Political War: తెలంగాణ ముఖ్యమంత్రి రేవంత్ రెడ్డిపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర ఆగ్రహం వ్యక్తం చేశారు. గత పదేళ్లుగా శాంతిభద్రతలకు మారుపేరుగా నిలిచిన తెలంగాణలో అశాంతిని రేకెత్తించేలా సీఎం వ్యాఖ్యలు చేస్తున్నారని మండిపడ్డారు. బీఆర్ఎస్ పార్టీకి చెందిన జెండా గద్దెలను ధ్వంసం చేయాలంటూ ముఖ్యమంత్రి పిలుపునివ్వడంపై కేటీఆర్ తీవ్రంగా స్పందించారు.
హోంమంత్రి హోదాలో ఉండి హింసను ప్రేరేపిస్తారా? అని ప్రశ్నించిన కేటీఆర్. రెండేళ్ల కాంగ్రెస్ పాలన అట్టర్ ఫ్లాప్ ప్రజా వ్యతిరేకత పెరగడంతోనే సీఎంకు మతిభ్రమించిందని విమర్శ. డీజీపీకి డిమాండ్ హింసను ప్రోత్సహిస్తున్న ముఖ్యమంత్రిపై తక్షణమే చట్టపరమైన చర్యలు తీసుకోవాలి. రాజకీయ కుట్ర రేవంత్ రెడ్డి తన ‘పాత బాస్’ (చంద్రబాబు) ఆదేశాల మేరకే పని చేస్తున్నారని ఆరోపణ.
రాష్ట్రంలో శాంతిభద్రతలను కాపాడాల్సిన ముఖ్యమంత్రి, స్వయంగా హింసను ప్రోత్సహించడం ప్రజాస్వామ్యానికే గొడ్డలిపెట్టు అని కేటీఆర్ విమర్శించారు. “మీరు ఒక రాష్ట్రానికి ముఖ్యమంత్రివా? లేక ఒక ముఠా నాయకుడివా?” అని ఆయన సూటిగా ప్రశ్నించారు. సోషల్ మీడియాలో చిన్న పోస్టులు పెట్టిన వారిపై కూడా వేగంగా స్పందించి కేసులు పెట్టే పోలీసు శాఖ, నేరుగా హింసకు పిలుపునిస్తున్న ముఖ్యమంత్రి విషయంలో ఎందుకు మౌనంగా ఉందని ప్రశ్నించారు. ఈ మేరకు రాష్ట్ర డీజీపీ తక్షణమే స్పందించి సీఎంపై చర్యలు తీసుకోవాలని బీఆర్ఎస్ తరపున డిమాండ్ చేశారు.
“తెలంగాణ ప్రజల గుండెల్లో గులాబీ జెండాకు ఉన్న స్థానాన్ని చూసి సీఎంకు మైండ్ బ్లాక్ అయ్యింది. రెండేళ్లలోనే కాంగ్రెస్ ప్రభుత్వం పట్ల ప్రజల్లో పెల్లుబుకుతున్న వ్యతిరేకతను చూసి తట్టుకోలేకనే రేవంత్ రెడ్డి ఇలాంటి వ్యాఖ్యలు చేస్తున్నారు.” — కేటీఆర్, బీఆర్ఎస్ వర్కింగ్ ప్రెసిడెంట్
కాంగ్రెస్ ఒక మునిగిపోయే నావ అని రేవంత్ రెడ్డికి అర్థమైందని, అందుకే ఆయన బీజేపీతో చీకటి ఒప్పందాలు చేసుకుంటున్నారని కేటీఆర్ ఆరోపించారు. కాంగ్రెస్ ముఖ్యమంత్రిగా ఉంటూనే తెలుగుదేశం పార్టీ పాట పాడటం వెనుక పెద్ద కుట్ర దాగి ఉందని, తెలంగాణ జలహక్కులను తన పాత బాస్ కోసం తాకట్టు పెట్టారని విమర్శించారు. తెలంగాణ సమాజంపై మళ్ళీ టీడీపీని రుద్దే ప్రయత్నాలను ప్రజలు తిప్పికొడతారని హెచ్చరించారు.
నీళ్లు, నిధులు, నియామకాల విషయంలో తెలంగాణకు ద్రోహం చేసిన రేవంత్ రెడ్డి ప్రభుత్వం త్వరలోనే భారీ మూల్యం చెల్లించుకోక తప్పదని కేటీఆర్ స్పష్టం చేశారు. భవిష్యత్తులో ప్రజలే కాంగ్రెస్ ప్రభుత్వానికి బుద్ధి చెబుతారని ఆయన పేర్కొన్నారు.
