ఆంధ్రప్రదేశ్‌లో స్థానిక సంస్థల ఎన్నికల పర్వం ఊపందుకున్న వేళ, అధికార కూటమి అగ్రనేతలు సీట్ల సర్దుబాటును కొలిక్కి తెచ్చేందుకు వరుస సమావేశాలు నిర్వహిస్తున్నారు. అమరావతిలో ముఖ్యమంత్రి నారా చంద్రబాబు నాయుడితో ఉపముఖ్యమంత్రి పవన్ కల్యాణ్ మరోసారి ప్రత్యేకంగా భేటీ అయ్యారు. అరగంట పాటు అత్యంత ప్రాధాన్యతతో సాగిన ఈ సమావేశంలో… రాబోయే ఎంపీటీసీ, జడ్పీ చైర్మన్ స్థానాల కేటాయింపులపై ఇరు నేతలు సుదీర్ఘంగా చర్చించారు.
ఇటీవల మున్సిపల్ ఎన్నికల సీట్ల పంపకాలకు ఉపయోగించిన సక్సెస్‌ఫుల్ ఫార్ములా ఆధారంగానే ఈ పరిషత్ ఎన్నికల సీట్ల కేటాయింపులు కూడా జరపాలని ప్రాథమికంగా ఒక అవగాహనకు వచ్చినట్లు తెలుస్తోంది. ఈ సర్దుబాటులో భాగంగా జనసేన పార్టీ రాష్ట్రవ్యాప్తంగా కనీసం 7 లేదా 8 జెడ్పీ చైర్మన్ స్థానాలను ఆశిస్తున్నట్లు పొలిటికల్ సర్కిల్స్‌లో టాక్ నడుస్తోంది. ముఖ్యంగా ఉమ్మడి చిత్తూరు, తిరుపతి, కాకినాడ జిల్లాల్లోని కీలకమైన జడ్పీటీసీ స్థానాలపై జనసేన గట్టిగా గురిపెట్టింది.
వీటితో పాటు గుంటూరు, బాపట్ల, పల్నాడు జిల్లాల్లో సైతం తమ పార్టీకి బలమున్న మరికొన్ని స్థానాలను కేటాయించాలని పవన్ కల్యాణ్ కోరినట్లు సమాచారం. సీట్ల కేటాయింపుల ప్రక్రియ ఒకవైపు సాగుతుండగానే, మరోవైపు అవకాశం ఉన్నచోట్ల కూటమి పార్టీలైన టీడీపీ, జనసేన, బీజేపీ ఆశావహులు పోటాపోటీగా నామినేషన్లు దాఖలు చేస్తూ గ్రౌండ్ లెవెల్‌లో సందడి పెంచేస్తున్నారు. ఈ కీలక పరిణామాల నేపథ్యంలో కూటమిలో ఎలాంటి అంతర్గత విభేదాలు రాకుండా చూసుకోవడమే ప్రధాన లక్ష్యంగా బాబు-పవన్ వ్యూహాలు రచిస్తున్నారు.
సీట్ల సర్దుబాటుపై ఇరు పార్టీల మధ్య త్వరలోనే పూర్తి ఏకాభిప్రాయం సాధించి, తిరుగుబాటు బావుటా ఎగరేస్తున్న రెబల్స్ మరియు అసంతృప్త నేతలను తక్షణమే బుజ్జగించేలా జిల్లా స్థాయి ఇన్ఛార్జులకు దిశా నిర్దేశం చేశారు. క్షేత్రస్థాయిలో పార్టీ కార్యకర్తల మధ్య ఎక్కడా ఘర్షణ వాతావరణం లేకుండా, మూడు పార్టీలు కలిసికట్టుగా పనిచేసి ప్రతిపక్ష వైసీపీని దెబ్బతీయడమే ఈ వరుస భేటీల ముఖ్య సారాంశమని విశ్లేషకులు భావిస్తున్నారు.