అన్నం పెట్టే రైతులను కూటమి ప్రభుత్వం దారుణంగా మోసం చేస్తోందని మాజీ మంత్రి, వైసీపీ నాయకురాలు ఆర్.కె. రోజా తీవ్రస్థాయిలో మండిపడ్డారు. మామిడి రైతులకు గిట్టుబాటు ధర కల్పిస్తామని చెప్పిన హామీని నిలబెట్టుకోవడంలో చంద్రబాబు ప్రభుత్వం పూర్తిగా విఫలమైందని, దీనివల్ల సుమారు 45 వేల మంది రైతులు దాదాపు రూ.180 కోట్లు నష్టపోయారని ఆమె ఆవేదన వ్యక్తం చేశారు. ఈ మేరకు సోషల్ మీడియా వేదికగా ఆమె ప్రభుత్వంపై నిప్పులు చెరిగారు.
కూటమి ప్రభుత్వం, మోసం రెండూ కవల పిల్లలే: రోజా సెటైర్లు.
రైతులకు తీవ్ర అన్యాయం: రూ. 12 ధర ఇస్తామని చెప్పి, మోసం చేశారని ఆరోపణ.
ఫ్యాక్టరీల ఇష్టారాజ్యం: కిలోకు రూ. 8 ఇవ్వాల్సి ఉండగా, కేవలం రూ. 3-4 మాత్రమే ఇస్తున్న వైనం.
తక్షణం స్పందించాలి: ఫ్యాక్టరీల నుంచి రావాల్సిన రూ. 360 కోట్లను వెంటనే ఇప్పించాలని డిమాండ్.
అన్నమయ్య, చిత్తూరు, తిరుపతి జిల్లాల్లోని మామిడి రైతులు గిట్టుబాటు ధర లేక ఇబ్బందులు పడుతున్న సమయంలో, వారిని ఆదుకునేందుకు మాజీ సీఎం వైఎస్ జగన్ పర్యటనకు సిద్ధమయ్యారని రోజా గుర్తుచేశారు. జగన్ పర్యటనతో భయపడిన కూటమి ప్రభుత్వం, హడావుడిగా 4.50 లక్షల టన్నుల తోతాపురి మామిడిని ఫ్యాక్టరీలకు తరలించిందని ఆమె పేర్కొన్నారు. ఆ సమయంలో కిలో మామిడికి ప్రభుత్వం సబ్సిడీ కింద రూ. 4, ఫ్యాక్టరీలు రూ. 8 కలిపి మొత్తం రూ. 12 చెల్లిస్తామని రైతులకు హామీ ఇచ్చారని తెలిపారు.
అయితే, నెలలు గడుస్తున్నా ఈ హామీ అమలు కాలేదని రోజా విమర్శించారు. రైతులు, రైతు సంఘాలు ఆందోళన చేసిన తర్వాతే ప్రభుత్వం తన వాటా అయిన రూ. 180 కోట్లను విదిల్చిందని, కానీ ఫ్యాక్టరీలు చెల్లించాల్సిన రూ. 360 కోట్లను మాత్రం ఇప్పటికీ ఇప్పించలేకపోయిందని ఆమె ఆగ్రహం వ్యక్తం చేశారు.
ఫ్యాక్టరీ యాజమాన్యాలు ఒప్పందం ప్రకారం కిలోకు రూ. 8 చెల్లించాల్సి ఉండగా, ప్రస్తుతం కేవలం రూ. 3 నుంచి రూ. 4 మాత్రమే చెల్లిస్తున్నారని రైతులు తన వద్ద వాపోయారని రోజా తెలిపారు. ప్రభుత్వం వెంటనే జోక్యం చేసుకుని, ఫ్యాక్టరీల నుంచి రైతులకు రావాల్సిన రూ. 360 కోట్ల బకాయిలను వెంటనే చెల్లించేలా చర్యలు తీసుకోవాలని ఆమె డిమాండ్ చేశారు. రైతుల పక్షాన జరిగే పోరాటానికి తన సంపూర్ణ మద్దతు ఉంటుందని ఆమె స్పష్టం చేశారు.
