ఉత్తరాంధ్ర రాజకీయాల్లో తెలుగుదేశం పార్టీ అధిష్టానం తీసుకున్న తాజా నిర్ణయంపై ఇప్పుడు ఇంటా బయటా తీవ్ర చర్చ నడుస్తోంది. ఉమ్మడి విజయనగరం జిల్లా పరిషత్ మాజీ చైర్మన్ మజ్జి శ్రీనివాసరావును అరకు పార్లమెంట్ అబ్జర్వర్‌గా నియమించడం వెనుక అసలు రంగులు మెల్లమెల్లగా బయటపడుతున్నాయి. పైకి ఇది కీలక పదవిలా కనిపిస్తున్నప్పటికీ.. తెరవెనుక మాత్రం చిన్న శ్రీనును పూర్తిగా ఆర్థికంగా దెబ్బతీసేందుకు, రాబోయే లోకల్ ఎన్నికల భారాన్ని ఆయన నెత్తిన రుద్దేందుకే టీడీపీ ఈ స్కెచ్ వేసిందనే విమర్శలు స్వంత పార్టీలోనే గట్టిగా వినిపిస్తున్నాయి.
భౌగోళికంగా ఎంతో కఠినమైన, సుదీర్ఘమైన అరకు పార్లమెంట్ పరిధిలోకి ఏకంగా ఏడు అసెంబ్లీ నియోజకవర్గాలు వస్తాయి. ఇందులో పార్వతీపురం మన్యం జిల్లాలోని పాలకొండ, కురుపాం, పార్వతీపురం, సాలూరుతో పాటు.. అల్లూరి సీతారామరాజు జిల్లాలోని అరకు లోయ, పాడేరు, రంపచోడవరం ఉన్నాయి. రాబోయే స్థానిక సంస్థల ఎన్నికల నేపథ్యంలో.. ఈ ఏడు సెగ్మెంట్లలో పార్టీని నడిపించడం, అభ్యర్థులను ఖరారు చేయడం అత్యంత ఖర్చుతో కూడుకున్న వ్యవహారం.
మైదాన ప్రాంతాల్లో సురక్షితంగా ఉన్న కూటమి బలాన్ని పక్కనపెట్టి, చిన్న శ్రీనును ఈ కఠినమైన ఏజెన్సీ బాధ్యతల్లోకి నెట్టడం అంటే.. అక్కడి ఎన్నికల ఖర్చు మొత్తం ఆయన సొంత జేబు నుంచే పెట్టించాలనేది అధిష్టానం ప్లాన్‌గా పొలిటికల్ సర్కిల్స్ లో గుసగుసలు వినిపిస్తున్నాయి. ఈ అధికారిక ప్రకటన వెలువడడానికి కొన్ని రోజుల ముందే చిన్న శ్రీను తెరవెనుక ఆపరేషన్ ప్రారంభించారు. తెలుగుదేశం పార్టీ పాలకొండ నియోజకవర్గ సమన్వయకర్త శ్రీమతి పడాల భూదేవి నాలుగు రోజుల ముందే చిన్న శ్రీను క్యాంప్ కార్యాలయంలో ఆయన్ను కలిసి భవిష్యత్ కార్యాచరణపై చర్చించారు.
అయితే, వైసీపీ నుంచి వలసలను ప్రోత్సహించడం, గిరిజన ప్రాంతాల్లో క్యాడర్‌ను నిలబెట్టడం కోసం ఇప్పటికే చిన్న శ్రీను భారీగా సొంత నిధులను ఖర్చు పెట్టాల్సి వస్తోందని ఆయన అనుచరులు వాపోతున్నారు. వైసీపీని దెబ్బతీయాలనే చంద్రబాబు చాణక్య వ్యూహానికి చిన్న శ్రీను ఆర్థికంగా బలిపశువు అవుతున్నారనే వాదన ఇప్పుడు బలంగా వినిపిస్తోంది. చిన్న శ్రీను ఇప్పటికే తన కుమార్తె సిరి రాజకీయ భవిష్యత్తును టీడీపీలో సేఫ్‌గా లాక్ చేసుకున్నారు. ఈ కారణంగానే అధిష్టానం ఎంత భారమైనా, ఎంత ఖర్చయినా సరే భరించక తప్పని రక్షణాత్మక పోరాటంలో ఆయన పడ్డారు. భోగాపురం విమానాశ్రయం లాంటి ప్రతిష్టాత్మక ప్రాజెక్టులు ఉన్న మైదాన ప్రాంతాలను వదిలి, కేవలం గిరిజన ఓటు బ్యాంక్ ఎక్కువగా ఉన్న ఏజెన్సీలో వైసీపీ ఆధిక్యానికి గండి కొట్టే బాధ్యతలను నెత్తినేసుకోవడం చిన్న శ్రీను రాజకీయ జీవితానికి ప్లస్ అవుతుందా.. లేక ఆర్థికంగా కోలుకోలేని దెబ్బ తీస్తుందా అనేది రాబోయే లోకల్ ఎలక్షన్స్ ఫలితాలే తేల్చనున్నాయి.