మనిషి శరీరంలో రక్తం, కణజాలం, ఎముకలు ఉన్నాయనేది అందరికీ తెలిసిందే. కానీ శరీరంలో బంగారం కూడా ఉందని వింటే ఒక్కసారిగా నమ్మశక్యంగా అనిపించదు. అయితే ఇది నిజమే. శాస్త్రవేత్తల లెక్కల ప్రకారం ప్రతి మానవ శరీరంలో సూక్ష్మ పరిమాణంలో బంగారం ఉంటుందంట. అది సుమారు 0.2 మిల్లీగ్రాములు మాత్రమే అయినా, ఈ సమాచారం వినగానే మనలో ఒక విచిత్రమైన ఆలోచన కలుగుతుంది..మన శరీరం కేవలం మాంసం, రక్తం కాదు, అంతరిక్షం నుండి వచ్చిన అపురూప ఖనిజాల సమ్మేళనమని తెలిస్తే షాక్ అవుతారు.
ఈ బంగారం మన శరీరంలో పుట్టినదే కాదు. లక్షల కోట్ల ఏళ్ల క్రితం ఆకాశంలో జరిగిన మహా నక్షత్ర విస్ఫోటనాల సమయంలో ఏర్పడిన బంగారం, విశ్వంలోకి విస్తరించి, చివరికి భూమిపై పడింది. అక్కడి నుంచి మట్టిలో, నీటిలో, చెట్లలో కలిసింది. మనం తినే ఆహారం, తాగే నీటితో ఆ బంగారం రక్తంలోకి ప్రవేశించింది. అంటే మనలోని బంగారం అసలు మూలం అంతరిక్షం అని చెప్పాలి.
శరీరంలో ఉండే బంగారం ప్రత్యేకంగా రక్తంలో, కాలేయం, మస్తిష్కం, మూత్రపిండాల్లో అణు స్థాయిలో కరిగి ఉంటుంది. ఈ బంగారం మన ఆరోగ్యానికి ఐరన్, కాల్షియం లాంటి ఖనిజాల్లా అవసరమైనది కాదు. కానీ ఇది శరీరంలో ప్రకృతి యొక్క ఒక గుర్తుగా నిలుస్తుంది. ఆశ్చర్యకరమైన విషయం ఏమిటంటే, వైద్యరంగంలో కొన్ని రకాల చికిత్సలకు బంగారంతో తయారు చేసిన ఔషధాలను వాడుతున్నారు. ముఖ్యంగా రుమటాయిడ్ ఆర్థరైటిస్, క్యాన్సర్ వంటి వ్యాధుల పరిశోధనల్లో బంగారం ఆధారిత సమ్మేళనాలు ఉపయోగపడుతున్నాయి.
మన శరీరంలో ఉన్న 0.2 మిల్లీగ్రాముల బంగారానికి డబ్బుతో కొలిచే విలువ ఉండకపోవచ్చు. కానీ అది మనం ఈ విశ్వంతో అనుబంధమై ఉన్నామనే గాఢమైన సంకేతం. ఒక చిన్న చుక్క బంగారం మనలో దాగి ఉండటం ద్వారా మనం కేవలం భూమిపైనే కాదు, ఆకాశం నుంచే పుట్టినవాళ్లమని గుర్తు చేస్తుంది. ఈ నిజం తెలుసుకున్నాక మనిషి విలువ కేవలం ఆస్తులు, ఆభరణాలతో కాదు ప్రకృతి, విశ్వం, జీవం మధ్య ఉన్న అనుబంధంతోనే కొలవాలి అన్న ఆలోచన కలుగుతుంది.
బంగారం మన శరీరంలో ఉందని తెలిసినప్పుడు ఒక్క క్షణం ఆశ్చర్యం కలుగుతుంది. మనం విశ్వంలో ఒక చిన్న కణంలా ఉన్నప్పటికీ, ఆ కణంలోనే వెలుగు, శక్తి, అద్భుతం నిక్షిప్తమై ఉందని ఇది చెబుతోంది.