భారత పారిశ్రామిక రంగం దిగ్గజంగా పేరు తెచ్చుకున్న రతన్ టాటా చివరి వీలునామా చుట్టూ ఆసక్తికర పరిణామాలు చెలరేగుతున్నాయి. ఆయన సన్నిహితుడైన మోహినీ మోహన్ దత్తాకు రూ.588 కోట్ల మేర ఆస్తిని కేటాయించినట్టు సమాచారం. అయితే దత్తా మొదట్లో తమ వాటాలో స్పష్టత లేదంటూ అసంతృప్తి వ్యక్తం చేయగా, చివరకు ఆయన అంగీకారం తెలపడంతో ధృవీకరణ ప్రక్రియకు మార్గం సుగమమైంది.
ఈ విషయం బాంబే హైకోర్టులో ప్రొబేట్ దాఖలుతో మరింత ప్రాధాన్యం సంతరించుకుంది. రతన్ టాటా వీలునామాలో మొత్తం 20 మందికిపైగా లబ్ధిదారులుండగా, దత్తానే కుటుంబం వెలుపల అతి పెద్ద వాటా పొందారు. అయితే ‘నో-కాంటెస్ట్ క్లాజ్’ కారణంగా ఆయన అధికారికంగా సవాలు చేయలేని పరిస్థితి నెలకొంది. దత్తా కోరిక మేరకు తమకు లభించిన వస్తువులను పరిశీలించేందుకు టాటా నివాసంలో ప్రవేశం కోరినా, ఎగ్జిక్యూటర్లు అంగీకరించలేదు.
ప్రస్తుతం వ్యక్తిగత వస్తువులన్నీ వారే నియంత్రిస్తున్నారు. అయినా సదరు క్లాజ్ ఉల్లంఘించకూడదనే మంటూ దత్తా చివరకు తమ అంగీకారాన్ని తెలియజేశారు. దీనితో వీలునామా చట్టబద్ధతను హైకోర్టు పరిశీలించే ప్రక్రియ వేగం పుంజుకుంది. రతన్ టాటాతో దత్తాకు గల అనుబంధం 60 ఏళ్లకు పైగా సాగినది. 13 ఏళ్ల వయసులో జంషెడ్‌పూర్‌లో టాటాను కలిసిన దత్తా, ముంబైకి మారి ఆయన సాన్నిధ్యంలో తమ వృత్తి జీవితాన్ని చక్కదిద్దుకున్నారు.
తాజ్ గ్రూప్ హోటళ్లలో అత్యంత కీలక భూమిక వహించడంతోపాటు, ట్రావెల్ వ్యాపార విభాగంలో కీలక బాధ్యతలు నిర్వర్తించారు. ఇక చివరగా, టాటా వీలునామాలోని ‘ఇన్ టెర్రోరమ్ క్లాజ్’ చర్చనీయాంశంగా మారింది. దీని వల్ల లబ్ధిదారులు కోర్టు ధర్మాన్ని ఆశ్రయించకుండా నిర్ణయాలను అంగీకరించాల్సిన పరిస్థితి నెలకొంటోంది. ఎలాంటి జటిలతలు లేకుండా ధృవీకరణ దశ ముగిస్తే, దత్తా తన వాటాను సొంతం చేసుకునే మార్గం స్పష్టమవుతుంది.