రెబల్ స్టార్ కృష్ణంరాజు నిన్ననే 79వ జన్మదినోత్సవాన్ని తన కుటుంబ సభ్యులు ,అభిమానుల మధ్య జరుపుకున్నారు .
1966లో “చిలక గోరింక” సినిమాతో కృష్ణంరాజును దర్శకులు ప్రత్యగాత్మ పరిచయం చేశారు . 53 సంవత్సరాల నుంచి కృష్ణంరాజు నటుడుగా కొనసాగుతున్నారు . మొదట్లో సినిమా రంగంలో నిలదొక్కుకోవడానికి విలన్ గా నటించాడు . ఆ తరువాత హీరోగా తన ప్రతిభను నిరూపించుకుంటూ వచ్చారు .
హీరోగా , నిర్మాతగా , పంపిణీదారుగా , రాజకీయ నాయకుడుగా కృష్ణంరాజు బహుముఖాలుగా ఎదిగి ఒదిగిన అసామాన్యుడు
పార్లమెంట్ సభ్యుడుగా , కేంద్ర లో రెండు పర్యాయాలు మంత్రిగా కూడా పనిచేశారు .ఆరు అడుగుల ఎత్తే కాదు అంతటి సంస్కారం వున్న వ్యక్తి కృష్ణంరాజు . ఆయన్ని నేను మొదట కలుసుకుంది 1977 వ సంవత్సరంలో . అప్పుడు దివిసీమ ఉప్పెన సందర్భంగా తన వంతు సహాయాన్ని ప్రకటించడానికి హైదరాబాద్ వచ్చి బేగంపేటలో వున్న బ్లూమూన్ హోటల్లో దిగారు . జర్నలిస్టుల సమావేశం ఏర్పాటుచేశారు .
ఆ సమావేశానికి నేను వెళ్ళినప్పుడు కృష్ణంరాజు గారితో మొదటసారి మాట్లాడాను . ఆయన ఒక హీరోగా కాకుండా ఓ సోదరుడిలా అందరితో చాలా కలివిడిగా మెలిగారు . సమావేశం అనంతరం ఆయనతో జర్నలిస్టులు ఇష్టాగోష్టిగా మాట్లాడారు .
అప్పుడు కొందరు మిత్రులు సిగరెట్ ముట్టించడానికి ప్రయత్నిస్తుంటే కృష్ణంరాజు స్వయంగా వచ్చి అగ్గిపుల్ల గీసి ఆ జర్నలిస్టు మిత్రులకు సహాయపడటం నా స్మృతి పధంలో ఇంకా వుంది . నిజంగా ఒక హీరో అలా చేయడం చాలా అరుదు .
అంతకు ముందు ఆయన నటించిన “అమరదీపం ” సినిమా విడుదలై ఘనవిజయం సాధించింది . అప్పుడప్పుడే స్టార్ డం వస్తుంది . అయినా కృష్ణంరాజు లో ఆ అహం కనిపించలేదు . ఆ గ్లామర్ టచ్ ఆయనలో కనిపించలేదు .
అప్పటి నుంచి కృష్ణంరాజునూ అనేక మార్లు కలవడం, ఇంటర్వ్యూ లు చేయడం జరిగింది .
అప్పటికీ ఇప్పటికీ ఆయన ప్రవర్తనలో కొంచం కూడా మార్పులేదు . అదే మర్యాద , అదే ఆదరణ . నిన్న హైదరాబాద్ జూబిలీహిల్స్ లో వున్నా కృష్ణంరాజు ఇంటింకి నిర్మాత దర్శకుడు సివి రెడ్డి తో పాటు వెళ్ళాను . కృష్ణంరాజు హీరోగా పరిచయం అయిన చిలక గోరింకా సినిమాలో సివి రెడ్డి కూడా ఓ చిన్న పాత్రలో నటించారు . గత 53 ఏళ్లుగా వారిద్దరిమద్య స్నేహం కొనసాగుతుంది . మేము వెళ్ళేటప్పటికి విజయవాడ నుంచి కృష్ణంరాజు అభిమానులు బయట వేచివున్నారు .
మేము వచ్చామని తెలుసుకున్న కృష్ణంరాజు బయటకు వచ్చారు . ఇద్దరం కృష్ణంరాజుకు జన్మదిన శుభాకాంక్షలు తెలిపాము
కృష్ణంరాజు మాతో కాసేపు మాట్లాడారు . కృష్ణంరాజు మరిన్ని జన్మదినోత్సవాలు జరుపుకోవాలని మనసారా కోరుకుంటున్నా .
-భగీరథ