దాదాపు దేశం మొత్తం లాక్ డౌన్ కొనసాగుతోంది. ఏప్రిల్ 14 వ‌ర‌కూ గుమ్మం దాట‌డానికి వీల్లేని స్థితి. ముఖ్యంగా మెట్రో పాలిట‌న్ సిటీల్లో లాక్ డౌన్ ప‌క్కాగా అమ‌ల‌వుతోంది. అయినా కొన్ని చోట్ల వాహ‌నాలు య‌థేచ్చ‌గా తిరిగేస్తున్నాయి. అత్య‌వ‌స‌ర ప‌రిస్థితుల్లో త‌ప్ప బ‌య‌ట‌కు రావ‌డానికి వీల్లేదని రూల్ ఉన్నా… ప‌రిస్థితులు డిమాండ్ చేస్తే గ‌డ‌ప దాట‌క త‌ప్ప‌డం లేదు. తాజాగా క‌న్న‌డ హీరోయిన్ అలాగే కారుతో రోడ్డు ఎక్కి ప్రాణాలు మీద‌కు తెచ్చుకుంది.
కెవ్వు కేక హీరోయిన్ శ‌ర్మిలా మాండ్రే ప్ర‌యాణిస్తున్న కారు బెంగుళూరులో ని వ‌సంత న‌గ‌ర్ లోని రైల్వే వంతెన వ‌ద్ద శ‌నివారం తెల్ల‌వారు జామ‌ను కారు అదుపు త‌ప్పింది. కారు నేరుగా రోడ్ పై ఎదురు ఉన్న పిల్ల‌ర్ ఇనుప స్థంభాన్ని ఢీ కొట్టింది. దీంతో కారు ముందు భాగ‌మంతా నుజ్జు నుజ్జు అయింది. హీరోయిన్ కు తీవ్ర గాయాల‌య్యాయి. ముఖానికి ..చేతికి తీవ్ర గాయాలైన‌ట్లు స‌మాచారం. దీంతో ర‌క్త‌స్రావం అధికంగా జ‌రిగిన‌ట్లు చెబుతున్నారు. వెంట‌నే స్థానికులు ఆసుప‌త్రికి త‌ర‌లించారు. ఘ‌ట‌న తెల్ల‌వారుజామున జ‌ర‌గ‌డం ..పైగా లాక్ డౌన్ ఉండ‌టంతో ఆ ప్ర‌దేశంలో ఎవ‌రూ లేక‌పోవ‌డంతో ఆసుప‌త్రికి చేరుకోవ‌డం క‌ష్ట‌మైంది. కారులో శ‌ర్మిలా తో పాటు ప్ర‌యాణిస్తున్న మ‌రో వ్య‌క్తి లోకేష్ కి తీవ్ర గాయాల‌య్యాయి. అయితే ఆ స‌మ‌యంలో కారు డ్రైవ్ చేస్తుంది ఎవ‌రు? అన్న‌ది ఇంకా తెలియ‌లేదు. అలాగే లాక్ డౌన్ ఉన్న స‌మ‌యంలో కారులో ఎందుకు రోడ్డు మీద‌కు వ‌చ్చారు? అన్న‌ది పోలీసులు కేసు న‌మోదు చేసి ఆరా తీస్తున్నారు. కేవ‌లం రైడ్ కోస‌మే వ‌చ్చిన‌ట్లు పోలీసులు ఎఫ్ ఐ ఆర్ లో న‌మోదు చేసిన‌ట్లు స‌మాచారం. ఇంకా ఘ‌ట‌న‌కు సంబంధించి పూర్తి వివ‌రాలు తెలియాల్సి ఉంది. శ‌ర్మిల అల్ల‌రి న‌రేష్ హీరోగా న‌టించిన కెవ్వు కేవ సినిమాలో హీరోయిన్ గా న‌టించింది. త‌ర్వాత పెద్ద గా అవ‌కాశాలు రాక‌పోవ‌డంతో టాలీవుడ్ కు దూరంగా ఉంది.