2019 ఎన్నికల్లో ఒక్క సీటైనా వచ్చింది. 2024 ఎన్నికల్లో గుండు సున్నానే.. అంటూ జనసేన గురించి అధికార వైసీపీ ఎద్దేవా చేస్తున్న సంగతి తెలిసిందే. ‘మేమే అధికారంలోకి వస్తాం.. మీ సంగతి తేలుస్తాం..’ అంటోంది వైసీపీని ఉద్దేశించి జనసేన పార్టీ. ఈ సవాళ్ళు ప్రతిసవాళ్ళ సంగతి పక్కన పెడితే, ఓ ఆసక్తికరమైన సర్వే వెలుగు చూసింది.
ఆ సర్వేలో వైసీపీనే తిరిగి అధికారంలోకి వస్తుందని తేలింది. కాకపోతే, టీడీపీ కూడా పుంజుకుంటుందట. జనసేన పార్టీకి సైతం ఈసారి ఓటర్లు బాగానే సీట్లు ఇవ్వబోతున్నారట. డబుల్ డిజిట్ టచ్ చేయడం కష్టం గానీ, ఓ ఏడెనిమిది సీట్లు రావొచ్చన్నది సదరు సర్వే సారాంశం. ఏడెనిమిది కాదు.. ఏడు సీట్లేనట.
టీడీపీకి ఓ నలభై సీట్లు రావొచ్చునట. వైసీపీకి గణనీయంగా సీట్లు తగ్గబోతున్నాయ్. ఈ సర్వేలో షాకింగ్ అంశం జనసేనకు ఏడు సీట్లు వస్తాయని చెప్పడమే. బహుశా ఆ ఫిగర్ని జనసేన కూడా ఊహించుకుని వుండదేమో.. అన్న చర్చ నడుస్తోంది. పండగ చేసుకుంటున్నారు జనసేన నేతలు.. అంటూ ఈ సర్వేపై రాజకీయ వర్గాల్లో చర్చ జరుగుతోంది.
ఒకవేళ టీడీపీ – జనసేన కలిసి పోటీ చేస్తే మాత్రం, జనసేన ఖచ్చితంగా డబుల్ డిజిట్ సాధిస్తుందిట. ఏమో.. గుర్రం ఎగరావచ్చు.. అన్నట్టుగా హంగ్ ఏర్పడితే.. జనసేన పాత్ర కీలకం కాబోతుందట. ఆ ఛాన్సే లేదన్నది వైసీపీ వాదన. ఔను మరి, వైసీపీ టార్గెట్ ఏకంగా 175. అలాంటప్పుడు.. ఈ తరహా సర్వేల్ని వైసీపీ ఎందుకు ఒప్పుకుంటుంది.?
రాజకీయాల్లో ఏదైనా జరగొచ్చు. సర్వేల సంగతెలా వున్నా, జనసేన చెప్పుకోదగ్గ స్థాయిలోనే ఈసారి ప్రభావం చూపొచ్చునన్నది ప్రధాన రాజకీయ పార్టీలో అంతర్గతంగా జరుగుతున్న చర్చ.