ఏప్రిల్ 22న పహల్గామ్‌లో జరిగిన దారుణ ఉగ్రదాడికి భారత్ గట్టి ప్రతీకారం తీర్చుకుందని ప్రధాని నరేంద్ర మోదీ వెల్లడించారు. రాజస్థాన్‌లో బికనీర్‌లో జరిగిన బహిరంగ సభలో ఆయన ఈ ప్రకటన చేశారు. మే 7న చేపట్టిన ‘ఆపరేషన్ సిందూర్’ ద్వారా పాకిస్థాన్, పాక్ ఆక్రమిత కశ్మీర్‌లోని ఉగ్ర స్థావరాలను 22 నిమిషాల్లో నేలమట్టం చేశామని తెలిపారు.
ఈ ఆపరేషన్‌లో జైషే మహమ్మద్, లష్కరే తోయిబా, హిజ్బుల్ ముజాహిదీన్ వంటి గుంపులకు చెందిన తొమ్మిది కీలక స్థావరాలు ధ్వంసమయ్యాయని, సుమారు 100 మంది ఉగ్రవాదులు హతమయ్యారని మోదీ తెలిపారు. “పహల్గామ్ ఘటన 140 కోట్ల మంది భారతీయుల గుండెల్లో బాధగా నిలిచింది. కానీ మేము దెబ్బ తీశాం. నా రక్తంలో సిందూరం పటాసులా ఉరుకుతుంది” అంటూ ఎమోషనల్‌గా మాట్లాడారు.
ప్రభుత్వం సైన్యానికి పూర్తి స్వేచ్ఛనిచ్చిందని, సాయుధ దళాలు పాక్‌ను కుదిపేశాయని మోదీ స్పష్టం చేశారు. ఈ పర్యటనలో ప్రధాని బికనీర్‌లో దేష్నోక్ రైల్వే స్టేషన్ పునరుద్ధరణను ప్రారంభించారు. బికనీర్-ముంబై ఎక్స్‌ప్రెస్‌కు జెండా ఊపారు. తర్వాత కర్ణిమాత ఆలయంలో ప్రత్యేక పూజలు నిర్వహించి, విద్యార్థులతో సంభాషించారు. పహల్గామ్ ఘటనకు భారత్ ఇచ్చిన సమాధానం ఇప్పుడు దేశవ్యాప్తంగా చర్చనీయాంశంగా మారింది.