CBN Birthday Celebrations: ఆంధ్రప్రదేశ్ ముఖ్యమంత్రి నారా చంద్రబాబు నాయుడు పుట్టినరోజు వేడుకలు రెండు తెలుగు రాష్ట్రాల్లోనూ తెలుగుదేశం శ్రేణులు అత్యంత వైభవంగా నిర్వహించాయి. ఈ సందర్భంగా పలువురు సినీ, రాజకీయ ప్రముఖులు చంద్రబాబుకు శుభాకాంక్షలు తెలియజేశారు. ఈ క్రమంలోనే ప్రముఖ సినీ నిర్మాత బండ్ల గణేష్ చంద్రబాబు జన్మదిన వేడుకల్లో పాల్గొని ఆసక్తికర వ్యాఖ్యలు చేశారు. చంద్రబాబు దార్శనికతను కొనియాడుతూనే, ఆయనను విమర్శించే వారిపై బండ్ల గణేష్ తీవ్ర స్థాయిలో మండిపడ్డారు.
ఈ సందర్భంగా బండ్ల గణేష్ మాట్లాడుతూ.. చంద్రబాబు తొలిసారి ముఖ్యమంత్రిగా ఉన్నప్పుడు జరిగిన ఒక అరుదైన సంఘటనను గుర్తు చేసుకున్నారు. “నాడు సింగపూర్ పర్యటనకు వెళ్లిన సమయంలో, రాత్రి 10 గంటలకు మీటింగ్లన్నీ ముగించుకుని హోటల్కు చేరుకున్నారు. అందరినీ పంపించేసి, తన మిత్రుడితో కలిసి ఎవరికీ తెలియకుండా బయటకు వెళ్లారు. ఏదైనా సినిమాకో లేక వినోద కార్యక్రమాలకో వెళ్తారని భావిస్తే.. చంద్రబాబు మాత్రం తెల్లవారుజామున 4 గంటల వరకు సింగపూర్లోని డంపింగ్ యార్డులు, చెత్త సేకరణ విధానాన్ని పరిశీలించారు. మన హైదరాబాద్ను కూడా ఇలాగే తయారు చేయాలని ఆ రోజే ఆయన కలలు కన్నారు” అని బండ్ల గణేష్ కొనియాడారు.
తెలుగు జాతి కోసమే తపన చంద్రబాబు ఎప్పుడూ తన స్వార్థం గురించి ఆలోచించలేదని, తెలుగు యువత ప్రపంచాన్ని శాసించాలన్నదే ఆయన లక్ష్యమని బండ్ల గణేష్ పేర్కొన్నారు. “నాడు ఆయన ఐటీ రంగాన్ని పరిచయం చేయడం వల్లే, నేడు లక్షలాది మంది తెలుగు యువకులు విదేశాల్లో కోట్లు సంపాదిస్తూ గొప్పగా బతుకుతున్నారు.” “దివిసీమ తుపాను వంటి విపత్కర పరిస్థితుల్లో రైతు కుటుంబాలకు దేవుడిలా అండగా నిలిచిన వ్యక్తి ఆయన.”
విమర్శించే వారిని వదలొద్దు!:
ఇదే సమయంలో చంద్రబాబును విమర్శించే వారిపై బండ్ల గణేష్ ఎమోషనల్ అయ్యారు. “సార్.. మీ పుట్టినరోజు సందర్భంగా ఒక్కటే కోరుతున్నా. అన్యాయంగా మిమ్మల్ని విమర్శించే వారిని అస్సలు వదలొద్దు. ట్విట్టర్ ఉంది కదా అని ఇష్టానుసారంగా వాగుతున్నారు. పది కంపెనీలు తెచ్చే సత్తా లేని వారు, ఈ వయసులో కూడా కుర్రాడిలా తిరుగుతూ పనిచేసే చంద్రబాబును విమర్శిస్తుంటే తట్టుకోలేకపోతున్నాం” అని ఆవేదన వ్యక్తం చేశారు.
అమరావతికి ఆయనే దిక్కు:
రాబోయే 25 ఏళ్లలో అమరావతిని అద్భుతంగా అభివృద్ధి చేసి, తెలుగు ప్రజలంతా గర్వంగా చెప్పుకునేలా చేసే నాయకుడు చంద్రబాబు మాత్రమేనని బండ్ల గణేష్ స్పష్టం చేశారు. ఆయన వందో పుట్టినరోజును కూడా ఇంతే ఘనంగా జరుపుకుంటామని ఆకాంక్షించారు.
