కరోనా మహమ్మారి సృష్టించిన విషాదం ఇంకా మన జ్ఞాపకాల నుంచి పూర్తిగా తొలగిపోకముందే.. ప్రపంచం మరో ప్రాణాంతక వైరస్ ముప్పును ఎదుర్కొంటోంది. ఇథియోపియాలో తాజాగా వెలుగుచూసిన మార్బర్గ్ వైరస్ ఇప్పటికే పలువురి ప్రాణాలు తీసి అంతర్జాతీయంగా కలకలం రేపుతోంది. కొన్ని రోజుల క్రితం వరకు స్థానిక స్థాయికే పరిమితమై ఉన్న ఈ వైరస్ ఇప్పుడు ఇతర దేశాలకూ ఆందోళన కలిగించే స్థాయికి చేరింది. ప్రపంచవ్యాప్తంగా ఆరోగ్య నిపుణులు పరిస్థితిని నిశితంగా పర్యవేక్షిస్తున్నారు.
ఇథియోపియాలోని దక్షిణ ప్రాంతాలు ఈ వైరస్కి కేంద్రబిందువులుగా మారాయి. అక్కడ ఇప్పటివరకు 13 మంది ఈ వైరస్ బారిన పడినట్లు ప్రయోగశాల పరీక్షల్లో నిర్ధారణ కాగా, అందులో 8 మంది ప్రాణాలు కోల్పోవడం తీవ్ర ఆందోళన కలిగిస్తోంది. ఒక్కసారి శరీరంలోకి ప్రవేశిస్తే అతి వేగంగా తీవ్రస్థాయికి చేరే స్వభావమే ఈ వైరస్ను మరింత ప్రమాదకరంగా మారుస్తోంది. అధిక జ్వరము, రక్తస్రావం, అవయవ వైఫల్యం వంటి లక్షణాలు కొద్ది గంటల్లోనే కనిపించడం వైద్యులకు సవాల్గా మారింది.
ఈ పరిణామాలతో సౌదీ అరేబియా ప్రభుత్వం అప్రమత్తమైంది. ఇథియోపియాలో ఉన్న తమ పౌరులకు అత్యవసర హెచ్చరికలు జారీ చేస్తూ, ప్రభావిత ప్రాంతాలకు ప్రయాణాలను వెంటనే నిలిపివేయాలని సూచించింది. రద్దీగా ఉండే ప్రాంతాలకు దూరంగా ఉండాలని, అనవసర సమావేశాలను తగ్గించాలని, స్థానిక ఆరోగ్య శాఖ సూచనలను తప్పనిసరిగా పాటించాలని స్పష్టం చేసింది. వైరస్ సోకిన అనుమానం ఉన్న సందర్భంలో ఆలస్యం చేయకుండా తక్షణమే వైద్య సహాయం తీసుకోవాలని ఆదేశించింది.
ఇథియోపియాలో నివసిస్తున్న సౌదీ పౌరులు ఎప్పటికప్పుడు రాయబార కార్యాలయంతో సంప్రదింపులు కొనసాగించాలని ప్రభుత్వం సూచించింది. 24 గంటలూ పనిచేసే అత్యవసర హాట్లైన్ను అందుబాటులో ఉంచుతూ అవసరమైన సూచనలు, వైద్య సహాయం, మార్గదర్శకత్వం అందించేందుకు ఏర్పాట్లు చేసింది. వైరస్ తీవ్రతను తక్కువగా అంచనా వేసి నిర్లక్ష్యం చేయడం ప్రాణాంతకంగా మారవచ్చని అధికారులు హెచ్చరిస్తున్నారు.
కరోనా తర్వాత ప్రపంచం కొంత ఊరట పొందినప్పటికీ, ఇలాంటి కొత్త వైరస్లు మళ్లీ భయాన్ని పుట్టిస్తున్నాయి. మార్బర్గ్ వైరస్ ఉదంతం ప్రపంచ ఆరోగ్య వ్యవస్థలకు మరో హెచ్చరికగా మారింది. ఒక దేశంలో పుట్టిన వైరస్ కొన్ని రోజుల్లోనే అంతర్జాతీయ స్థాయిలో కలకలం రేపే పరిస్థితి తిరిగి మొదలవుతుందన్న ఆందోళన సర్వత్రా వ్యక్తమవుతోంది. పరిస్థితి ఎలా మలుపు తిరుగుతుందో చెప్పలేని ఈ వేళ, అప్రమత్తతే ఇప్పుడు అత్యంత కీలకం అని వైద్య నిపుణులు స్పష్టం చేస్తున్నారు.