అసెంబ్లీ ఎన్నికల్లో స్ట్రైక్ రేట్ పేరుతో హడావుడి చేసిన జనసేనాని పవన్ కళ్యాణ్, ఇప్పుడు స్థానిక సంస్థల ఎన్నికల వేళ మిత్రపక్షమైన బీజేపీని ఉక్కిరిబిక్కిరి చేస్తున్నట్లు సమాచారం అందుతోంది. మున్సిపల్ ఎన్నికల సీట్ల సర్దుబాటుపై సీఎం చంద్రబాబుతో జరిగిన సుదీర్ఘ చర్చల్లో పవన్ కళ్యాణ్ సరికొత్త లొల్లిని తెరపైకి తెచ్చినట్లు తెలుస్తోంది. ఎన్నికల పొత్తులో భాగంగా బీజేపీ పోటీ చేయాలని భావిస్తున్న కొన్ని కీలక స్థానాలను జనసేన ఖాతాలోకి బదలాయించాలని పవన్ గట్టిగా పట్టుబడుతున్నారనే టాక్ నడుస్తోంది.
పొలిటికల్ సర్కిల్స్ లో బలంగా వినిపిస్తున్న సమాచారం ప్రకారం.. రాష్ట్రంలో బీజేపీకి ఆశించిన స్థాయిలో గ్రౌండ్ లెవెల్ క్యాడర్ గానీ, ఓటు బ్యాంక్ గానీ లేవనే వాదనను పవన్ కళ్యాణ్.. చంద్రబాబు ముందు ఉంచినట్లు తెలుస్తోంది. బీజేపీకి సీట్లు కేటాయిస్తే అక్కడ కూటమి ఓడిపోయే ప్రమాదం ఉందని, కాబట్టి కమలం పార్టీ తన వాటాను తగ్గించుకోవాలని ఆయన ప్రతిపాదించినట్లు సమాచారం. బీజేపీకి బలం లేని చోట్ల ఆ స్థానాలను జనసేనకు ఇస్తే, తాము తమ క్యాడర్ బలంతో క్లీన్ స్వీప్ చేస్తామని పవన్ గట్టిగా వాదించినట్లు టాక్.
మిత్రపక్షమని కూడా చూడకుండా, గ్రౌండ్ లెవెల్ బలాన్ని కించపరిచేలా జనసేన వ్యవహరిస్తున్న తీరుపై బీజేపీ స్టేట్ లీడర్షిప్ తీవ్ర ఆగ్రహంతో ఉన్నట్లు తెలుస్తోంది. తన స్థానాలను లాక్కోవడానికి పవన్ కళ్యాణ్ కుట్రలు పన్నుతున్నారనే విషయం బయటకు రావడంతో ఢిల్లీ మరియు ఏపీ బీజేపీ నేతలు తీవ్రంగా స్పందిస్తున్నట్లు సమాచారం. అసెంబ్లీ ఎన్నికల్లో కేవలం 21 స్థానాలకే పరిమితమైన జనసేన.. ఇప్పుడు మున్సిపల్ ఎన్నికల్లో తమ సీట్లను కూడా లాక్కోవాలని చూడటం పైపైకి కనిపించే స్నేహానికి పాతర వేయడమేనని కమలనాథులు మండిపడుతున్నారు.
తమకు ఎక్కడ బలం ఉందో లేదో డిసైడ్ చేయడానికి పవన్ కళ్యాణ్ ఎవరంటూ అంతర్గత సమావేశాల్లో బీజేపీ నేతలు తీవ్రస్థాయిలో ధ్వజమెత్తుతున్నారు. ఇలా ఒకవైపు టీడీపీకి పట్టున్న స్థానాలను అడుగుతూ, మరోవైపు బీజేపీ సీట్లను సైతం తగ్గించాలని పవన్ కళ్యాణ్ పట్టుబడుతుండటంతో ముఖ్యమంత్రి చంద్రబాబు నాయుడు గందరగోళంలో పడ్డారు. అటు జనసేనను సంతృప్తి పరచలేక, ఇటు కేంద్రంలో అధికారంలో ఉన్న బీజేపీని నొచ్చుకోలేక చంద్రబాబు ఈ సీట్ల లొల్లిని సమన్వయ కమిటీకి నెట్టేసినట్లు తెలుస్తోంది. సంక్షేమాన్ని, ప్రజలను పక్కన పెట్టేసి, కేవలం సీట్ల పెంపు, మేయర్ పదవుల కోసం కూటమి పార్టీలు ఇలా అంతర్గత కుమ్ములాటలకు దిగడంపై ప్రజల్లో తీవ్ర వ్యతిరేకత వ్యక్తమవుతోంది. జనసేనాని అగ్రెసివ్ మైండ్ గేమ్ మరియు బీజేపీ కోపం మున్సిపల్ ఎన్నికల నాటికి కూటమిలో ఎలాంటి భారీ చీలికకు దారితీస్తుందో వేచి చూడాలి.