బిగ్ బాస్ అంటేనే ఎప్పుడు ఏం జరుగుతుందో ఊహించలేం. ఇక ఈ వారం ఎలాగూ నాగార్జున హోస్ట్ గా రాడని తెలిసిసోయింది కదా. ఆయనెక్కడో షూటింగ్ లో ఫుల్లు బిజీగా ఉన్నారు. దీంతో ఈ వారం హోస్ట్ గా నాగార్జున బదులు వేరే వాళ్లు రాబోతున్నారు. ఇప్పటికే ఈ వారం హోస్ట్ గా సమంత రాబోతున్నట్టు వార్తలు వచ్చాయి. ఆ వార్తలు పుకారు ఏమీ కాదు. అవి నిజమే.
అవును.. ఈ వారం వచ్చే హోస్ట్ సమంతనే. కానీ.. ఆమె శనివారం ఎపిసోడ్ కు రావట్లేదు. ఈ వీకెండ్ లో ఒకే ఎపిసోడ్ హోస్ట్ తో ఉండనుంది. అది కూడా ఆదివారం సాయంత్రం 6 గంటలకే బిగ్ బాస్ షో ప్రారంభం కానుంది. ఆదివారం సాయంత్రం 6 నుంచి 9 వరకు బిగ్ బాస్ ఉంటుందట. అంటే ఏకంగా మూడు గంటల పాటు సమంత హోస్ట్ గా ఈ షో నడవనుంది.
నిజం చెప్పాలంటే ఇది చాలా రిస్కీ. ఎందుకంటే.. ఎప్పుడూ బిగ్ బాస్ షోకు హోస్ట్ చేయని సమంత రావడం రావడమే మూడు గంటల పాటు షోను హోస్ట్ చేయడమనేది నిజంగా అసాధ్యం.
మరి.. సమంత.. దుమ్ముదులిపేస్తుందా? తన సహజమైన నటనతో బిగ్ బాస్ షోను రక్తికట్టిస్తుందా? మామను మించిన కోడలు అవుతుందా? అనేది తెలియాలంటే రేపటి దాకా ఆగాల్సిందే.
మరోవైపు ఈసారి కొత్త హోస్ట్ వస్తున్నందున, దసరా పండుగ ఉన్నందున ఈ వారం ఎలిమినేషన్ ఉండకపోవచ్చు అని అంటున్నారు. కానీ.. బిగ్ బాస్ నిర్వాహకులకు కూడా మోనాల్ గజ్జర్ ను భరించడం కష్టంగా మారుతోందట. ఓవైపు బయట సోషల్ మీడియాలో మోనాల్ గజ్జర్ పై, బిగ్ బాస్ పై నెటిజన్లు ఫైర్ అవుతున్న సంగతి తెలిసిందే.
మరోవైపు కుమార్ సాయి, దేవి నాగవల్లి ఎలిమినేషన్ కరెక్ట్ గా జరగలేదని.. కావాలనే వాళ్లను బయటికి పంపించారని కూడా వార్తలు వస్తున్నాయి. ఒక గుజరాతీ అమ్మాయిని టీఆర్పీల కోసం.. ట్రయాంగిల్ లవ్ స్టోరీల కోసం.. తక్కువ ఓట్లు వచ్చినా హౌస్ లో ఉంచి.. ఎక్కువ ఓట్లు వచ్చిన వాళ్లను బయటికి పంపించడం కరెక్ట్ కాదు అంటూ అందరూ బిగ్ బాస్ పై వ్యతిరేకత వ్యక్తం చేస్తున్న విషయం తెలిసిందే.
చూద్దాం.. ఆదివారం అసలు సమంత ఎలా హోస్ట్ చేస్తుందో? ఎవరు ఎలిమినేట్ అవుతారో? ఇక శనివారం మాత్రం సాధారణంగా మిగితా రోజుల్లో ప్రసారం అయినట్టుగానే బిగ్ బాస్ ఎపిసోడ్ ప్రసారం కానుంది.