ఆంధ్రప్రదేశ్‌లో మున్సిపల్ ఎన్నికల షెడ్యూల్ కౌంట్‌డౌన్ మొదలైన వేళ, గ్రేటర్ విశాఖపట్నం మున్సిపల్ కార్పొరేషన్ మేయర్ పీఠం చుట్టూ తిరుగుతున్న రాజకీయం ఒక్కసారిగా ఉత్కంఠభరితంగా మారింది. ఈసారి విశాఖ మేయర్ స్థానాన్ని జనరల్ మహిళ కేటగిరీకి రిజర్వ్ చేయడంతో ప్రధాన పార్టీల్లో అభ్యర్థుల వేట ముమ్మరమైంది. ఈ నేపథ్యంలో సోషల్ మీడియా వేదికగా సాగుతున్న పొలిటికల్ పోల్స్, విశ్వసనీయ వర్గాల సమాచారం ప్రకారం.. కూటమి తరఫున నందమూరి బాలకృష్ణ చిన్న కుమార్తె తేజస్విని మతుకుమిల్లి పేరు అనూహ్యంగా తెరపైకి రావడం ఏపీ రాజకీయాల్లో సంచలనంగా మారింది.
నందమూరి వారసురాలిగా, నటుడు, హిందూపూర్ ఎమ్మెల్యే నందమూరి బాలకృష్ణ ద్వితీయ కుమార్తెగా తేజస్వినికి నందమూరి అభిమానుల్లో, టీడీపీ శ్రేణుల్లో మంచి క్రేజ్ ఉంది. అంతేకాకుండా, ఆమె విశాఖపట్నం ప్రస్తుత తెలుగుదేశం పార్టీ ఎంపీ శ్రీభరత్ సతీమణి కావడంతో, గత సార్వత్రిక ఎన్నికల సమయం నుంచే విశాఖపట్నం పరిధిలోని భీమిలి లేదా ఇతర నియోజకవర్గాల నుంచి ఆమె భవిష్యత్తులో పోటీ చేస్తారనే ప్రచారం బలంగా సాగింది. అయితే, 2029 అసెంబ్లీ ఎన్నికల కంటే ముందే.. ఇప్పుడు రాబోయే మున్సిపల్ ఎన్నికల ద్వారానే ఆమెను నేరుగా విశాఖ మేయర్ అభ్యర్థిగా బరిలోకి దించి, ఒక పవర్‌ఫుల్ లీడర్‌గా ఎస్టాబ్లిష్ చేయాలని కూటమి పెద్దలు యోచిస్తున్నట్లు టాక్ నడుస్తోంది.
ఎపీలోనే క్రేజ్ ఉన్న కార్పొరేషన్ అయిన విశాఖపట్నం మేయర్ పదవి అంటే రాష్ట్ర రాజకీయాల్లో మంత్రి పదవితో సమానమైన హోదా, ప్రోటోకాల్ ఉంటుంది. ఒకవేళ తేజస్విని గనుక మేయర్ బరిలో నిలిస్తే.. నగరంలోని మహిళా ఓటర్లతో పాటు, గీతం విద్యాసంస్థల నెట్‌వర్క్, ఎంపీ శ్రీభరత్ అండ, బాలయ్య మాస్ ఇమేజ్ కూటమికి వంద శాతం ప్లస్ అవుతాయని విశ్లేషకులు భావిస్తున్నారు. గతంలో ఎన్నికల ప్రచారాల్లోనూ, మీడియా సమావేశాల్లోనూ తేజస్విని మాట్లాడిన తీరును బట్టి, ఆమెకు రాజకీయాలపై ఉన్న అవగాహన స్పష్టమైంది. ఈ క్రమంలోనే కూటమి నుంచి ఆమె పేరును దాదాపు పరిశీలిస్తున్నట్లు ఇంటర్నల్ టాక్ నడుస్తోంది.
మరోవైపు, ప్రతిపక్ష వైఎస్సార్ కాంగ్రెస్ పార్టీ కూడా విశాఖ పీఠాన్ని అంత సులభంగా వదులుకునేందుకు సిద్ధంగా లేదు. వైసీపీ తరఫున బలమైన మహిళా నేత, ప్రస్తుత ఎమ్మెల్సీ వరుదు కళ్యాణిని మేయర్ అభ్యర్థిగా రంగంలోకి దించేందుకు వైఎస్ జగన్ మోహన్ రెడ్డి మొగ్గు చూపుతున్నట్లు సమాచారం. ఒకవైపు సుదీర్ఘ రాజకీయ అనుభవం ఉన్న వరుదు కళ్యాణి, మరోవైపు నందమూరి వారసత్వంతో పాటు యువతలో క్రేజ్ ఉన్న తేజస్విని.. వీరిద్దరి మధ్య గనుక పోటీ ఖరారైతే, ఏపీ స్థానిక పోరులోనే విశాఖపట్నం మున్సిపల్ ఎన్నికలు అత్యంత ప్రతిష్టాత్మకమైన హై-ప్రొఫైల్ బ్యాటిల్‌గా మారడం ఖాయం. మరి ఈ ప్రచారానికి తగ్గట్టుగా కూటమి అధిష్టానం నుంచి తేజస్విని పేరుపై అధికారిక ముద్ర పడుతుందో లేదో చూడాలి.