దేశవ్యాప్తంగా ఓటర్ల జాబితాల సవరణ ప్రక్రియలో భారీ అక్రమాలు జరిగాయంటూ వస్తున్న ఆరోపణలు, దేశ రాజధానిలో చెలరేగుతున్న నిరసనలతో జాతీయ రాజకీయం అల్లకల్లోలంగా మారింది. ఏకంగా 13 కోట్లకు పైగా ఓటర్ల పేర్లను జాబితా నుండి తొలగించారని, ఇది ముమ్మాటికీ ప్రజాస్వామ్యాన్ని అణచివేయడమేనని ప్రతిపక్ష ఇండి కూటమి, కాక్రోచ్ జనతా పార్టీ రోడ్లపైకి వచ్చి తీవ్ర స్థాయిలో ఆందోళనలు చేస్తున్నాయి.
ఇంతటి తీవ్రమైన సంక్షోభం దేశాన్ని కుదిపేస్తున్నప్పటికీ.. ప్రధానమంత్రి నరేంద్ర మోదీ, కేంద్ర హోం మంత్రి అమిత్ షా, అలాగే ప్రధాన నిందితుడిగా విపక్షాలు వేలెత్తి చూపుతున్న చీఫ్ ఎలక్షన్ కమిషనర్ జ్ఞానేశ్ కుమార్ ఇప్పటివరకు మీడియా ముందుకు రాకపోవడం, ఎలాంటి అధికారిక వివరణ ఇవ్వకపోవడంపై దేశవ్యాప్తంగా విమర్శలు వెల్లువెత్తుతున్నాయి. కేంద్ర ప్రభుత్వం మరియు ఎలక్షన్ కమిషన్ అనుసరిస్తున్న ఈ నిశ్శబ్ద వైఖరిపై కాంగ్రెస్ అగ్రనేత రాహుల్ గాంధీతో పాటు ఇండి కూటమి నేతలు తీవ్రస్థాయిలో ధ్వజమెత్తారు.
“శాంతియుతంగా జరుగుతున్న యువత, ప్రతిపక్షాల నిరసనలను చూసి మోదీ, అమిత్ షా ద్వయం తీవ్ర భయాందోళనలకు గురవుతోంది. అందుకే మీడియాను ఫేస్ చేయలేక ముఖం చాటేస్తున్నారు” అని విపక్షాలు ఆరోపిస్తున్నాయి. దేశంలో ఒక రకమైన భయానక వాతావరణాన్ని సృష్టించి, కేవలం జ్ఞానేశ్ కుమార్‌ను కాపాడటానికే కేంద్ర అగ్రనేతలు ప్రయత్నిస్తున్నారని, అందుకే వారు ప్రజలకు జవాబుదారీగా ఉండటం లేదని విమర్శిస్తున్నారు.
జ్ఞానేశ్ కుమార్ ఏకపక్షంగా, ఇతర కమిషనర్ల ప్రమేయం లేకుండా ‘ECINet’ సాఫ్ట్‌వేర్ ద్వారా ఓట్ల తొలగింపు నిర్ణయాలు తీసుకున్నారనే అంశంపై తోటి ఎలక్షన్ కమిషనర్లు సుఖ్‌బీర్ సింగ్ సంధూ, వివేక్ జోషిలు గత 10 నెలల్లో ఏకంగా 14 సార్లు లిఖితపూర్వకంగా అభ్యంతరాలు వ్యక్తం చేశారనే వార్తలు ఈ వివాదాన్ని మరింత పెంచాయి. ఈ నిర్ణయాత్మక ప్రక్రియను సవాలు చేస్తూ దాఖలైన పిటిషన్‌ను విచారించిన సుప్రీంకోర్టు.. కేంద్ర ప్రభుత్వంతో పాటు ఎలక్షన్ కమిషన్‌కు కూడా నోటీసులు జారీ చేసింది.
అత్యున్నత న్యాయస్థానం స్పందించి, దేశవ్యాప్తంగా ఆందోళనలు ఉధృతమవుతున్నా.. సీఈసీ గానీ, కేంద్ర పెద్దలు గానీ ప్రెస్ కాన్ఫరెన్స్ పెట్టకపోవడం వారి నైతిక ఓటమిని చూపిస్తోందని రాజకీయ విశ్లేషకులు అభిప్రాయపడుతున్నారు. మరోవైపు, దేశంలో ప్రజాస్వామ్య వ్యవస్థలను నిర్వీర్యం చేస్తున్న చీఫ్ ఎలక్షన్ కమిషనర్ జ్ఞానేశ్ కుమార్ తక్షణమే తన పదవికి రాజీనామా చేయాలని, తొలగించిన 13.5 కోట్ల ఓటర్ల పేర్లను వెంటనే పునరుద్ధరించాలని విపక్షాలు పట్టుబడుతున్నాయి. ఈ ‘ఓటు చోరీ’ వ్యవహారంపై స్వతంత్ర ఉన్నత స్థాయి విచారణ జరిపించాలని, అప్పటివరకు తాము వెనక్కి తగ్గేదే లేదని కాంగ్రెస్ అఖిల భారత కమిటీ స్పష్టం చేసింది. పాలకులు ఎంతకాలం మౌనంగా ఉన్నా, ప్రజల తరఫున న్యాయం జరిగే వరకు పార్లమెంట్ లోపలా, వెలుపలా తమ పోరాటం కొనసాగుతుందని లీడర్ ఆఫ్ అపోజిషన్ రాహుల్ గాంధీ హెచ్చరించారు.