పిల్లల ఆరోగ్యం విషయంలో తల్లిదండ్రులు ఎక్కువగా ఆలోచించే అంశం పోషకాహారం. పెరుగుతున్న వయసులో సరైన ఆహారం అందకపోతే దాని ప్రభావం శరీరంపై, మెదడుపై స్పష్టంగా కనిపిస్తుంది. ఇలాంటి సమయంలో తక్కువ ఖర్చుతో, సులభంగా దొరికే ఒక ఆహారం పిల్లల ఎదుగుదలకు బలమైన ఆధారంగా నిలుస్తోంది. అదే కోడి గుడ్డు.
సంవత్సరం వయసు దాటిన పిల్లలకు గుడ్డును ఆహారంగా పరిచయం చేయవచ్చని ఆరోగ్య నిపుణులు చెబుతున్నారు. గుడ్డులో ఉండే నాణ్యమైన ప్రోటీన్ పిల్లల శరీర నిర్మాణానికి కీలకం. ఒక్క గుడ్డులో సుమారు 6 గ్రాముల ప్రోటీన్ ఉండటం వల్ల కండరాల అభివృద్ధి, శరీర బలం పెరుగుతాయి. అంతేకాదు, మెదడు అభివృద్ధికి అవసరమైన పోషకాలు కూడా గుడ్డులో సమృద్ధిగా ఉంటాయి.
గుడ్డు కేవలం కడుపు నింపే అల్పాహారం మాత్రమే కాదు. ఇందులో ఉండే విటమిన్ డి, బీ విటమిన్లు, ఐరన్, జింక్ వంటి ఖనిజాలు పిల్లల రోగనిరోధక శక్తిని పెంచుతాయి. తరచూ జబ్బులు చేసే పిల్లల్లో గుడ్డును ఆహారంలో చేర్చడం వల్ల శరీరానికి కావాల్సిన శక్తి లభిస్తుంది. అలాగే కంటి ఆరోగ్యానికి అవసరమైన లుటిన్, జియాక్సంతిన్ వంటి పోషకాలు కూడా గుడ్లలో ఉండటం మరో ప్రత్యేకత.
ఆరోగ్య నిపుణుల సూచనల ప్రకారం 1 నుంచి 8 ఏళ్ల వయసు పిల్లలు రోజుకు ఒకటి నుంచి రెండు గుడ్లు తీసుకోవచ్చు. ఈ మోతాదు పిల్లల రోజువారీ ప్రోటీన్ అవసరాలను తీర్చడంలో సహాయపడుతుంది. చదువుపై ఏకాగ్రత పెరగడం, మెదడు చురుకుగా పనిచేయడం వంటి ప్రయోజనాలు కూడా గుడ్డు వల్ల లభిస్తాయని చెబుతున్నారు.
గుడ్లు తినే పిల్లలతో పోలిస్తే గుడ్లు తినని పిల్లల్లో డిహెచ్ఏ, కోలిన్ వంటి మెదడు శక్తికి అవసరమైన పోషకాల లోపం ఎక్కువగా కనిపిస్తుందని పలు అధ్యయనాలు వెల్లడించాయి. ఇవే పోషకాలు పిల్లల జ్ఞాపకశక్తి, నేర్చుకునే సామర్థ్యాన్ని మెరుగుపరుస్తాయి. అందుకే పెరుగుతున్న వయసులో గుడ్డు కీలకమైన ఆహారంగా మారింది.
ఇటీవల ప్రచురితమైన ఒక అంతర్జాతీయ అధ్యయనం కూడా గుడ్డు ప్రాధాన్యతను స్పష్టం చేసింది. రోజూ ఒక గుడ్డు తీసుకునే పిల్లల్లో ఎదుగుదల లోపం గణనీయంగా తగ్గిందని, బరువు తక్కువగా ఉండే సమస్యను చాలా వరకు నివారించవచ్చని ఆ అధ్యయనం తేల్చింది. ఇది తల్లిదండ్రులకు గుడ్డు ఎంత అవసరమో మరోసారి గుర్తు చేస్తోంది.
పిల్లలకు గుడ్డును ఉడికించి ఇవ్వొచ్చు, లేదా కూరగాయలతో కలిపి ఆమ్లెట్, స్క్రాంబుల్డ్ ఎగ్స్ రూపంలో అందించవచ్చు. అయితే మొదటిసారి గుడ్డు పెట్టేటప్పుడు ఎలాంటి అలర్జీ లక్షణాలు ఉన్నాయేమో గమనించడం చాలా ముఖ్యం. చర్మంపై దద్దుర్లు, వాంతులు, శ్వాసలో ఇబ్బంది వంటి లక్షణాలు కనిపిస్తే వెంటనే వైద్యులను సంప్రదించాలి. మొత్తానికి, రోజుకు ఒక్క గుడ్డు పిల్లల ఆరోగ్యానికి ఒక బలమైన పెట్టుబడి లాంటిది. సరైన ఆహారంతో పాటు గుడ్డును అలవాటు చేస్తే పిల్లల భవిష్యత్తుకు మంచి పునాది పడుతుందని వైద్యులు స్పష్టం చేస్తున్నారు.