డయాబెటిస్ ఉన్నవారికి రోజువారీ జీవితం అంత ఈజీ కాదు. తిన్న ఆహారం కొద్దిగా ఎక్కువైనా, తక్కువైనా వెంటనే రక్తంలో చక్కెర స్థాయిలు మారిపోతాయి. అందుకే డయాబెటిక్ రోగులు ఆహారం విషయంలో చాలా జాగ్రత్తగా ఉండాల్సి వస్తుంది. మందులతో పాటు సరైన ఆహారం తీసుకుంటేనే చక్కెర నియంత్రణలో ఉంటుంది అని వైద్యులు సూచిస్తుంటారు. ఈ క్రమంలో ఇప్పుడు ఒక సాధారణ కూరగాయ డయాబెటిస్ నియంత్రణలో కీలకంగా పనిచేస్తుందని కొన్ని నివేదికలు చెబుతున్నాయి.
డయాబెటిక్ రోగులకు ఉల్లిపాయలు ఒక వరంలా పనిచేస్తాయని పోషకాహార నిపుణులు అభిప్రాయపడుతున్నారు. సాధారణంగా ప్రతిరోజూ వంటల్లో వాడే ఉల్లిపాయలు రక్తంలో చక్కెర స్థాయిలను సమతుల్యంగా ఉంచడంలో సహాయపడతాయని అంటున్నారు. ముఖ్యంగా పచ్చి ఉల్లిపాయలు లేదా ఉల్లిపాయ రసం తీసుకోవడం వల్ల చక్కెర స్థాయిల్లో గణనీయమైన మార్పు కనిపించవచ్చని కొన్ని అధ్యయనాలు సూచిస్తున్నాయి.
ఉల్లిపాయల్లో ఉండే క్రోమియం, సల్ఫర్ వంటి మూలకాలు ఇన్సులిన్ పనితీరును మెరుగుపరచడంలో సహాయపడతాయని చెబుతున్నారు. ఇవి రక్తంలో గ్లూకోజ్ స్థాయిలను నియంత్రించడంలో కీలక పాత్ర పోషిస్తాయి. అలాగే పచ్చి ఉల్లిపాయల్లో విటమిన్-సి, విటమిన్-ఎ పుష్కలంగా ఉండటం వల్ల రోగనిరోధక శక్తి కూడా పెరుగుతుందని నిపుణులు చెబుతున్నారు.
కొంతమంది పోషకాహార నిపుణుల సూచనల ప్రకారం, ప్రతిరోజూ సలాడ్లో కొద్దిగా పచ్చి ఉల్లిపాయలు తీసుకోవడం మంచిదని అంటున్నారు. ఇది జీర్ణక్రియను మెరుగుపరచడమే కాకుండా, రక్తంలో చక్కెర అకస్మాత్తుగా పెరగకుండా అడ్డుకుంటుందని భావిస్తున్నారు. ముఖ్యంగా టైప్-2 డయాబెటిస్ ఉన్నవారికి ఇది ఉపయుక్తంగా ఉండొచ్చని చెబుతున్నారు.
ఇంకొన్ని నివేదికల ప్రకారం, ఉల్లిపాయ రసాన్ని నిమ్మరసంతో కలిపి తీసుకుంటే రక్తంలో చక్కెర స్థాయిలు త్వరగా తగ్గే అవకాశం ఉందని అంటున్నారు. ఉల్లిపాయలు క్లోమం పనితీరును ఉత్తేజితం చేసి ఇన్సులిన్ ఉత్పత్తిని పెంచడంలో సహాయపడతాయని కూడా పేర్కొంటున్నారు. అయితే ఇది ప్రతి వ్యక్తికి ఒకేలా పనిచేస్తుందనే హామీ మాత్రం లేదని నిపుణులు స్పష్టం చేస్తున్నారు.
అయితే డయాబెటిస్ ఒక దీర్ఘకాలిక వ్యాధి కావడంతో, కేవలం ఉల్లిపాయలపై మాత్రమే ఆధారపడకుండా వైద్యుల సూచనల ప్రకారం మందులు, ఆహారం, వ్యాయామం కొనసాగించడం తప్పనిసరి. ఇలాంటి సహజ పద్ధతులు సహాయకారిగా ఉపయోగపడవచ్చని మాత్రమే భావించాలని వైద్యులు సూచిస్తున్నారు. కొత్తగా ఏ ఆహార అలవాటు మొదలుపెట్టే ముందు తప్పనిసరిగా డాక్టర్ సలహా తీసుకోవడం మంచిదని నిపుణులు హెచ్చరిస్తున్నారు. (గమనిక: పై సమాచారం కొన్ని నివేదికల ఆధారంగా మాత్రమే ఇవ్వబడింది. వైద్య ధ్రువీకరణకు ఇది ప్రత్యామ్నాయం కాదు.)