ఆంధ్రప్రదేశ్‌లో స్థానిక సంస్థల ఎన్నికల షెడ్యూల్ విడుదలకు సమయం దగ్గరపడుతున్న కొద్దీ రాజమండ్రి రాజకీయాలు ఒక్కసారిగా వేడెక్కాయి. ఈసారి రాజమహేంద్రవరం నగర కార్పొరేషన్ మేయర్ స్థానం ఎస్సీ జనరల్ కేటగిరీకి కేటాయించేలా ప్రాథమిక అంచనాలు వెలువడటంతో, కూటమిలో టికెట్ల వేట ముమ్మరమైంది. అయితే, ఈ ప్రతిష్టాత్మక పీఠాన్ని దక్కించుకునేందుకు మాజీ ఎంపీ, సీనియర్ దళిత నేత జీవీ హర్షకుమార్ తన కుమారుడి తరఫున గట్టి ప్రయత్నాలు ప్రారంభించినట్లు పొలిటికల్ సర్కిల్స్ లో టాక్ వినిపిస్తోంది.
ఈ వార్తలు బయటకు రావడంతో రాజమండ్రి నగర తెలుగుదేశం పార్టీ కార్యకర్తలు, స్థానిక నేతలు తీవ్ర అసంతృప్తితో రగిలిపోతున్నారు. జీవీ హర్షకుమార్ కుమారుడికి రాజమండ్రి మేయర్ సీటు కేటాయించేందుకు అధిష్టానం స్థాయిలో కసరత్తులు జరుగుతున్నాయనే లీకులపై క్షేత్రస్థాయి టీడీపీ శ్రేణులు తీవ్ర ఆగ్రహం వ్యక్తం చేస్తున్నాయి. దశాబ్దాలుగా పార్టీ కష్టకాలంలో ఉన్నప్పుడు, వైసీపీ అరాచకాలను ఎదుర్కొని జైళ్లకు వెళ్తూ నిలబడిన స్థానిక దళిత నాయకులను కాదని.. వేరే పార్టీల నుండి వచ్చిన వలస నేతలకు మేయర్ లాంటి పెద్ద పీఠం ఎలా కట్టబెడతారని తమ్ముళ్లు నిలదీస్తున్నారు.
పార్టీ కోసం రాత్రింబవళ్లు కష్టపడిన క్యాడర్ మనోభావాలను దెబ్బతీసేలా అధిష్టానం నిర్ణయాలు ఉండకూడదని బహిరంగంగానే వ్యాఖ్యానిస్తున్నారు. రాజమండ్రి నగరంలో ఎస్సీ సామాజిక వర్గానికి చెందిన పలువురు సీనియర్ టీడీపీ నాయకులు ఎప్పటినుంచో ఈ మేయర్ రేసులో ఉన్నారు. నియోజకవర్గంలో పట్టున్న సదరు స్థానిక నేతలను పక్కనపెట్టి, ఎన్నికల సమయంలో మాత్రమే యాక్టివ్ అయ్యే వారికి ప్రాధాన్యత ఇస్తే ఊరుకునేది లేదని గ్రౌండ్ క్యాడర్ హెచ్చరిస్తోంది. ఒకవేళ బలవంతంగా వలస నేతలకు టికెట్ ఇస్తే.. క్షేత్రస్థాయిలో తాము సహకరించే ప్రసక్తే లేదని, తిరుగుబాటు చేసి రెబెల్స్ రంగంలోకి దిగినా ఆశ్చర్యం లేదని స్థానిక తెలుగు తమ్ముళ్లు అధిష్టానానికి సంకేతాలు పంపుతున్నారు.
కూటమిలో భాగంగా ఒకవైపు బీజేపీ కూడా ఈ స్థానాన్ని ఆశిస్తుండగా, మరోవైపు టీడీపీలోనే వలస నేతలు వర్సెస్ స్థానిక నేతల మధ్య అంతర్గత పోరు మొదలవ్వడం ఉత్కంఠ రేపుతోంది. క్షేత్రస్థాయి కార్యకర్తల తీవ్ర అసంతృప్తిని మరియు స్థానిక సమీకరణాలను పరిగణనలోకి తీసుకుని ముఖ్యమంత్రి చంద్రబాబు నాయుడు ఎలాంటి నిర్ణయం తీసుకోబోతున్నారనేది ఇప్పుడు రాజమండ్రి రాజకీయాల్లో హాట్ టాపిక్‌గా మారింది.