రాజకీయాల్లో శాశ్వత శత్రువులు, శాశ్వత మిత్రులు ఉండరనే మాటను విజయనగరం జిల్లా నేతలు మరోసారి అక్షరాలా నిరూపించారు. నిన్నటివరకు అధికార, ప్రతిపక్ష హోదాల్లో ఒకరిపై ఒకరు తీవ్రస్థాయిలో విమర్శలు గుప్పించుకున్న నేతలు… నేడు ఒకే గూటికి చేరి కరచాలనం చేసుకోవడం జిల్లా రాజకీయాల్లో హాట్ టాపిక్గా మారింది. వైఎస్సార్సీపీని వీడి ఇటీవల తెలుగుదేశం పార్టీలో చేరిన విజయనగరం జడ్పీ చైర్మన్ మజ్జి శ్రీనివాసరావు అలియాస్ చిన్న శ్రీను… రాష్ట్ర ఎంఎస్ఎంఈ, సెర్ప్ శాఖ మంత్రి కొండపల్లి శ్రీనివాస్ను మంగళవారం మర్యాదపూర్వకంగా కలిశారు.
“జిల్లా రాజకీయాల్లో మార్పు వచ్చింది.. చిన్న శ్రీను రాకను స్వాగతిస్తున్నాం.. ఆయన రాకతో జిల్లాలో పార్టీ మరింత పటిష్టమవుతుంది” అంటూ మంత్రి కొండపల్లి ప్రకటించారు. అయితే, ఈ కలయికను చూసి క్షేత్రస్థాయిలోని తెలుగు తమ్ముళ్లు ముక్కున వేలేసుకుంటూ, లోలోపల నవ్వుకునే పరిస్థితి ఏర్పడింది. ఈ ఇద్దరు నేతల మధ్య గత రెండేళ్లుగా నడిచిన రాజకీయ వైరం సామాన్యమైనది కాదు. జిల్లా సర్వసభ్య సమావేశాలు లేదా జిల్లా సమీక్షా సమావేశాలు జరిగాయంటే చాలు… కొండపల్లి శ్రీనివాస్, మజ్జి శ్రీనుల మధ్య తీవ్రమైన వాగ్వాదాలు చోటుచేసుకునేవి.
జడ్పీ చైర్మన్ హోదాలో మజ్జి శ్రీను ప్రోటోకాల్ మరియు నిధుల విషయంలో ఇబ్బంది పెడుతున్నారంటూ అప్పట్లో కొండపల్లి తీవ్రంగా ధ్వజమెత్తేవారు. దానికి కౌంటర్గా మజ్జి శ్రీను కూడా కొండపల్లి వ్యాఖ్యలపై నిప్పులు చెరిగేవారు. కేవలం సమావేశాల్లోనే కాదు… సోషల్ మీడియా వేదికగా కూడా వీరిద్దరి అనుచరులు, క్యాడర్ మధ్య పెద్ద ఎత్తున ‘పోస్టర్ వార్’, విమర్శల యుద్ధం నడిచింది. నియోజకవర్గాల్లో పట్టు కోసం ఒకరినొకరు రాజకీయంగా దెబ్బకొట్టుకోవడానికి చూసిన హిస్టరీ వీరి సొంతం.
కట్ చేస్తే… ఇప్పుడు చిన్న శ్రీను సైకిల్ ఎక్కడం, నేరుగా వచ్చి మంత్రి కొండపల్లిని కలవడం, దానికి మంత్రి గారు ‘స్వాగతం’ పలకడం అంతా కేవలం వారం రోజుల వ్యవధిలోనే జరిగిపోయింది. నిన్నటివరకు సోషల్ మీడియాలో ఒకరినొకరు తిట్టుకున్న నాయకులు, ఈరోజు భుజాల మీద చేతులు వేసుకుని నవ్వుతూ ఫొటోలకు పోజులివ్వడం చూసి గ్రౌండ్ లెవెల్ కార్యకర్తలు విస్మయానికి గురవుతున్నారు. “అధికారం కోసం ఎంతటి శత్రువులైనా మిత్రులైపోతారు.. మధ్యలో మేమే అనవసరంగా కొట్టుకున్నాం” అంటూ టీడీపీ శ్రేణులు లోలోపల నవ్వుకుంటున్నారు. పైకి అంతా బాగున్నట్లు కనిపిస్తున్నా… చిన్న శ్రీను ఎంట్రీతో జిల్లా టీడీపీలో కొత్తగా అంతర్గత గ్రూపు రాజకీయాలు మొదలవుతాయేమోనన్న ఆందోళన కూడా స్థానిక సీనియర్లలో వ్యక్తమవుతోంది.