Winter: చలి పులి పంజా విసురుతుంది. చలిగాలుల తీవ్రత రోజు రోజుకి ఎక్కువ అవ్వడం వలన బయట జనం కూడా ఎక్కువ తిరగడం లేదు. మారుతున్న వాతావరణం వలన రాబోయే రోజుల్లో దేశంలోని ఉష్ణోగ్రతలు తగ్గి తీవ్రమైన చలిగాలులు వీస్తాయంటూ భారత వాతావరణ శాఖ హెచ్చరికలు జారీ చేసింది. అయితే, చల్లని వాతావరణ పరిస్థితులు తీవ్ర అనారోగ్య సమస్యలకి గురిచేస్తాయి. ఇలాంటి క్రమంలో శీతాకాలంలో ఎటువంటి ఆరోగ్య సమస్యలు తలెత్తుతాయి? మన ఆరోగ్యాన్ని ఎలా కాపాడుకోవాలి, ఎలా సురక్షితంగా ఉంచుకోవాలి అనే దాని గురించి తెలుసుకుందాం.
పొగమంచు అనేది చాలా డేంజర్. శీతాకాలంలో అనేక ఆరోగ్యపరమైన సమస్యలు తలెత్తుతుంటాయి. ఊపిరితిత్తుల సంబంధిత వ్యాధి నుండి బాధపడేవారు చాలా జాగ్రత్తలు ఇటువంటి సమయాల్లో ఎక్కువగా తీసుకోవాలి. జలుబు, ముక్కు దిబ్బడ, ముక్కు కారడం, చర్మ సంబంధమైన సమస్యలు వేధిస్తుంటాయి. ఎక్కువ సమయం పాటు చలిలో తిరగడం వలన శరీరం మొద్దుబారిపోతుంది. శ్వాస సమబంధమయిన వ్యాధులు ఉంటే చలిలో అసలు తిరగకూడదు అని వైద్యులు సూచిస్తున్నారు.
అయితే శీతాకాలంలో శరీరంని కాపాడేందుకు కొన్ని చిట్కాలు, ఆరోగ్య సూత్రాలు తప్పక పాటించాలి..చర్మం పొడిబారకుండా ఉండేందుకు చర్మానికి మయిశ్చరైజర్ రాస్తూ ఎప్పటికప్పుడు తేమగా ఉంచుకోవాలి. అంతేకాకుండా విన్తమిన్ ‘సి’ పుష్కలంగా లభించే పండు, కూరగాయలను తినాలి. అప్పుడే శరీరానికి అవసరమయిన పోషకాలు లభిస్తాయి. మంచి ఆహార పానీయాలు తీసుకోవడం వలన శరీరం లో వ్యాధి నిరోధక శక్తి అనేది పెరుగుతుందని వైద్యులు చెబుతున్నారు.
చలికాలంలో తీసుకునే ఆహరం ద్వారా, తాగే నీరు ద్వారా అంటువ్యాధులు ప్రబలే ప్రమాదం ఉంది. కాబట్టి, ఆహరం వేడిగా ఉన్నప్పుడే తినాలి. గోరువెచ్చని నీటిని తాగడం ఆరోగ్యానికి మంచిది. వ్యాధి నిరోధక శక్తి తక్కువ ఉన్నవారు, కాన్సర్ వ్యాధి గ్రస్తులు, మధుమేహం ఇతర దీర్ఘకాలిక సమస్యలు ఉన్నవారు చలిలో ఎక్కువ తిరిగితే ఇన్ఫెక్షన్స్ బారిన పడే ప్రమాదం ఉంది. కాబట్టి ఆరోగ్యపరంగా చాలా జాగ్రత్తలు తీసుకోవాలి.
పొగమంచు ఎక్కువ కాబట్టి ఉదయం నడకకి వెళ్లేవారు చాలా జాగ్రత్తకుండా ఉండాలి. లేకపోతే శ్వాస సంబంధమయిన వ్యాధుల బారిన పడే అవకాశాలు ఎక్కువగా ఉంటాయి. కాబట్టి సాయంత్రపు వేళల్లో వ్యాయామాలు చేసుకుంటే ఉత్తమం.
ఇంట్లో హీటర్లు వాడేవారు చాలా అప్రమత్తంగా ఉండాలి. ఎందుకంటే వాటినుండి వెలువడే విషపూరితమయిన గ్యాస్ లు ఆరోగ్యానికి హాని చేస్తాయి. వాటిద్వారా వచ్చే గ్యాస్ పోయేందుకు తలుపులు తీసి వెలుతురు వచ్చేలా చూసుకోవాలి. ఇలా కొన్ని జాగ్రత్తలు తీసుకుంటే జబ్బుల బారిపడకుండా మనల్ని మనం కాపాడుకోవచ్చు.