అమెరికాలో స్థిరపడాలని కలలు కనే ప్రతి ఒక్కరికీ గ్రీన్ కార్డు ఒక ప్రధాన లక్ష్యంగా ఉంటుంది. ఇది లభిస్తే, శాశ్వత నివాస హక్కు వస్తుందని భావిస్తారు. అయితే, అమెరికా ఉపాధ్యక్షుడు జేడీ వాన్స్ తాజాగా చేసిన వ్యాఖ్యలు ఈ నమ్మకాన్ని కుదిపేశాయి. గ్రీన్ కార్డు పొందినంత మాత్రాన ఎల్లకాలం అమెరికాలో నివసించే హక్కు కలిగినట్టు కాదని, ఇది దేశ భద్రతకు సంబంధించి పరిశీలన చేయాల్సిన అంశమని ఆయన స్పష్టంగా తెలిపారు.
అమెరికా పౌరసత్వాన్ని ఎవరికివ్వాలనే విషయంలో అమెరికన్లు తామే నిర్ణయం తీసుకుంటారని వాన్స్ పేర్కొన్నారు. గ్రీన్ కార్డు కలిగి ఉన్నవారు కొన్ని ప్రత్యేక కారణాల వల్ల తమ హోదాను కోల్పోయే అవకాశం కూడా ఉందని గుర్తు చేశారు. ముఖ్యంగా, అమెరికా చట్టాల ప్రకారం, గ్రీన్ కార్డు దారులు దేశంలో సుదీర్ఘకాలం లేకపోయినా, నేరాలకు పాల్పడినా, వలస నిబంధనలు ఉల్లంఘించినా, వారి గ్రీన్ కార్డును రద్దు చేసే హక్కు ప్రభుత్వం వద్ద ఉందని ఆయన తెలిపారు.
ఇటీవల అమెరికాలో వలస విధానాలు కఠినతరమవుతున్నాయి. గ్రీన్ కార్డు దారులకు పౌరసత్వం ఇచ్చే ప్రక్రియను మరింత కఠినతరం చేయాలని డిమాండ్లు పెరుగుతున్నాయి. వలసదారుల వ్యవహారంపై అమెరికా ప్రభుత్వ నియంత్రణను పెంచాలని కొన్ని వర్గాలు అంటుండగా, మరికొందరు మాత్రం ఈ విధానాలను ప్రజాస్వామ్య విలువలకు వ్యతిరేకంగా చూస్తున్నారు. ఈ నేపథ్యంలో, అమెరికాలో స్థిరపడాలని ఆశించే భారతీయులు, ఇతర విదేశీయులు కొత్త చట్టాలను, మారుతున్న పరిస్థితులను బాగా అర్థం చేసుకోవడం అవసరం. గ్రీన్ కార్డు ఉంటేనే భద్రతగా భావించే వారు, మారుతున్న వలస విధానాల గురించి అప్రమత్తంగా ఉండాల్సిన అవసరం ఉంది.