సందీప్ కిషన్‌కు హైదరాబాద్ మెట్రో షాక్!
గత కొన్నేళ్లుగా సరైన హిట్ కోసం ఎదురు చూస్తోన్న సందీప్ కిషన్.. ప్రస్తుతం కార్తీక్ రాజు దర్శకత్వంలో ‘నిను వీడని నీడను నేనే’ సినిమా చేసాడు. హార్రర్ కామెడీ నేపథ్యంలో తెరకెక్కిన ఈ సినిమా పోస్టర్స్, టీజర్, ట్రైలర్స్‌తో ఈ సినిమాపై అంచనాలు పెరిగాయి. ఈ రోజు (జూలై12న) విడుదల అయిన ఈ సినిమాకు తాజాగా హైదరాబాద్ మెట్రో అధికారులు పెద్ద షాక్ ఇచ్చారు.
వివరాల్లోకి వెళితే..సందీప్ కిషన్ హీరోగా నటించిన ‘నిను వీడని నీడను నేనే’ చిత్రం ఈ రోజు ప్రేక్షకుల ముందుకు వచ్చింది. ఈ సినిమాలో సందీప్ నటించడంతో పాటు నిర్మాణ బాధ్యతలూ చూసుకున్నారు. ఈ సినిమా ప్రమోషన్స్‌లో భాగంగా చిత్ర యూనిట్ నగరంలోని పలు చోట్ల పోస్టర్లను ఏర్పాటు చేసింది. ఈ క్రమంలో మెట్రో స్తంభాల వద్ద ప్రచార పోస్టర్లను అతికించారు. అయితే, ఈ పోస్టర్లను జీహెచ్‌ఎంసీ అధికారులు తొలగించారు.
ఈ పోస్టర్స్ చూడటానికి అసభ్యకరంగా ఉన్నాయంటూ .. ఉప్పల్ కు చెందిన కొంత మంది ప్రయాణికులు ఈ విషయాన్ని హైదరాబాద్ మెట్రో రైల్ వాళ్ల దృష్టికి తీసుకెళ్లారు. వాళ్లు సదరు పోస్టర్స్ చూసి వెంటనే వాళ్ల పై అధికారులకు కంప్లైట్ చేసారు. దీంతో సదరు అధికారులు.. ఈ పోస్టర్స్ చూసి వెంటనే తొలిగించాలని ఆదేశించారు. దీంతో జీహెచ్‌ఎంసీ స్థానిక పోలీసుల సహకారంతో మెట్రో పిల్లర్ల వెంట ఉన్న ఈ సినిమా పోస్టర్స్‌ను తొలిగించారు.
అధికారుల తీరుపై చిత్రయూనిట్ అసంతృప్తి వ్యక్తంచేస్తోంది. సినిమా ప్రమోషన్స్‌ కోసం అధికారుల అనుమతి తీసుకున్నామని.. అయినప్పటికీ పోస్టర్లు తొలగించారని ఆవేదన వ్యక్తంచేస్తున్నారు.