మెనోపాజ్ కు ముందు, ఋతుచక్రంలో మార్పులు, వేడి ఆవిర్లు, రాత్రిపూట చెమటలు, నిద్రలేమి, మూడ్ స్వింగ్స్, యోని పొడిబారడం, లైంగిక కోరిక తగ్గడం, బరువు పెరగడం వంటి లక్షణాలు కనిపిస్తాయి. వీటినే పెరిమెనోపాజ్ లక్షణాలు అంటారు. పీరియడ్స్ మధ్య సమయం పెరగడం లేదా తగ్గడం, పీరియడ్స్ ఎక్కువ రోజులు లేదా తక్కువ రోజులు రావడం, పీరియడ్స్ సమయంలో బరువుగా లేదా తేలికగా ఉండటం వంటివి గమనించవచ్చు.
శరీరంలో వేడి పెరిగి, చర్మం ఎర్రబడటం, ముఖం, మెడ, ఛాతీ ప్రాంతాలలో వేడి ఆవిర్లు రావడం వంటివి గమనించవచ్చు. రాత్రిళ్ళు విపరీతంగా చెమటలు పట్టడం కూడా మెనోపాజ్ లక్షణం అని చెప్పడంలో సందేహం అవసరం లేదు. నిద్రపట్టకపోవడం లేదా మధ్యలో మెలకువలు రావడం వంటివి కూడా ఈ లక్షణాలలో ఉండవచ్చు. భావోద్వేగాలలో మార్పులు, చిరాకు, కోపం, ఆందోళన వంటివి మెనోపాజ్ సమయంలో గమనించవచ్చు.
యోని ప్రాంతం పొడిబారడం, దురద, నొప్పి లేదా అసౌకర్యం వంటివి ఉండవచ్చు. లైంగిక కోరిక తగ్గడం లేదా శృంగారంలో అసౌకర్యం కలగడం వంటి లక్షణాలు సైతం కనిపిస్తాయి. శరీరంలో హార్మోన్ల మార్పుల కారణంగా బరువు పెరగడం లేదా కొవ్వు పేరుకుపోవడం వంటివి జరగవచ్చు. జుట్టు రాలడం లేదా పల్చబడటం వంటివి కూడా గమనించవచ్చు. కొన్నిసార్లు జ్ఞాపకశక్తి తగ్గడం, ఏకాగ్రత లోపించడం వంటివి కూడా గమనించవచ్చు.
మూత్ర విసర్జనలో ఇబ్బందులు, తరచుగా మూత్ర విసర్జనకు వెళ్లాల్సి రావడం వంటివి ఉండవచ్చు. ఈ లక్షణాలలో ఏ లక్షణం కనిపించినా కొన్ని జాగ్రత్తలు తీసుకోవడం ద్వారా సమస్యలను అధిగమించవచ్చు. కొంతమందికి 40 సంవత్సరాల వయస్సులోపే ఈ తరహా సమస్యలు కనిపించవచ్చు.