గూఢచారి చిత్రం చివరలో ఆ సినిమాకి సీక్వెల్ ఉంటుందనే హింట్ ఇస్తూనే ముగించిన సంగతి తెలిసిందే. సీక్వెల్ కి సంబంధించిన కథను రెడీ చేసే పనిలో అడివి శేష్ కొంతకాలంగా బిజీగా వున్నాడు. ‘గూఢచారి’లోని ప్రధాన పాత్రల పరిధిని పెంచుతూ ఆయన స్క్రిప్ట్ సిద్ధం చేస్తున్నారు. ‘గూఢచారి’ సినిమా స్క్రిప్ట్ వర్క్ లో ముఖ్యమైన పాత్రను పోషించిన రాహుల్ పాకాల, ఈ సీక్వెల్ కి దర్శకుడిగా వ్యవహరించనున్నారు. ఈ విషయమై అధికారికంగా ప్రకటన వచ్చింది. అయితే ఇక్కడే ఓ ట్విస్ట్ ఉంది.
‘గూఢచారి’ చిత్రానికి సీక్వెల్ రాబోతున్నట్లు నిర్మాతలు అభిషేక్ పిక్చర్స్ వారు ప్రకటించారు. ఈరోజు అడివి శేష్ పుట్టినరోజు సందర్భంగా ఈ సీక్వెల్ ప్రకటన వచ్చింది. సినిమాకు సంబంధించిన స్క్రిప్ట్ పనులు మొదలైనట్లు వెల్లడిస్తూ ఈ చిత్ర కాన్సెప్ట్‌ పోస్టర్‌ను విడుదల చేశారు.
2019 జూన్‌ నుంచి షూటింగ్ మొదలుకానుందట. అంతవరకూ బాగానే ఉంది కానీ ఈ చిత్రానికి డైరక్టర్ మారిపోవటమే అందరికీ ఆశ్చర్యం అనిపిచింది. రాహుల్ పాకాల దర్శకత్వం ఈ సీక్వెల్ కు డైరక్షన్ వహించనున్నారని ప్రకటన చేయటమే ట్విస్ట్ ఎవరూ ఊహించలేదు.
ఇక ఆగస్ట్‌లో విడుదలైన ‘గూఢచారి’ చిత్రాన్ని శశి కిరణ్‌ టిక్కా తెరకెక్కించారు. అభిషేక్ పిక్చర్స్ బ్యానర్‌పై అభిషేక్ నామా నిర్మాతగా వ్యవహరించారు. శోభిత ధూళిపాళ్ల, ప్రకాశ్‌రాజ్‌, వెన్నెల కిశోర్‌, మధు శాలిని, రవిప్రకాశ్‌, సుప్రియ తదితరులు కీలక పాత్రలు పోషించారు. తక్కువ బడ్జెట్‌తో తెరకెక్కించినప్పటికీ ఈ చిత్రాన్ని జేమ్స్‌ బాండ్‌ స్థాయినలో తెరకెక్కించి ప్రేక్షకుల మన్ననలు పొందారు. మరి ఆ డైరక్టర్ ని ఎందుకు ప్రక్కన పెట్టారనేది ఇప్పుడు ఇండస్ట్రీలో హాట్ టాపిక్ గా మారింది.
2020లో సినిమాను ప్రేక్షకుల ముందుకు తీసుకువచ్చేందుకు సన్నాహాలు చేస్తున్నారు.పోస్టర్‌లో ‘గూఢచారి విల్‌ బీ బ్యాక్‌’ అని రాసుంది. ‘2’ అనే నెంబర్‌లో అడివి శేష్‌ను వెనక నుంచి చూపించారు. ఇందులో శ్యాంగా కీలక పాత్ర పోషించిన వెన్నెల కిశోర్‌ సీక్వెల్ గురించి స్పందిస్తూ..‘నేను కూడా ఇందులో భాగమైతే బాగుండు’ అంటూ ట్వీట్ చేసారు.