బిగ్ బాస్ జిహాదీని ప్రమోట్ చేస్తోందా?
హిందీలో మొదలైన బిగ్ బాస్ ఇప్పుడు దక్షిణాది భాషలకు విస్తరించిన సంగతి తెలిసిందే. తెలుగు- తమిళంలో కూడా ఆ గేమ్ షో కు మంచి స్పందన లభించింది. అయితే బాలీవుడ్ లో సక్సెస్ అయినంతగా సౌత్ లో సక్సెస్ కాలేదు. తెలుగు- తమిళ్ లో సీజన్-2 ఫెయిలైంది. ప్రస్తుతం సీజన్ -3 రన్నింగ్ లో ఉంది. ఇక గేమ్ షో ప్రారంభం నుంచి తెలుగులో ఇది చెత్త గేమ్ షో అని విమర్శలున్నాయి. హిందీ, తమిళ్ వెర్షన్ గేమ్ షోని పక్కనబెడితే తెలుగులో బిగ్ బాస్ పై ఓ రేంజ్ లో ఆరోపణలు పోటెత్తాయి. కాస్టింగ్ కౌచ్, హౌస్ లో అసభ్యకర సన్నివేశాలు చోటు చేసుకోవడం వంటి వాటిపై పలువురు సామాజిక కర్తలు పెద్ద ఎత్తున విమర్శలు చేసారు. లైంగిక ఆరోపణలతో అంతకు మించి అట్టుడికిపోయింది. షోని బ్యాన్ చేయాలని ఇప్పటికే పలువురు డిమాండ్ చేసారు. ఇలాంటి షోల వల్ల ఏ ఉపయోగం లేదని, యువత చెడుపోతోందని ఆగ్రహ జ్వాలలు వ్యక్తం అయ్యాయి.
తాజాగా ఈ రియాలిటీ షోపై కర్ణి సేనల కన్ను పడింది. ఇటీవలే హిందీలో సీజన్-13 ప్రారంభమైంది. ఈ నేపథ్యంలో రాజస్థాన్ కు చెంది కర్ణిసేనల ప్రతినిధులు బిగ్ బాస్ పై పిడికిలి బిగించారు. షోని నిలిపివేయాలని డిమాండ్ చేస్తున్నారు. బిగ్ బాస్ భారతీయ సంప్రదాయాలకు వ్యతిరేకంగా ఉందని, వెంటనే నిలపుదల చేసి హక్కులు కాపాడుకోవాలని కేంద్ర మంత్రి ప్రకాశ్ జవడేకర్ కు ఓ లేఖ రాసారు. జాతీయ మీడియా వేదికగా హిందు సంప్రదాయాలను అపహేళన చేస్తున్నారని.. ముఖ్యంగా హిందీ షో ద్వారా జిహాదీని ప్రమోట్ చేస్తున్నారని ఆ లేఖలో పేర్కొన్నారు. అలాగే కుటుంబంతో కలిసి చూసే విధంగా లేదని, చాలా అసభ్యంగా ఉందని లేఖలో పేర్కొన్నారు. ఇప్పటివరకూ బిగ్ బాస్ పై కర్ణిసేనలు కన్నెర్ర జేయలేదు. తాజాగా హిందూవాదంతో.. కల్చర్ పేరుతో సేనల ఎంట్రీ ఇవ్వడతో బిగ్ బాస్ పై పంచ్ పడటం ఖాయమని జాతీయ మీడియాలో ప్రచారం సాగుతోంది. ఇకపోతే పద్మావత్ దర్శకుడు భన్సాలీపై కర్ణిసేనల దాడులు.. ఆ సినిమా రిలీజ్ సమయంలో సాగించిన దమనకాండ గురించి తెలిసిందే.