కోలీవుడ్లో లంచం నిషేధం!
వార్త ప్రచురించి దానికి డబ్బు తీసుకోవడం లంచం కిందే లెక్క. అయితే ఈ లంచగొండితనం టాలీవుడ్- కోలీవుడ్ సహా అన్ని పరిశ్రమల్లోనూ ఇటీవల చర్చకు వస్తోంది. అనాదిగా పాతుకుపోయిన ఈ వ్యవస్థ ఇప్పుడు ప్రమాదకరంగా మారడంపైనా నిరంతరం జర్నలిస్టుల్లో చర్చ సాగుతోంది. ఇది జర్నలిజం విలువల్ని పాతరేసిందన్న ఆసక్తికర చర్చా సాగుతోంది. అయితే ఇది ఇప్పుడే సృష్టించుకున్న వ్యవస్థ కాదు .. మద్రాసు పరిశ్రమ నుంచి అందరికీ తెలిసిన వ్యవస్థ. సినిమాకి ప్రచారం చేసినందుకు లేదా వార్తల్ని పబ్లిష్ చేసినందుకు ఒక చిన్న మొత్తాన్ని మనీ కవర్ రూపంలో నిర్మాతలే అధికారికంగా జర్నలిస్టులకు అలవాటు చేశారు. అయితే అది కాలక్రమేణా జర్నలిజంలో అవ్యవస్థకు దారి తీసిందన్న విమర్శలు ప్రస్తుతం వెల్లువెత్తుతున్నాయి.
కేవలం ఆ కవర్ తాంబూలం కోసమే ఈ పరిశ్రమకు వచ్చే జర్నలిస్టులతో కొత్త తలనొప్పులు ప్రారంభమయ్యాయి. ఇక టాలీవుడ్ లో ఈ వ్యవస్థ ప్రక్షాళనకు ఎలాంటి చర్యలు లేకపోయినా ఇటీవల కొన్ని ఊహించని మార్పులు వచ్చాయి. కోలీవుడ్ లో మాత్రం పూర్తిగా జర్నలిజాన్ని ప్రక్షాళన చేసేందుకు లంచగొండి విధానాన్ని వదిలించుకునేందుకు నిర్మాతలు ప్రయత్నిస్తున్నారని ఇటీవల వార్తలు వచ్చాయి. ఈ విధానాన్ని టాలీవుడ్ లోనూ అమలు చేయాలన్న ప్రతిపాదనా కోలీవుడ్ నిర్మాతల మండలి.. దక్షిణ భారత చలనచిత్ర వాణిజ్య మండలి నుంచి తెలుగు సినిమా నిర్మాతల ముందుకు వచ్చింది. అయితే ఇక్కడ ఇంకా ఈ అవ్యవస్థ వల్ల పొంచి ఉన్న పెనుముప్పును మన నిర్మాతలు గ్రహించినట్టే కనిపించదు. కవర్ వ్యవస్థ దళారీ వ్యవస్థను పెంచి పోషించింది. అది స్వార్థాన్ని విపరీతంగా పెంచి పోషించింది. దాని పర్యవసానమే సినిమాలపై సాగుతున్న అనవసర నెగెటివిటీ. ఇక పెచ్చు మీరిన మీడియా వ్యవస్థలో వార్తల్ని నిజాయితీగా పబ్లిష్ చేసే పబ్లిషింగ్ హౌస్ ఏది అన్నది ఇప్పటికీ నిర్మాతలకు తెలీనే తెలియకపోవడం అన్నది మరో బలహీనతగా మారిందన్న విమర్శ కూడా ఉంది.
ఏదైతేనేం.. కోలీవుడ్ లో పెను భారంగా మారిన కవర్ వ్యవస్థను నిషేధించారు. అది జర్నలిస్టులకు నచ్చడం లేదు. అక్కడ నిర్మాతలకు జర్నలిస్టులకు మధ్య అంతరం పెంచిన సన్నివేశం ఇది. అయితే అదే సన్నివేశం టాలీవుడ్ లోనూ ఎదురైతే ఏంటి పరిస్థితి? అన్నది కాస్త ఆగితే కానీ తెలీదు. అసలింతకీ దీనిని అమలు చేసే సమర్ధత కానీ.. లేదా ఆలోచన కానీ తెలుగు సినిమా నిర్మాతల్లో ఉందా? అంటే అది ఇప్పటికి సందిగ్ధమే. అయితే తెలుగు సినీజర్నలిజంలో కొన్ని పరిణామాలు ఎంత పెను ప్రమాదకరంగా మారాయో తదుపరి ఆర్టికల్స్ లో మునుముందు ఇంకా ఇంకా తెలుసుకుందాం.