ఆంధ్రప్రదేశ్ రాజకీయాల్లో గత కొన్ని రోజులుగా తెలుగుదేశం – జనసేన కూటమి అంతర్గత సమీకరణాలపై రకరకాల చర్చలు, ఊహాగానాలు సాగుతున్నాయి. ఇటీవల కూటమిలో కొన్ని పరిణామాలు, అలాగే ఇటీవల డిప్యూటి సీఎం పవన్ కేబినేట్ భేటీలకు హాజరుకాకపోవడం వంటి సందర్భాలను చూపిస్తూ.. పవన్ కళ్యాణ్, మంత్రి నారా లోకేష్ మధ్య ఏవో తేడాలు ఉన్నాయంటూ సామాజిక మాధ్యమాల్లో పెద్ద ఎత్తున ప్రచారం జరిగింది. అయితే, తాజాగా అమరావతిలోని ముఖ్యమంత్రి చంద్రబాబు నాయుడు నివాసంలో జరిగిన ఒక కీలక భేటీ.. ఈ ప్రచారాలన్నింటికీ పూర్తిగా తెరదించేసింది.
రాబోయే స్థానిక సంస్థల ఎన్నికల వ్యూహ రచన కోసం పవన్ కళ్యాణ్, చంద్రబాబు నివాసానికి విచ్చేశారు. ఈ సందర్భంగా పవన్ కళ్యాణ్, నారా లోకేష్ ఇద్దరూ ఎంతో ఆత్మీయంగా, చిరునవ్వుతో ఒకరినొకరు పలకరించుకుంటూ ఒకే ఫ్రేమ్‌లో కనిపించారు. ఇద్దరు నేతలు ఎంతో క్లోజ్ గా నడుచుకుంటూ వస్తున్న దృశ్యాలు చూస్తుంటే, వారి మధ్య ఎలాంటి విభేదాలూ లేవని, ఇరు పార్టీల మధ్య సమన్వయం అత్యంత పటిష్టంగా ఉందనే సంకేతాలు స్పష్టంగా కనిపిస్తున్నాయని రెండు పార్టీల కార్యకర్తలు సోషల్ మీడియాలో పండుగ చేసుకుంటున్నారు.
దాదాపు రెండు గంటల పాటు సాగిన ఈ ఉన్నత స్థాయి సమావేశంలో క్షేత్రస్థాయిలో పార్టీల మధ్య మరింత సమన్వయం పెంచడంపై చర్చించారు. సీట్ల సర్దుబాటు, సమన్వయ కమిటీల ఏర్పాటు, మిత్రపక్షాల బలాబలాల ఆధారంగా ముందుకు వెళ్లడంపై నేతలు సుదీర్ఘంగా ఆలోచించారు. రాజకీయ సమీకరణాల్లో భాగంగా చర్చలు, అభిప్రాయాల మార్పిడి సహజమని.. అంతిమంగా కూటమి ఐక్యత మరియు రాష్ట్ర ప్రయోజనాలే తమ ప్రథమ ప్రాధాన్యతని నేతల వ్యవహారశైలి స్పష్టం చేస్తోంది. తాజా భేటీతో కూటమి శ్రేణుల్లో సరికొత్త ఉత్సాహం నెలకొంది.