Manthena Satyanarayana Raju: ప్రముఖ యోగా, ప్రకృతి వైద్య నిపుణుడు డాక్టర్ మంతెన సత్యనారాయణ రాజు తన నిరాడంబరతతో మరోసారి వార్తల్లో నిలిచారు. ఆంధ్రప్రదేశ్ ప్రభుత్వ యోగా, నేచురోపతి విభాగం సలహాదారుగా నియమితులైన ఆయన, ఆ పదవికి సంబంధించిన ఎలాంటి జీతభత్యాలు కానీ, ప్రభుత్వ సౌకర్యాలు కానీ స్వీకరించబోనని స్పష్టం చేశారు. కేబినెట్ హోదా కలిగిన ఈ పదవి ద్వారా వచ్చే లక్షల రూపాయల వేతనాన్ని, ప్రభుత్వ వాహనాన్ని, ఇతర ప్రోత్సాహకాలను వద్దనుకుని తన నిస్వార్థ సేవను చాటుకున్నారు.
గతేడాది డిసెంబర్లో ముఖ్యమంత్రి నారా చంద్రబాబు నాయుడు మంతెనను రాష్ట్ర ప్రభుత్వ సలహాదారుగా నియమించిన సంగతి తెలిసిందే. ముఖ్యంగా బిల్ గేట్స్ ఫౌండేషన్తో కలిసి ప్రభుత్వం ప్రతిష్టాత్మకంగా చేపడుతున్న ‘సంజీవని’ వంటి ఆరోగ్య కార్యక్రమాలను క్షేత్రస్థాయిలోకి తీసుకెళ్లడంలో మంతెన సలహాలు ఎంతో కీలకమని సీఎం భావించారు. ఈ నేపథ్యంలో అమరావతిలో ముఖ్యమంత్రితో జరిగిన భేటీలో ఈ బాధ్యతలు స్వీకరించాల్సిందిగా సీఎం ఆయనను కోరారు.
మొదట ఈ పదవిని స్వీకరించడానికి డాక్టర్ మంతెన విముఖత చూపారు. కేవలం తెరవెనుక ఉండి ఉచితంగా సలహాలు ఇస్తానని ఆయన పేర్కొనగా.. అధికారిక హోదా ఉంటేనే సూచనలకు విలువ ఉంటుందని సీఎం నచ్చజెప్పారు. చివరకు ముఖ్యమంత్రి కోరిక మేరకు పదవిని అంగీకరించినప్పటికీ, మంతెన కొన్ని కఠిన షరతులు విధించారు.
ప్రభుత్వం నుంచి ఒక్క రూపాయి కూడా జీతంగా తీసుకోరు.
ప్రభుత్వ వాహనాన్ని, డ్రైవర్ను వినియోగించుకోరు.
సిబ్బంది, విమాన/రైలు టిక్కెట్లు వంటి ఏ రకమైన అలవెన్సులను స్వీకరించరు.
“గత 35 ఏళ్లుగా నా పుస్తకాలపై వచ్చే ఆదాయంతోనే జీవిస్తున్నాను. నేను నిర్వహిస్తున్న ఆశ్రమం నుంచి కూడా జీతం తీసుకోను. ప్రభుత్వ ధనం ప్రజల సొత్తు, దానిని సేవ కోసం ఉపయోగించాలి తప్ప వ్యక్తిగత అవసరాలకు కాదు.” — డాక్టర్ మంతెన సత్యనారాయణ రాజు
రాష్ట్రంలో ప్రకృతి వైద్య విధానాలను ప్రోత్సహించడం, ప్రజల జీవనశైలిలో మార్పులు తీసుకురావడం లక్ష్యంగా మంతెన సత్యనారాయణ రాజు రెండేళ్ల పాటు ఈ పదవిలో కొనసాగనున్నారు. ఎటువంటి లాభాపేక్ష లేకుండా బాధ్యతలు చేపట్టిన ఆయన నిర్ణయంపై రాజకీయ, సామాజిక వర్గాల నుంచి పెద్ద ఎత్తున ప్రశంసలు అందుతున్నాయి.
