విజయవాడలోని శాప్ కార్యాలయం వద్ద మెగా డీఎస్సీ అభ్యర్థుల నిరసనలు, ఆందోళనలు తీవ్ర ఉద్రిక్తతకు దారితీశాయి. స్పోర్ట్స్ కోటా కింద జరిగిన ఉపాధ్యాయుల నియామకాలలో అవకతవకలు జరిగాయంటూ వైఎస్ఆర్ కాంగ్రెస్ పార్టీ ఆందోళనకు పిలుపునివ్వగా, అదే సమయంలో ఎంపికైన ఉపాధ్యాయులు కౌంటర్ నిరసనకు దిగడంతో అక్కడ తీవ్ర ఘర్షణ వాతావరణం నెలకొంది. ఈ ఘటనపై రెండు ప్రధాన రాజకీయ పార్టీల మధ్య మాటల యుద్ధం తారాస్థాయికి చేరింది.
స్పోర్ట్స్ కోటాలో ఉద్యోగాలు సాధించిన ఉపాధ్యాయులు తమ పత్రాలు నిబంధనల ప్రకారమే ఉన్నాయని స్పష్టం చేయడానికి సాప్ కార్యాలయానికి రాగా, వైసీపీ శ్రేణులు వారిని అడ్డుకునే ప్రయత్నం చేశాయని కూటమి ప్రభుత్వం మండిపడింది. ఉపాధ్యాయులపై వైసీపీ నాయకులు, రౌడీషీటర్లు దాడికి పాల్పడ్డారని ముఖ్యమంత్రి చంద్రబాబు నాయుడు, మంత్రులు నారా లోకేష్, వంగలపూడి అనిత తీవ్రంగా ఖండించారు. విద్యను పంచే గురువులపై దాడులు చేయడం అరాచకత్వానికి నిదర్శనమని వారు ఆగ్రహం వ్యక్తం చేశారు.
మరోవైపు, తాము శాంతియుతంగా నిరసన తెలుపుతుంటే కావాలనే టీడీపీ శ్రేణులు టీచర్ల ముసుగులో వచ్చి తమ కార్యకర్తలపై దాడి చేశాయని వైసీపీ ఆరోపించింది. పోలీసుల వైఫల్యం వల్లనే ఈ ఘర్షణలు జరిగాయని, ప్రభుత్వ వైఫల్యాలను కప్పిపుచ్చేందుకు అక్రమ అరబాట్లు చేస్తున్నారని మండిపడింది. ఈ నేపథ్యంలో, శాప్ కార్యాలయం వద్ద జరిగిన పరిణామాలు, తమ పార్టీ శ్రేణులపై జరిగిన దాడికి సంబంధించిన ఫొటోలు, వీడియోలను సేకరించి గవర్నర్‌కు ఫిర్యాదు చేసేందుకు వైసీపీ అధినేత వైఎస్ జగన్‌మోహన్‌రెడ్డి సిద్ధమవుతున్నట్లు సమాచారం.