ఆంధ్రప్రదేశ్‌లో అత్యంత కీలకమైన విజయవాడలో మున్సిపల్ కార్పొరేషన్ ఎన్నికలు సమీపిస్తున్న వేళ మేయర్ అభ్యర్థిత్వంపై సరికొత్త చర్చ మొదలైంది. విజయవాడ అంటేనే కమ్మ, కాపు సామాజిక వర్గాల రాజకీయ ఆధిపత్య పోరుకు కేరాఫ్ అడ్రస్. అయితే ఈసారి మున్సిపల్ ఎన్నికల్లో మేయర్‌ను నేరుగా ఓటర్లే ఎన్నుకునే విధానం ఉండబోతుండటంతో.. రాజకీయ సమీకరణాలు పూర్తిగా తారుమారవుతున్నాయి. సాంప్రదాయ ఓట్లను పక్కన పెట్టి, నగరంలో అధిక సంఖ్యలో ఉన్న వెనుకబడిన తరగతుల ఓటర్లను ఆకట్టుకునేందుకు కూటమి అధిష్టానం సిద్ధమవుతోందనే టాక్ గట్టిగా వినిపిస్తోంది.
సాధారణంగా విజయవాడలో కమ్మ, కాపు నేతలు మేయర్ పీఠాన్ని ఆశిస్తుంటారు. అయితే ఒక వర్గానికి మేయర్ సీటు ఇస్తే మరో వర్గం అసంతృప్తికి గురై, అది డైరెక్ట్ ఎన్నికల్లో ఓటమికి దారితీస్తుందనే భయం కూటమిని వెంటాడుతోంది. పైగా, నగరంలో బీసీ ఓటు బ్యాంక్ అత్యంత నిర్ణయాత్మకంగా ఉంటుంది. ఈ ఓటు బ్యాంక్‌ను గురిపెట్టడానికి కమ్మ, కాపు అగ్రవర్ణాలను పక్కన పెట్టి, క్లీన్ ఇమేజ్ ఉన్న బీసీ లీడర్‌ను మేయర్ అభ్యర్థిగా బరిలోకి దింపితే తిరుగుండదని చంద్రబాబు, పవన్ కళ్యాణ్ భావిస్తున్నట్లు సమాచారం.
ఒకవేళ కూటమి అధిష్టానం విజయవాడ మేయర్ స్థానాన్ని బీసీలకే కేటాయిస్తే.. తెలుగుదేశం, జనసేన పార్టీల నుండి పోటీ చేయడానికి ప్రధానంగా ఎర్రబోతు రమణారావు పేరు గట్టిగా వినిపిస్తోంది. విజయవాడ మున్సిపల్ కార్పొరేషన్‌లో గతంలో టీడీపీ ఫ్లోర్ లీడర్‌గా పనిచేసిన ఈయనకు నగర రాజకీయాలపై పూర్తి అవగాహన ఉంది. బీసీ సామాజిక వర్గానికి చెందిన సీనియర్ లీడర్ కావడంతో ఈయన పేరు గట్టిగా పరిశీలనలో ఉంది. మరోవైపు యాదవ సామాజిక వర్గానికి చెందిన కాకు మల్లికార్జున యాదవ్ కూడా మేయర్ టికెట్ కోసం పార్టీ పెద్దల వద్ద గట్టిగానే లాబీయింగ్ చేసుకుంటున్నారు.
యువతలో మంచి పట్టు ఉండటం ఈయనకు కలిసివచ్చే అంశం. బీసీ కార్డు చర్చ నడుస్తున్నప్పటికీ, టీడీపీలోని అగ్రవర్ణ సీనియర్ నేతలు కూడా తమ ప్రయత్నాలు ఆపడం లేదు. ఎంపీ కేశినేని చిన్ని ఆశీస్సులతో టీడీపీ అధికార ప్రతినిధి కొమ్మారెడ్డి పట్టాభిరామ్, అలాగే మాజీ ఎమ్మెల్యే బొండా ఉమామహేశ్వరరావు కుమారుడు బొండా సిద్ధార్థ్ కూడా మేయర్ రేసులో ముందంజలో ఉన్నారు. మరోవైపు గద్దె అనూరాధ, దేవినేని అపర్ణ లాంటి మహిళా నేతలు కూడా లైన్‌లో ఉన్నారు.
మరోవైపు జనసేన కూడా విజయవాడలో మేయర్ సీటును తమకే కేటాయించాలని కూటమిపై ఒత్తిడి తెస్తోంది. ఒకవేళ జనసేనకు కేటాయిస్తే, వంగవీటి రాధా సోదరి వంగవీటి ఆశా పేరు కూడా ఇక్కడ ప్రచారంలో ఉంది. అన్ని వర్గాల ఆశావహుల హడావుడి ఎలా ఉన్నా, వైసీపీ మైండ్ గేమ్‌ను తిప్పికొట్టేందుకు, నగరంలోని అత్యధిక బీసీ ఓటర్లను కూటమి వైపు తిప్పుకునేందుకు చంద్రబాబు “బీసీ మేయర్” అస్త్రానికే మొగ్గు చూపే అవకాశాలు ఎక్కువగా కనిపిస్తున్నాయి. ఈ వ్యూహం గనుక నిజమైతే బెజవాడ అగ్రవర్ణ రాజకీయాల్లో ఒక పెద్ద కుదుపు రావడం ఖాయం.