ఫార్ములా ఈ-కార్ రేస్ కేసు పరిణామాల నేపథ్యంలో తన పాస్‌పోర్టును కోర్టు జప్తు చేసిందంటూ ఈనాడు ప్రచురించిన కథనంపై బీఆర్ఎస్ వర్కింగ్ ప్రెసిడెంట్, మాజీ మంత్రి కేటిఆర్ ఆగ్రహం వ్యక్తం చేశారు. కనీస వాస్తవాలను నిర్ధారించుకోకుండా, పూర్తిగా రాజకీయ కక్షతో తప్పుడు వార్తలను వండటం శోచనీయమని ఆయన మండిపడ్డారు. ఈ మేరకు తన సుప్రసిద్ధ సుప్రీంకోర్టు న్యాయవాది ద్వారా ఈనాడు ఎడిటర్, పబ్లిషర్, సదరు రిపోర్టర్‌కు కేటీఆర్ లీగల్ నోటీసులు పంపారు.
50 ఏళ్లకు పైగా సుదీర్ఘ చరిత్ర కలిగిన ఒక ప్రముఖ దినపత్రిక ఇంత బాధ్యతారాహిత్యంగా వ్యవహరించడంపై ఆయన తీవ్ర అభ్యంతరం వ్యక్తం చేశారు. అసలు విషయానికి వస్తే, ఫార్ములా ఈ-రేస్ కేసును దర్యాప్తు చేస్తున్న ఏసీబీ అధికారులు కేటీఆర్ పాస్‌పోర్టుపై తగిన ఉత్తర్వులు ఇవ్వాలని కోరుతూ ఏసీబీ ప్రత్యేక కోర్టులో కేవలం ఒక ప్రాథమిక మెమో మాత్రమే దాఖలు చేశారు. ఈ పిటిషన్‌పై కోర్టు ఇంకా ఎలాంటి తుది నిర్ణయం తీసుకోలేదు, అలాగే ఎలాంటి నోటీసులు గానీ, జప్తు ఉత్తర్వులు గానీ జారీ చేయలేదు.
కేవలం రీజినల్ పాస్‌పోర్ట్ కార్యాలయం నుంచి వివరణ ఇవ్వాలంటూ ఒక సాధారణ షోకాజ్ నోటీస్ మాత్రమే రాగా.. ఏసీబీ కోర్టు అప్పుడే కేటీఆర్ పాస్‌పోర్టును జప్తు చేయాలని ఆదేశాలు జారీ చేసిందంటూ ‘ఈనాడు’ పత్రిక ఒక కల్పిత కథనాన్ని వండి వార్చిందని బీఆర్ఎస్ నేతలు మండిపడుతున్నారు. ఇది పాఠకులను, ప్రజలను తీవ్రంగా తప్పుదారి పట్టించడమేనని కేటీఆర్ న్యాయవాది నోటీసుల్లో స్పష్టం చేశారు.
తాము ప్రచురించిన తప్పుడు వార్తను పత్రికతో పాటు వారి అన్ని సోషల్ మీడియా మాధ్యమాలు, వెబ్‌సైట్, డిజిటల్ ఆర్కైవ్స్ నుండి వెంటనే పూర్తిగా ఉపసంహరించుకోవాలని స్పష్టం చేశారు. అలాగే, గతంలో తప్పుడు వార్తను ఎంత ప్రముఖంగా ప్రచురించారో, అంతే ప్రాధాన్యతతో సదరు తప్పును సరిదిద్దుతూ వివరణ ఇవ్వడంతో పాటు, తమ తప్పుడు కథనానికి గానూ బేషరతుగా క్షమాపణ చెప్పాలని డిమాండ్ చేశారు. ఒకవేళ నిర్ణీత గడువులోగా ఈ చర్యలు తీసుకోకపోతే ‘ఈనాడు’ యాజమాన్యంపై సివిల్ మరియు క్రిమినల్ పరువు నష్టం దావాలు వేయడంతో పాటు ప్రెస్ కౌన్సిల్ ఆఫ్ ఇండియాని ఆశ్రయిస్తామని కేటీఆర్ లీగల్ నోటీసుల్లో గట్టి హెచ్చరికలు జారీ చేశారు.