సోనూ సూద్ ఇప్పుడు ఎంతో మందికి దైవంతో సమానం. కొన్ని గ్రామాల్లో గుళ్లు కూడా కట్టేశారు. తమ షాపులకు సోనూ సూద్ పేర్లు పెట్టుకున్నారు. ఇంట్లో సోనూ సూద్ చిత్రపటాలకు పూజలు చేస్తుంటారు. దేవుడి ఫోటోలతో పాటు సోనూ సూద్ ఫోటోలను కూడా పెట్టేసి పూజలు చేస్తున్నారు. అలా సోనూ సూద్ ఇప్పుడు దేశమొత్తానికి ఆరాధ్యుడయ్యాడు. ఏ మూల చూసిన సోనూ సూద్ నామస్మరణే కనిపిస్తోంది.
దేశంలో కష్టాల్లో ఉన్న ప్రతీ ఒక్కరినీ సోనూ సూద్ ఆదుకుంటున్నారు. రోజుకు ఎక్కడో ఓ చోట సోనూ సూద్ సాయం చేస్తూనే ఉంటున్నాడు. ఎక్కడో ఏదో ఒక హాస్పిటల్‌లో ఎవరికో ఆపరేషన్ చేయిస్తుంటాడు. పిల్లలకు చదువులు చెప్పించడమో, ఊర్లో ఏదైనా వసతులు సమకూర్చడమే ఇలా ఏదో ఒకటి చేస్తూనే ఉంటాడు. తాజాగా సోనూ సూద్ మరోసారి తన గొప్ప మనసును చాటుకున్నాడు.
సోనూసూద్ ప్రస్తుతం ఆచార్య సినిమా షూట్‌లో బిజీగా ఉన్న సంగతి తెలిసిందే. ఆచార్య యూనిట్ కోసం పని చేస్తున్న పేద కార్మికులకు ప్రతీ ఒక్కరికి స్మార్ట్ ఫోన్‌ను గిఫ్ట్ ఇచ్చాడు. తాజాగా ఈ కార్యక్రమాన్ని సోనూ సూద్ ఆచార్య సెట్‌లోనే నిర్వహించాడు. అందరికీ స్మార్ట్ ఫోన్‌లు గిఫ్ట్‌గా ఇవ్వడంతో వారంతా ఆనందంలో మునిగితేలారు. ప్రస్తుతం ఈ ఫోటోలు సోషల్ మీడియాలో తెగ వైరల్ అవుతున్నాయి.