ఎలాన్ మస్క్ ఇప్పుడు రాజకీయ రంగం వైపూ మళ్లాడే సూచనలు కనిపిస్తున్నాయి. గతంలో ట్రంప్‌కు మద్దతుగా నిలిచిన ఆయన.. ఇప్పుడు మెల్లమెల్లగా స్వతంత్ర మార్గాన్ని ఎంచుకుంటున్నట్టు అభిప్రాయాలు వ్యక్తమవుతున్నాయి. ఇటీవల ఎక్స్‌ ప్లాట్‌ఫాంలో పెట్టిన ఓ పోలింగ్‌లో “అమెరికాలో 80 శాతం మందికి ప్రాతినిధ్యం వహించే కొత్త పార్టీ అవసరమా?” అనే ప్రశ్న ద్వారా మస్క్ స్పందన కొల్లగొట్టినట్టు భావిస్తున్నారు.
ఈ పోలింగ్‌కు 80 శాతం మంది అనుకూలంగా ఓటేయడం, వెంటనే మస్క్ “ది అమెరికా పార్టీ” పేరుతో ఓ పోస్టు షేర్ చేయడం రాజకీయ విశ్లేషకుల్లో ఉత్కంఠ రేపుతోంది. ట్రంప్ పట్ల విభేదాలు, ఆయన్ను తప్పుబట్టే విధంగా ఇటీవల మస్క్ చేసిన వ్యాఖ్యలు, ఇలా తాజా సంకేతాలతో చూస్తే… టెక్ మిలియనీర్లో రాజకీయ నాయకుడి అవతారానికి మలుపు తిరిగే సూచనలు స్పష్టంగా కనిపిస్తున్నాయి.
అయితే అధికారికంగా పార్టీ స్థాపనపై మస్క్ ఎటువంటి ప్రకటన చేయకపోయినా… తన ప్లాట్‌ఫాంలో ప్రజాభిప్రాయం తెలుసుకోవడం, తరచూ పాలనపై విమర్శలు చేయడం చూస్తుంటే, ఈ దిశలో అడుగులు వేయడం ఖాయం అనే అభిప్రాయాలు వినిపిస్తున్నాయి. అమెరికా రాజకీయాల్లో మూడో పార్టీగా నిలబడటమే గాక, టెక్నాలజీ ఆధారంగా పాలనలో మార్పులు తీసుకురావడమే లక్ష్యంగా ఉంటుందన్న ఊహాగానాలు చక్కర్లు కొడుతున్నాయి.
ప్రజల వేదన, సాంకేతికత పట్ల ఆసక్తి కలిగిన యువతను ఆకట్టుకునేలా మస్క్ నూతన రాజకీయ వేదికపై అడుగుపెడితే, అది అమెరికా రాజకీయ రంగాన్ని శాశ్వతంగా మార్చే సంచలనమైన పరిణామం కావొచ్చు. “ఇన్నేళ్లు వ్యాపార మార్గంలో విజయం సాధించిన మస్క్, ఇప్పుడు దేశ పాలన మార్గంలో ఏం చేస్తాడు?” అనే చర్చ దేశవ్యాప్తంగా ఊపందుకుంది.
