మాంచెస్టర్ వేదికగా అభిమానులను ఉత్కంఠకు గురిచేసిన నాలుగో టెస్ట్ మ్యాచ్ చివరకు డ్రాగా ముగిసింది. ఓవైపు ఇంగ్లాండ్ విజయం ఖాయం అనుకున్న స్థితిలో భారత ఆటగాళ్లు అసాధారణ పోరాటంతో మ్యాచ్ను కాపాడారు. రవీంద్ర జడేజా, వాషింగ్టన్ సుందర్ చివరి రోజు అసాధారణ ఆటతో.. నిలబడి మ్యాచ్ను ఓటమి నుండి బయటపడేశారు.
ఆఖరి రోజు ఆటను 2 వికెట్ల నష్టానికి 174 పరుగుల వద్ద ప్రారంభించిన భారత్, తొలి అరగంట రక్షణాత్మకంగా ఆడింది. గిల్ – రాహుల్ జోడీ మరోసారి నిశ్చలతతో ఎదురొంది ఇంగ్లాండ్ బౌలర్లకు చుక్కలు చూపించింది. అయితే, ఈ జోడీని బ్రేక్ చేసిన వ్యక్తి స్టోక్స్. రాహుల్ను 90 పరుగుల వ్యక్తిగత స్కోర్ వద్ద ఇన్స్వింగ్ డెలివరీతో ఎల్బీడబ్ల్యూగా ఔట్ చేయడంతో భారత్ మూడో వికెట్ కోల్పోయింది. ఆ తరువాత గిల్ను జోఫ్రా ఆర్చర్ ఔట్ చేయడంతో.. భారత్ పని అయిపోతుందని అంతా అనుకున్నారు.
అయితే చివరి సెషన్లో మాత్రం మ్యాచ్ మూడో మలుపు తిరిగింది. 4 వికెట్లకు 222 పరుగుల వద్ద జడేజా, సుందర్ క్రీజులోకి వచ్చారు. వీరిద్దరూ నిశ్చింతగా ఆడుతూనే స్కోరు బోర్డును ముందుకు నడిపించారు. అప్పటిదాకా డిఫెన్స్కే పరిమితమైన భారత్ ఆట ఒక్కసారిగా దూకుడుగా మారింది. టీ విరామానికి ముందు ఇద్దరూ హాఫ్ సెంచరీలు పూర్తిచేశారు.
చివరి సెషన్ లో జడేజా తన ఆటను మరింత గేర్ పెంచి, వేగంగా పరుగులు చేసి సెంచరీ నమోదు చేశాడు. సుందర్ కూడా తన వైపు నుంచి జట్టు స్థిరత్వాన్ని నిలబెట్టాడు. ఇంగ్లాండ్ బౌలర్లు ఎన్నో ప్రయత్నాలు చేసినా వీరిద్దరి జోడీని విడగొట్టలేకపోయారు. ఆట ముగిసే సమయానికి భారత్ 4 వికెట్ల నష్టానికి 425 పరుగులు చేసింది. ఫలితంగా, మ్యాచ్ డ్రా కాగా, ఇంగ్లాండ్ 2-1 ఆధిక్యంలో నిలిచింది.
ఈ మ్యాచ్లో తొలి ఇన్నింగ్స్లో భారత్ 358 పరుగులకు ఆలౌటవగా, ఇంగ్లాండ్ 669 పరుగుల భారీ స్కోరు చేసి గట్టి ఆధిక్యం సాధించింది. రెండో ఇన్నింగ్స్లో భారత బ్యాటర్లు పునరుజ్జీవనం సాధించి 311 పరుగుల వెనుకతనాన్ని డిఫెన్స్తో తిరగరాసారు. ఈ పోరాటంలో గిల్ (103), రాహుల్ (90) వంటి టాప్ ఆర్డర్ ఆటగాళ్లతో పాటు, లోయర్ ఆర్డర్ నుంచి జడేజా (107), సుందర్ (101) అద్భుత ఇన్నింగ్స్లు భారత్ను ఓటమి అంచుల నుంచి బయటపడేశాయి. మరోవైపు, చివరి టెస్ట్ జూలై 31న ఓవల్ వేదికగా జరగనుంది. ఆ మ్యాచ్లో గెలుపే లక్ష్యంగా భారత్ బరిలోకి దిగనుంది.