గేదె పాలు తాగితే మెదడు మందగిస్తుంది అనే మాట మనలో చాలామందికి చిన్ననాటి నుంచే వినే ఉంటారు. తాతలు–అమ్మమ్మలు చెప్పిన ఈ మాటను నిజమనే నమ్ముతూ, ఇప్పటికీ కొన్ని ఇళ్లలో పిల్లలకు గేదె పాలు ఇవ్వరు. కానీ నిజంగా గేదె పాలు మెదడు పనితీరును ప్రభావితం చేస్తాయా? లేక ఇది తరతరాలుగా వినిపిస్తున్న ఒక అపోహ మాత్రమేనా..? ఆధునిక పోషకాహార శాస్త్రం చెబుతున్న విషయాలు చూస్తే ఈ సందేహానికి స్పష్టమైన సమాధానం దొరుకుతుంది.
పిల్లల ఎదుగుదల, శారీరక బలం, మానసిక చురుకుదనం అన్నీ సరైన ఆహారంపై ఆధారపడి ఉంటాయి. ఈ క్రమంలో పాలు కీలక పాత్ర పోషిస్తాయి. ఆవు పాలు తేలికగా జీర్ణమవుతాయి. ఇందులో కొవ్వు శాతం తక్కువగా ఉండటంతో కడుపుపై భారం పడదు. చిన్న పిల్లల నుంచి వృద్ధుల వరకూ చాలామందికి ఇవి సులభంగా జీర్ణం అవుతాయి. నీటి శాతం ఎక్కువగా ఉండటంతో శరీరాన్ని హైడ్రేట్గా ఉంచడంలో కూడా ఆవు పాలు ఉపయోగపడతాయి. బరువు నియంత్రణ కోరుకునేవారికి కూడా ఇవి అనుకూలమైన ఎంపికగా నిపుణులు సూచిస్తున్నారు.
అదే సమయంలో గేదె పాలు పోషకాల పరంగా మరింత సమృద్ధిగా ఉంటాయి. ప్రోటీన్, కొవ్వు, కాల్షియం వంటి ముఖ్యమైన పోషకాలు ఇందులో అధికంగా ఉంటాయి. చలికాలంలో శరీరానికి అదనపు శక్తి అవసరమైనప్పుడు, లేదా శారీరక శ్రమ ఎక్కువగా చేసే వారు, క్రీడాకారులు వంటి వారికి గేదె పాలు మంచి ఎనర్జీ డ్రింక్లా పనిచేస్తాయి. పెరుగుతున్న పిల్లలకు కూడా కొన్ని సందర్భాల్లో ఇవి శక్తినిచ్చే ఆహారంగా ఉపయోగపడవచ్చు.
అయితే ఇక్కడే అసలు ప్రశ్న వస్తుంది.. గేదె పాలు తెలివితేటలను తగ్గిస్తాయా? నిపుణుల మాటల్లో స్పష్టమైన సమాధానం ఒక్కటే. దీనికి ఎలాంటి శాస్త్రీయ ఆధారాలు లేవు. పాలు తాగడం, మెదడు సామర్థ్యం తగ్గడం మధ్య నేరుగా సంబంధం లేదని వైద్యులు చెబుతున్నారు. అయితే గేదె పాలలో కొవ్వు అధికంగా ఉండటంతో, మితిమీరిన వినియోగం వల్ల ఊబకాయం, మధుమేహం, జీవక్రియ సమస్యలు వచ్చే అవకాశం ఉంది. ఈ ఆరోగ్య సమస్యలు పరోక్షంగా మెదడు పనితీరుపై ప్రభావం చూపవచ్చు. కానీ అదే గేదె పాలు తాగితే తెలివి తగ్గిపోతుందన్న అపోహకు కారణం కాదు.
నిజానికి పిల్లల మేధస్సు అభివృద్ధి అనేది ఒక్క పాలతోనే నిర్ణయించబడదు. సరైన పోషకాహారం, ఒమేగా–3 ఫ్యాటీ ఆసిడ్లు, ఐరన్, విటమిన్–బీ సమూహం, తగినంత నిద్ర, మానసిక ఉత్తేజం.. ఇవన్నీ కలిసి పనిచేస్తేనే మెదడు పూర్తి స్థాయిలో అభివృద్ధి చెందుతుంది. పాలు వాటిలో ఒక భాగమే తప్ప, మొత్తం కథ కాదు. మొత్తానికి ఆవు పాలు, గేదె పాలు రెండూ తమతమ ప్రయోజనాలతో ఆరోగ్యానికి మంచివే. వయస్సు, శరీర అవసరాలు, జీవనశైలి, ఆరోగ్య పరిస్థితులను బట్టి ఏ పాలు సరిపోతాయో నిర్ణయించుకోవడమే జ్ఞానమని నిపుణులు సూచిస్తున్నారు. అపోహలను పక్కనపెట్టి, సరైన అవగాహనతో ఆహారాన్ని ఎంచుకోవడమే నిజమైన తెలివి.