కొత్త ఏడాదిలో జనవరి 2న లాస్ వెగాస్ ట్రంప్ ఇంటర్నేషనల్ హోటల్ వద్ద సంభవించిన ఘోర పేలుడు అంతా కలవరపరిచింది. పార్క్ చేసిన టెస్లా సైబర్‌ట్రక్ లో ఒక్కసారిగా మంటలు చెలరేగి భారీ పేలుడు సంభవించింది. ఈ ఘటనలో ఒకరు ప్రాణాలు కోల్పోగా, మరో ఏడుగురు గాయపడ్డారు. పేలుడుతో హోటల్ చుట్టుపక్కల భయాందోళనలు నెలకొన్నాయి.
ఈ ఘటనపై టెస్లా సీఈఓ ఎలన్ మస్క్ వెంటనే స్పందించి, సైబర్‌ట్రక్ కారణంగా ఈ ప్రమాదం జరగలేదని స్పష్టంచేశారు. ఆయన ప్రకటన ప్రకారం, ఈ ఘటన ఉగ్రదాడిగా కనిపిస్తున్నప్పటికీ, దాడి చేసినవారు తమ టార్గెట్‌ను తప్పుగా ఎంచుకున్నారని అన్నారు. మస్క్ పేర్కొన్న ప్రకారం, ఈ పేలుడుకు సైబర్‌ట్రక్ సంబంధం లేదని, పేలుడు పదార్థాలు ట్రక్కులో ఉంచి ఉగ్రవాదులు దాడి జరిపారని భావిస్తున్నారు.
మస్క్ ట్విట్టర్ వేదికగా చేసిన వ్యాఖ్యల ప్రకారం, సైబర్‌ట్రక్ డిజైన్ పేలుడును నియంత్రించడంలో కీలక పాత్ర పోషించిందని, హోటల్ అద్దాలు కూడా పగలకుండా ఉండటం ట్రక్కు మన్నికను సూచిస్తోందని చెప్పారు. ఈ ఘటనకు న్యూ ఓర్లీన్స్‌లో జరిగిన మరో ఘటనకు సంబంధం ఉండవచ్చని, రెండు ఘటనల్లో ఉపయోగించిన వాహనాలు ఒకే రకాలుగా ఉన్నాయనే అనుమానం వ్యక్తం చేశారు.
పేలుడు తర్వాత జరిగిన దర్యాప్తు ద్వారా, సైబర్‌ట్రక్ కాకుండా, దాడిలో వేరే పేలుడు పదార్థాలు ఉపయోగించారని నిర్ధారణకు వచ్చారు. ఈ ఘటనపై ఇంకా విచారణ కొనసాగుతోంది. ఎలన్ మస్క్ వ్యాఖ్యలు సైబర్‌ట్రక్ భద్రతపై నమ్మకాన్ని పెంచుతూనే ఉగ్రవాదుల దాడులపై కొత్త చర్చకు దారితీస్తున్నాయి.