రచన- దర్శకత్వం: అశ్విన్ చంద్రశేఖర్
తారాగణం : సంతోష్ శోభన్, మానసా వారణాసి, యోగిబాబు, రాజీవ్ కనకాల, గోపవరపు రమణ తదితరులు
సంగీతం : ఆదిత్యా రవీంద్రన్, ఛాయాగ్రహణం : దినేష్ పురుషోత్తమన్
బ్యానర్: యూవీ కాన్సెప్ట్స్
సహ నిర్మాత : అజయ్ కుమార్ రాజు
విడుదల : ఫిబ్రవరి 14, 2026
Couple Friendly Movie Review: హీరోగా రంగప్రవేశం చేసిన నాటి నుంచీ ఒక్క హిట్టు లేకుండా 11 సినిమాలు నటించుకుంటూ వచ్చిన సంతోష్ శోభన్ కి చివరాఖరికి అతడి కెరీర్ కి కాస్త ఊపిరిపోసే సినిమా తాజాగా లభించింది. కొత్త దర్శకుడు అశ్విన్ చంద్రశేఖర్ రూపొందించిన ‘కపుల్ ఫ్రెండ్లీ’ అనే ట్రాజిక్ రోమాన్స్ సంతోష్ శోభన్ కి బాక్సాఫీసు ఫ్రెండ్లీగా నిలబడింది. చిన్న కథ ఎక్కువ ప్రభావం చూపిస్తూ ప్రేక్షకుల ముందుకొచ్చిన ఈ మూవీలో కథేమిటి, అదెలా వుంది తెలుసుకుందాం.
కథేమిటి?
నెల్లూరులో తల్లిదండ్రులతో నివశించే శివ (సంతోష్ శోభన్) ఇంటీరియర్ డిజైనర్ కోర్స్ చేసి ఉద్యోగం దొరక్క ఖాళీగా ఉంటాడు. తండ్రి (గోపరాజు రమణ) నుంచి తీవ్ర వొత్తిడి ఎదురయ్యేసరికి ఓ రోజు ఇల్లు విడిచి చెన్నై వెళ్ళిపోతాడు. స్తాడు. కానీ జాబ్ లేదు. పెళ్లీడు వచ్చినా ఇంకా తన డబ్బుల మీదనే ఆధారపడుతున్నాడని తండ్రి రోజూ తిడుతుంటాడు. దీంతో ఆ టార్చర్ భరించలేక నెల్లూరు నుంచి చెన్నై వెళ్లిపోతాడు. అక్కడ జాబ్ కోసం ప్రయత్నాలు చేస్తూంటాడు. అక్కడే చిత్తూరు నుంచి వచ్చిన మిత్ర(మానస వారణాసి) ఐటీ జాబ్ ప్రయత్నాల్లో వుంటుంది. ఒకరోజు పెళ్లి చూపుల కోసం ఇంటి నుంచి పిలుపు రావడంతో ఊరు వెళ్లాలనుకుంటుంది. ఒకవైపు ఉద్యోగ ప్రయత్నాలు చేస్తూ శివ డబ్బుల కోసం ర్యాపిడో నడిపిస్తూంటాడు. అతడి బైక్ మీద బస్టాపు చేరుకున్న మిత్ర, మనసు మార్చుకుంటుంది. ఇప్పుడే పెళ్లి అవసరం లేదని భావిస్తుంది.
మళ్లీ హాస్టల్ కి వచ్చేయలనుకుని శివకి కాల్ చేస్తుంది. అతనొచ్చి పికప్ చేసుకుంటాడు. కానీ ఆ హాస్టల్ రూమ్ ఖాళీ వుండదు. దీంతో శివ బైక్ మీద హాస్టల్ కోసం తిరిగి ఎక్కడా ఖాళీ లేకపోవడంతో, శివ సూచన మేరకు అతడి రూమ్ లో బస చేస్తుంది. ఈ క్రమంలో శివ పడే కష్టం చూసి అతడి ఇంటీరియర్ డిజైనింగ్ జాబ్ కోసం హెల్ప్ చేస్తుంది. దీంతో శివకి వర్క్ ఆఫర్స్ రావడం మొదలెడతాయి. మిత్ర తన జాబ్ ప్రయత్నాలు కొనసాగిస్తూనే వుంటుంది. ఈ క్రమంలో ఇద్దరూ ప్రేమ పడతారు. లివ్ ఇన్ రిలేషన్ షిప్ మొదలెడతారు. ఈ విషయం ఇద్దరి పేరెంట్స్ కీ తెలిసి గొడవవుతుంది. ఇప్పుడు వీళ్ళిద్దరి పెళ్లి సమస్య ఎలా పరిష్కార మైందనేది మిగతా కథ. పెళ్లి సమస్య వుండగా అనూహ్యంగా మిత్ర కెదురైన ఆపదేమిటనేది అదనపు సమస్య.
ఎలావుంది కథ?
కథ కొత్తదేం కాదు. చాలాసార్లు వచ్చిన ప్రేమ కథే. కాకపోతే చెన్నై నేపధ్యం వల్ల, వాస్తవికత వల్ల, కమర్షియల్ ఫార్ములాలకి దూరంగా వుండడం వల్ల కొత్తదనాన్ని సంతరించుకుందని చెప్పొచ్చు. ప్రేమ పేరుతో కామెడీలూ, జోకులూ, ఫైట్లూ లేకుండా మెచ్యూర్డ్ గా కథ చెప్పడంతో ఆలోచనాత్మకంగా వుంటుంది సినిమా.
ఈ సినిమాకి స్ఫూర్తి హిందీ హిట్ ‘సయారా’ లాగా అన్పిస్తే, ‘సయారా’ కి స్ఫూర్తి కొరియన్ మూవీ ‘ఏ మూమెంట్ టు రిమెంబర్’ అని తెలిసిందే. ఇందులో హీరోయిన్ కి కలిగే ముప్పు పాత ఫార్ములాయే. కాకపోతే మెలోడ్రామా లేకుండా నీటుగా జరిపిన చిత్రీకరణ వల్ల, నసలేకుండా రెండు గంటలల్లోపు ముగించడం వల్లా బోరు కొట్టదు.
ఫస్టాఫ్ చెన్నైలో శివ, మిత్రల స్ట్రగుల్, ఒకే ఇంట్లో కలిసి నివశించడం, ప్రేమలో పడడం, శివని మిత్ర కెరీర్ లో ఎదిగేలా హెల్ప్ చేయడం వగైరాలతో రొటీన్ గానే సాగుతుంది. అయితే మధ్య మధ్యలో వీళ్ళిద్దరూ కేరళలో గడిపే ఇంటర్ కట్స్ వస్తూంటాయి. ఇవి సస్పెన్స్ ని క్రియేట్ చేస్తాయి. ఇదే ఫస్టాఫ్ కి బలం. చూస్తున్న కథ వెనుక ఇంకేదో కథ ఉందన్న ఆసక్తి రేపుతాయి ఈ ఇంటర్ కట్స్. ఇద్దరి పేరెంట్స్ కీ వీళ్ళ లివ్ ఇన్ రిలేషన్ షిప్ గురించి తెలిసిపోవడంతో ప్రేమలో కస్టాలు మొదలవుతాయి.
ఐతే సెకండాఫ్ లో ఈ కష్టాలకి తోడూ మిత్రకి అనూహ్యంగా ఒక ముప్పు ఎదురవడంతో ఈ మలుపే సెకండాఫ్ కి ఆధారమవుతుంది. ఈ మలుపు అకస్మాత్తుగా రావడంతో అంత కన్విన్స్ చెయ్యదు. కానీ దీని చుట్టే ఇక ట్రాజిక్ డ్రామా మొదలవుతుంది. ఫస్టాఫ్ సరదాగా సాగే కథ సెకండాఫ్ సీరియస్ అవడంతో దీనికి అడ్జెస్ట్ అవడమూ కాస్త కష్టమే ప్రేక్షకులకి. పైగా కథనం స్లో అయిపోతుంది. ఇలా సేరియస్ గా, ట్రాజిక్ గా మారే కథ చివరికి ఒక సందేశమిస్తూ ముగుస్తుంది. జీవితంలో అనూహ్య సంఘటనలకి కుమిలిపోకూడదనీ, వర్తమానంలో జీవిస్తూ ఆ రిలేషన్ షిప్ ని మధుర స్మృతులుగా మార్చుకుని, జీవితాన్ని గెలవాలనీ చెప్పే ఈ కథ యూత్ ని ఆలోచింపజేస్తుంది. మెచ్యూర్డ్ ప్రేమ కథల్ని ఇష్టపడేవాళ్ళు ఒకసారి చూడొచ్చు.
ఎవరెలా చేశారు?
సంతోష్ శోభన్ కి మెచ్యూర్డ్ పాత్ర లభించడంతో తనలోని నటుడ్ని బయటికి తీసి సహజత్వంతో ముందుంచాడు. నిజ జీవిత పాత్రకి పూర్తి న్యాయం చేశాడు. అతి ఎమోషన్లు లేకుడా, ఫీలింగ్స్ ని ప్రేక్షకులు ఫీలయ్యేలా చేశాడు. మిత్ర పాత్రలో మానసా వారణాసి కూడా ఇంతే సహజ నటన ప్రదర్శించింది. రోమాన్స్ లో స్వీట్ గా, ట్రాజడీలో శాడ్ గా పాత్ర షేడ్స్ ని ప్రదర్శించింది. ఇద్దరూ కలిసి కథతో ఇచ్చిన మెసేజ్ లాగే సినిమాని ప్రేక్షకుల స్మృతి పథంలో నిలబెట్టారు. తండ్రుల పాత్రల్లో రాజీవ్ కనకాల, గోపరాజు రమణ పాత్రలు ఓల్డ్ డ్రామాతో వుంటాయి. పాత్రలకి తగ్గట్టే నటనలున్నాయి. తమిళ కమెడియన్ యోగిబాబు నవ్వించే పనిపెట్టుకోకుండా సింపుల్ గా పాత్రపోషణ చేశాడు.
సాంకేతికాల సంగతి?
ఆదిత్య రవీంద్రన్ సంగీతం ఓ మాదిరిగా వుంది. కథలో భాగంగా వచ్చిపోయే పాటలు కూడా అంతంత మాత్రం. నిజానికి ఈ ప్రేమ కథకి గుర్తుండి పోయే పాటలు వుండాల్సింది. ఈ దిశగా కృషి చేయలేదు. దినేష్ పురుషోత్తమన్ కెమెరా వర్క్ లో చెన్నై విజువల్స్ కూల్గా, ఫ్రెష్ ఫీలింగ్ తో వున్నాయి. గణేష్ శివ ఎడిటింగ్ నిర్మాణ విలువలు బావున్నాయి. యూవీ కాన్సెప్ట్స్ బ్యానర్ ప్రతిష్టకి తగ్గట్టు కంటెంట్, మేకింగ్ వున్నాయి.
చివరికేమిటి?
దర్శకుడు అశ్విన్ చంద్రశేఖర్ రచన, దర్శకత్వం సహజత్వానికి పెద్ద పీట వేస్తూ తను ఏ స్కూల్ మేకరో స్పష్టం చేసేలా వున్నాయి. తొలి మూవీతో ప్రభావం చూపిన తను మలి మూవీని కూడా ఇంతే జాగ్రత్తగా మేకింగ్ చేయాలి. లీనియర్ నేరేషన్ టో ఫ్లాట్ గా సాగే ఈ కథకి ఇంటర్ కట్స్ లో కేరళలో సీన్స్ చూపించడం తెలివైన ప్రయోగం. దీనివల్ల ఫస్టాఫ్ నుంచీ అంతర్లీనంగా సస్పెన్స్ క్రియేట్ అయి బలం చేకూరింది. ఈ కేరళ ఇంటర్ కట్స్ సెకండాఫ్ లో లీనియర్ నేరేషన్ లో హీరోయిన్ కి కలిగే ముప్పుకి కనెక్ట్ అవడంతో సస్పెన్స్ వీడిపోయి- అసలేం చూశామో తెలిసి థ్రిల్ అవుతాం. హీరోయిన్ కి కలిగే ముప్పు వరకూ మనం చూసింది వర్తమాన కథకాదు- ఫ్లాస్ బ్యాక్ కథ. వర్తమాన కథ ఇంటర్ కట్స్ లో వచ్చే కేరళ దృశ్యాలు! ఈ టెక్నిక్ ఫ్లాష్ బ్యాక్స్ కళనే మార్చేసింది!
రేటింగ్ : 2.5 / 5
