Sunstroke: వేసవికాలం సమీపిస్తోంది, ఇప్పటికే పగటి ఉష్ణోగ్రతలు బాగా పెరిగాయి. ఎండాకాలంలో అధిక వేడి గాలులు, ఉష్ణోగ్రతల వల్ల వడదెబ్బ తగలడం, డీహైడ్రేషన్ కి లోనవ్వడం జరుగుతుంటాయి. సరైన సమయంలో తగు జాగ్రత్తలు వహించి చికిత్స తీసుకోకపోతే ప్రాణాపాయ స్థితి ఎదుర్కోవాల్సి వస్తుంది.
వేసవి కాలంలో ఎండ వేడిమి వల్ల శారీరక, నాడీ పరమైన వ్యాధి లక్షణాలు కనిపిస్తాయి. వేసవి కాలంలో అధిక ఉష్ణోగ్రతలలో తిరిగే వారి శరీరం లో జరిగే రసాయన చర్యల వల్ల శరీరం నుండి అధిక వేడి ఉత్పత్తి అవుతుంది. ఈ వేడి, మన శరీరాన్ని అధిక ఉష్ణోగ్రతల నుండి కాపాడగలిగే చర్మం ద్వారా చెమట రూపంలో బయటకు వస్తుంది. కొన్ని సందర్భాలలో శరీరం అధిక ఉష్ణోగ్రతలకు లోనైన, డీహైడ్రషన్ కు లోనూ అయినపుడు స్పృహ కోల్పోయే పరిస్థితులు ఎదురవుతాయి. దీనినే వడదెబ్బ (హీట్ స్ట్రోక్) అని అంటారు. వడదెబ్బకు గురైన వ్యక్తికి తక్షణ చికిత్స అందించాలి లేకపోతే అది ప్రాణాపాయ స్థితికి తీసుకు వెళ్లే అవకాశం ఉంటుంది.
వడ దెబ్బకు గురైన సందర్భాలలో శరీర చర్మం పొడి బారడం, అధిక శరీర ఉష్ణోగ్రత, తరచూ దాహం వేయడం వంటి లక్షణాలు ఉంటాయి. ఇవే కాకుండా వాంతులు, చిరాకు, స్పృహ కోల్పోవడం, గుండె వేగంగా కొట్టుకోవడం, నీరసం, గుండె దడ, ఆయాసం వంటి లక్షణాలు ఉంటాయి. వడదెబ్బకు గురైన వ్యక్తికి వెంటనే వస్త్రాలు తీసివేసి చల్లని నీటితో శరీరాన్ని బాగా తుడవాలి. ఆ వ్యక్తిని ఫ్యాన్ కింద పడుకోబెట్టి చల్లని గాలి అందేలా చూడాలి. శరీరంలో తక్షణ నీటి శాతం పెరిగేలా ఓరల్ రీహైడ్రేషన్ ద్రావణం, ఉప్పు కలిపిన మజ్జిగ లేదా గ్లూకోజు లాంటివి తాగించాలి. వీలైనంత త్వరగా డాక్టర్ దగ్గరకి తీసుకొని వెళ్ళాలి.
కొన్ని ముందు జాగ్రత్త చర్యల వల్ల వడ దెబ్బ తగలకుండా కాపాడుకోవచ్చు. వీలైనంత వరకు అధిక ఉష్ణోగ్రతలు ఉండే మధ్యాహ్న సమయంలో ఎండలో తిరగకుండా ఉండటం మంచిది. ఎండలో ఎక్కువగా తిరిగే వారు ఎక్కువగా చల్ల నీరు త్రాగాలి. ఎండలో పని చేసే వారు అప్పుడప్పుడు తగిన విశ్రాంతి తీసుకోవాలి. వేసవిలో తెల్లని పదునైన వస్త్రాలు ధరించాలి, ఇవి శరీరాన్ని ఎక్కువ వేడికి గురి కాకుండా కాపాడతాయి. వేసవిలో దప్పికను పెంచే మద్యం సేవించడం, బిరియాని లాంటివి తినడం తగ్గించుకోవాలి. మీరు నివాసం ఉండే ఇంటి చుట్టూ ఇంటి ఉష్ణోగ్రతలను తగ్గించుకునే మార్గం చూసుకోవాలి.