తెలంగాణ జాగృతి ఆధ్వర్యంలో ఇటీవల జరిగిన ధర్నా, కేవలం కాళేశ్వరం నోటీసులకు వ్యతిరేకంగా చేసిన ఆందోళన మాత్రమే కాదు, బీఆర్ఎస్ పార్టీలో జరుగుతున్న అంతర్గత విభేదాలకు ప్రతిబింబంగా మారింది. జాగృతి అధ్యక్షురాలిగా ఉన్న ఎమ్మెల్సీ కవిత ఈ ధర్నాకు నాయకత్వం వహించినా, ఒక్క బీఆర్ఎస్ నేత కూడా హాజరు కాకపోవడం గమనార్హం. ఇదే కవిత ఒకప్పుడు పార్టీ సమిష్టి నిర్ణయాలతో ముందుకు వెళ్లిన దశను గుర్తు చేస్తే, ఇప్పుడు ఆమె ఆచరణ పార్టీ దిశకు భిన్నంగా మారినట్టే కనిపిస్తోంది.
కవిత ఇటీవల బీఆర్ఎస్ కీలక నేతలపైనా బహిరంగ విమర్శలు చేయడం, పార్టీ కార్యక్రమాలకు దూరంగా ఉండడం, తెలంగాణ ఆవిర్భావ దినోత్సవానికి హాజరుకాకపోవడం.. ఇవన్నీ పార్టీతో ఆమె మధ్య విభేదాలు తలెత్తుతున్నాయని సంకేతాలు ఇస్తున్నాయి. జూన్ 2న ఆమె జాగృతి కార్యాలయంలో స్వతంత్రంగా వేడుకలు నిర్వహించడాన్ని కూడా రాజకీయ వర్గాలు సీరియస్‌గా పరిగణిస్తున్నాయి. ఆమె వ్యవహారశైలి, ఆలోచనా విధానం పార్టీ అధిష్ఠానం దిశకు భిన్నంగా మారుతోందన్న అంచనాలపై బలాన్ని చేకూరుస్తోంది.
కాళేశ్వరం విచారణపై కేసీఆర్ స్పందించిన తీరూ, కవిత చేపట్టిన ధర్నా తీరు పూర్తిగా వ్యత్యాసంగా ఉన్నాయి. కేసీఆర్ కమిషన్ ముందు హాజరై ప్రాజెక్టు పై మౌఖికంగా వివరించాలనుకుంటే, కవిత మాత్రం నోటీసులే తప్పనే స్థాయిలో నిరసన వ్యక్తం చేశారు. ఈ వ్యత్యాసం కేవలం ఆచరణ విషయంలోనే కాదు, పార్టీ లోపల ఎదురు దిశల్లో ఆలోచించే శక్తులు ఉన్నాయన్నదానికే సంకేతం. దీంతో, కవిత చేసిన ధర్నా రాజకీయంగా పెద్ద చర్చకు దారితీస్తోంది.
రాజకీయ విశ్లేషకుల అభిప్రాయం ప్రకారం, కవిత ధర్నా ద్వారా తన స్వతంత్ర రాజకీయ దిశను స్పష్టం చేసినట్టే కనిపిస్తోంది. ఇది బీఆర్ఎస్ లో ఆమె భవిష్యత్ స్థానం, పార్టీకి ఆమె అవసరం, లేదా పార్టీ నుంచి ఆమె వేరుపడే అంశాలపై కీలక మలుపు కావొచ్చని చెబుతున్నారు. కేసీఆర్, కేటీఆర్ ఈ పరిణామాలపై ఎలా స్పందిస్తారన్నది ఇప్పుడు రాజకీయంగా అత్యంత ఆసక్తికరంగా మారింది.
