పాన్ ఇండియా హీరో ప్రభాస్ గారు మాకు మీరే దిక్కు “స్పిరిట్” ఇస్ నాట్ వన్ సినిమా తీసి ఆస్తులు అమ్మి సర్వం కోల్పోయాం. పిచ్చుక మీద బ్రహ్మస్త్రం లా మా సినిమా పైన కోర్టు కేసు వేసి రిలీజ్ ఆపేసి రోడ్డున పడేసిన ప్రభాస్ ప్రొడ్యూసర్స్ అంటోంది మహిళా రైతు నిర్మాత నర్సమ్మ. మాతో మాట్లాడితే వేరే టైటిల్ పెట్టుకుని రిలీజ్ చేసుకునేవాళ్ళం. మా మీద రెండు లీగల్ నోటీసులు పంపించి సినిమా రిలీజ్ ఆపేసారు. రిలీజ్ కి డబ్బులు ఇస్తాను అన్నవాళ్లు కూడా ఇవ్వలేదు ఊరిలో పరువు పోయింది ఇప్పుడు మమ్మల్ని ఎవ్వరు నమ్మడం లేదు. ఇప్పుడు రోడ్డున పడిపోయాం మమ్మల్ని ప్రభాస్ గారు ఆదుకోవాలి మీకోసం టైటిల్ మార్చుకోడడానికి మేము సిద్ధం గానే ఉన్నాము. మమ్మల్ని సంప్రదించకుండా టీ-సిరీస్ సంస్థ అధినేత శ్రీ భూషణ్ కుమార్ రెండు లీగల్ నోటీసులు పంపారు. అడిగి ఉంటే మేము టైటిల్ మార్పుకు ఒప్పుకునే వాళ్ళం. ఒక రైతు ఫ్యామిలీ సినిమా తీస్తే మాకు వచ్చిన టైటిల్ వివాదం కి సినిమా ఇండస్ట్రీ ఎటువంటి సపోర్ట్ చెయ్యడం లేదు.
ప్రభాస్ గారిపై, సందీప్ రెడ్డి వంగా గారిపై అభిమానంతో ఈ విజ్ఞప్తిని చేస్తున్నాను. మీరు చేస్తున్న “స్పిరిట్” సినిమా నిర్మాతలు అయిన టీ-సిరీస్ సంస్థ అధినేత శ్రీ భూషణ్ కుమార్ గారి తరఫున, మా “స్పిరిట్ ఈజ్ నాట్ వన్” చిత్రాన్ని విడుదల చేయకూడదని, దాని ప్రచార కార్యక్రమాలు నిలిపివేయాలని కోరుతూ మాకు లీగల్ నోటీసు పంపబడింది.
మా “స్పిరిట్ ఈజ్ నాట్ వన్” చిత్రం 8th Wonder Cinemas బ్యానర్పై నిర్మించబడింది. ఈ చిత్రానికి మీరు సూట్ మొదలు పెట్టక ముందు సంవత్సరంలోనే మాకు సెన్సార్ సర్టిఫికేట్ లభించింది. అంతకుముందే మేము అనేక యూట్యూబ్ ఛానెల్స్, వార్తాపత్రికలు, ఇతర మీడియా వేదికల ద్వారా ప్రచార కార్యక్రమాలు నిర్వహించాము. చిత్రానికి సంబంధించిన ఇంటర్వ్యూలు కూడా ఇచ్చాము. గత నెలలో చిత్రాన్ని విడుదల చేయాలని నిర్ణయించి, పోస్టర్లు ముద్రించి, విడుదలకు సంబంధించిన అన్ని ఏర్పాట్లు పూర్తి చేసిన సమయంలో, సందీప్ రెడ్డి వంగా గారి మేనేజర్ ద్వారా మా ఇంటి చిరునామాలు, ఇతర వివరాలు మా నుంచే సేకరించి, వాటిని టీ-సిరీస్ వారికి అందించి అనంతరం మాకు లీగల్ నోటీసు పంపించారు.
ఈ పరిణామాల వల్ల మా కుటుంబం సామాజికంగా ఇబ్బందులు ఎదుర్కొంటోంది. విడుదల కోసం పెట్టిన పెట్టుబడులు నిలిచిపోయాయి. గతంలో ఈ సినిమా నిర్మాణం కోసం చేసిన అప్పుల కారణంగా రుణదాతల నుంచి కూడా ఒత్తిడి ఎదురవుతోంది. అంతేకాక మీరు పంపించిన లాయర్ నోటీసు మేమే కావాలని మా ఊర్లో మా ఇంటికి పంపించి అప్పుల వాళ్ళకి డబ్బులు ఇవ్వకుండా ఎగ కొట్టాలని అనుకుంటున్నాము అని మీ వల్ల నింద కూడా వచ్చింది. మీరు ఈ నోటీసు పంపడం వెనుక ఉద్దేశ్యం ఏమిటో మాకు తెలియదు. ఒకవేళ టైటిల్కు సంబంధించిన ఏదైనా అభ్యంతరం ఉంటే, పెద్దల సమక్షంలో చర్చించి పరిష్కారం కనుగొనడానికి మేము సిద్ధంగా ఉన్నాము. మీకు కూడా దురుద్దేశం ఏమీ లేకపోతే మీరు పెద్దమనుషులు దగ్గరికి రావాలని ఆశిస్తూ చిన్న నిర్మాతలు, మంచి కథలు, మంచి టైటిళ్లతో సినిమాలు చేయకూడదనే ఉద్దేశం ఎవరికీ ఉండకూడదని మా అభిప్రాయం.
ఒకవేళ ఈ చర్యలు కేవలం మీ సినిమా ప్రచారం లేదా వాణిజ్య ప్రయోజనాల కోసం జరిగి ఉంటే, దాని వల్ల మా కుటుంబం, మా సినిమా తీవ్ర నష్టాన్ని చవిచూస్తున్నాయి. అయితే ఈ విషయాల గురించి మీకు పూర్తి సమాచారం లేకపోతే, దయచేసి మీ నిర్మాతలతో మాట్లాడి నిజానిజాలు తెలుసుకొని మాకు న్యాయం జరిగేలా సహకరించగలరని కోరుతున్నాము. అలాగే, మీ నిర్మాతల అభ్యంతరాలు ఉపసంహరించుకున్నట్లయితే, “8th Wonder Cinemas” బ్యానర్పై నిర్మితమైన “స్పిరిట్ ఈజ్ నాట్ వన్” చిత్రానికి ఎటువంటి అభ్యంతరం లేదని, దాని విడుదల, ప్రదర్శన, డిజిటల్ లేదా ఇతర ప్లాట్ఫారమ్లలో విక్రయానికి తమకు ఎటువంటి అభ్యంతరం లేదని స్పష్టంగా తెలియజేసే అధికారిక లేఖ, ప్రకటన కుడా ఇవ్వగలరని మనవి.
మా సినిమా కోసం మేము అనేక సంవత్సరాలుగా శ్రమించాము. ఇది కేవలం ఒక సినిమా మాత్రమే కాదు, నా చిన్ననాటి కల. మా కుటుంబ సభ్యులందరి కష్టం, ఆశలు, పెట్టుబడులు ఈ చిత్రంలో ఉన్నాయి. మేము గౌరవప్రదంగా ఈ చిత్రాన్ని విడుదల చేయాలనే సంకల్పంతో ముందుకు వచ్చాము.
కాబట్టి, దయచేసి మా పరిస్థితిని అర్థం చేసుకుని, మాకు సానుకూలంగా స్పందించి, “స్పిరిట్ ఈజ్ నాట్ వన్” చిత్రాన్ని విడుదల చేసుకునే అవకాశాన్ని కల్పించగలరని, మాది చిన్న సినిమా కాబట్టి మా సినిమా రిలీజ్ అయ్యే అంతవరకు మీ స్పిరిట్ సినిమా రిలీజ్ ని వాయిదా వేసుకోవాలి అని చేతులు జోడించి ప్రభాస్ గారిని, సందీప్ రెడ్డి వంగా గారిని వేడుకుంటున్నాను.
చివరగా, ఈ విజ్ఞప్తిపై మీరు సానుకూలంగా స్పందించి, మా చిత్ర విడుదలకు సహకరిస్తారని ఆశిస్తున్నాము. ఒకవేళ ఈ అంశంపై మీ నుంచి ఎలాంటి స్పందన రాకపోయినా, లేదా మా సమస్యకు న్యాయమైన పరిష్కారం లభించకపోయినా, మా హక్కులు, ప్రయోజనాలను కాపాడుకోవడానికి మేము న్యాయస్థానాన్ని ఆశ్రయించక తప్పదు.
అలాగే, ఇప్పటివరకు మాకు జరిగిన ఆర్థిక నష్టం, పరువు నష్టం, ఇతర ఇబ్బందులన్నింటినీ పరిగణనలోకి తీసుకొని, చట్టపరంగా మాకు అందుబాటులో ఉన్న అన్ని న్యాయపరమైన మార్గాలను అనుసరించాల్సిన పరిస్థితి ఏర్పడుతుందని మర్యాదపూర్వకంగా తెలియజేస్తున్నాము.
అయినప్పటికీ కంటే పరస్పర అవగాహనతో సమస్యకు పరిష్కారం లభించాలని మేము హృదయపూర్వకంగా కోరుకుంటున్నాము.