పెట్టి, అధికారం మారగానే పక్క పార్టీ నుంచి వచ్చిన వలస బాపతు నేతలకు అగ్రతాంబూలం ఇవ్వడం ఏంటని పాత తమ్ముళ్లు బహిరంగంగానే ప్రశ్నిస్తున్నారు. చిన్న శ్రీనుకు విజయనగరం జిల్లా టీడీపీ పగ్గాలు అప్పగించేందుకు అధిష్టానం సన్నాహాలు చేస్తోందనే ప్రచారం ఈ అసంతృప్తికి మరింత నెయ్యి పోసినట్లయింది. ఒకవేళ అదే జరిగితే జిల్లాలో పాత టీడీపీ క్యాడర్ ఉనికి ప్రశ్నార్థకంగా మారుతుందని, వలస నేతల కింద తాము పనిచేయలేమని కొందరు సీనియర్లు లోలోపల మదనపడుతున్నారు. వలసల వల్ల పార్టీ బలపడుతోందా లేదా పాత బలం దెబ్బతింటోందా అనే అయోమయం నెలకొంది. ఈ అంతర్గత అసంతృప్తిని మరియు పార్టీ కార్యాలయాల్లో మారుతున్న పెత్తనాన్ని చంద్రబాబు నాయుడు, నారా లోకేష్‌లు ఎలా సర్దుబాటు చేస్తారు..? పాత కార్యకర్తలకు ఎలాంటి భరోసా ఇస్తారు..? అనేది ఇప్పుడు విజయనగరం జిల్లా రాజకీయాల్లో బిగ్గెస్ట్ సస్పెన్స్‌గా మారింది.