కీర్తి సురేష్ .. సాయి తేజ్ ..ఓటీటీకి సై అనేశారా?
టాలీవుడ్ నుండి మరో రెండు పెద్ద చిత్రాలు ఒటీటీలో విడుదలకు సిద్ధమ‌వుతున్నాయి. కీర్తి సురేష్ క‌థానాయిక‌గా నరేంద్రనాథ్ దర్శకత్వంలో ఈస్ట్ కోస్ట్ ప్రొడక్షన్స్ నిర్మించిన `మిస్ ఇండియా` డీల్ ఇప్ప‌టికే పూర్త‌యింద‌ని స‌మాచారం. మిస్ ఇండియా నెట్‌ఫ్లిక్స్‌లో విడుదల కానుంది. అయితే అధికారిక తేదీని చిత్ర‌బృందం ప్ర‌క‌టించాల్సి ఉంది. పెంగ్విన్ త‌ర్వాత కీర్తి సురేష్ న‌టించిన రెండవ చిత్రం ఓటీటీలో వ‌చ్చేస్తోంది. ఈ చిత్రంలో నవీన్ చంద్ర హీరో.
సుప్రీం హీరో సాయి తేజ్ – నభా నటేష్ జంట‌గా న‌టించిన `సోలో బ్ర‌తుకే సో బెటర్` ఓటీటీ డీల్ పూర్త‌యింద‌ని స‌మాచారం. సుబ్బు ఈ చిత్రానికి దర్శకత్వం వహించ‌గా.. శ్రీ వెంకటేశ్వర సినీ చిత్ర క్రియేషన్స్ బ్యాన‌ర్ లో బివిఎస్ఎన్ ప్రసాద్ నిర్మించారు. ఈ చిత్రం జీ5లో మే-1 న విడుదల కానుంది.
ఈ చిత్ర నిర్మాతలు డిజిటల్, శాటిలైట్ , థియేట్రికల్ హక్కులను జీ వాళ్ల‌కు భారీ ధరలకు అమ్మారు. నిజానికి థియేట్రికల్ రిలీజ్ కోస‌మే ఇన్నాళ్లు వేచి చూసినా.. ప్ర‌స్తుత స‌న్నివేశం దృష్ట్యా ఆలోచ‌న మారుతోంది. నాని – సుధీర్ బాబు మ‌ల్టీస్టార‌ర్ `వీ` డిజిటల్ రిలీజ్ రైట్స్ విక్ర‌యించిన సంగ‌తి విధిత‌మే. ఆ త‌ర్వాత అనుష్క నిశ్శ‌బ్ధం కూడా ఓటీటీ లో రిలీజ్ కానుంద‌ని ప్ర‌చార‌మ‌వుతోంది. కోన వెంక‌ట్ ఇప్ప‌టికే మంచి ధ‌ర కోసం వేచి చూస్తున్నార‌ట.