మేడ మీద పొలంలో అక్కినేని కోడ‌లు వ్య‌వ‌సాయం
స్టార్లు సెల‌బ్రిటీల‌ను అనుక‌రించేందుకు అభిమానులు ఎప్పుడూ సిద్ధంగా ఉంటారు. స్టార్ హీరోలు, హీరోయిన్లు కొన్ని పనులు చేసినప్పుడు వాటిని నిరభ్యంత‌రంగా అనుస‌రిస్తుంటారు. మహేష్ .. సల్మాన్ ఖాన్ వంటివారు బ్రాండ్లకు చేసే ప్ర‌చారంతో అమ్మకాలు పెరుగుతాయి. అయితే కేవ‌లం బ్రాండ్ ప్ర‌మోష‌న్ ఒక్క‌టేనా? ఇప్పుడు వైవిధ్యంగా ఆలోచిస్తూ స‌మంత‌లా స‌రికొత్త వ్య‌వ‌సాయాన్ని ప్ర‌జ‌ల‌కు ప‌రిచ‌యం చేస్తే అది ఎంతో ఆద‌ర్శంగా ఉంటుందేమో!
లాక్‌డౌన్‌ను బాగా ఉపయోగించుకుంటూ, స్టార్ హీరోయిన్ సమంత గ‌చ్చిబౌలిలోని ఒక గేటెడ్ కమ్యూనిటీ 12 వ అంతస్తులో తన లగ్జరీ నివాసంలో టెర్రస్ గార్డెన్‌ను రూపొందించడంపై దృష్టి పెట్టింది.ఇక్క‌డ తానేం చేస్తోందో ఇన్‌స్టాగ్రామ్ స్టోరీల్లో అంద‌రికీ తెలుస్తున్నాయి. ఆమె టెర్రాస్ పొలం ఎలా ఏర్పాటు చేసింది? అందులో ఏ పంట‌ను పెంచుతోంది? అన్న‌ది జ‌నాల‌కు తెలిసొస్తోంది. మొన్న‌నే పాలకూరను ఫ్రెష్ గా వండుకు తిందిట. ఆ క్ర‌మంలోనే సామ్ తన భావాలను గురించి గొప్పగా చెప్పుకుంటోంది. ఇప్పుడు టెర్రస్ మీద బెల్ పెప్పర్, చెర్రీ టమోటాలు, ఆవపిండి ఆకుకూరలు, బచ్చలికూర, ఇతర కూరగాయలను సేంద్రీయ పద్ధతిలో పెంచడంలో బిజీగా ఉంది. తులసికి ఈ తోట‌లో స్థానం క‌ల్పించింది.
కొంతమంది అభిమానులు సమంత త‌ర‌హాలోనే సేంద్రీయ కూరగాయలను పండించాలనుకున్నా, కాస్త ఖ‌రీదైన వ్య‌వ‌హార‌మే కాబ‌ట్టి ఇప్ప‌టికిప్పుడు ఇది సాధ్యం కాదు. సమంతా కొనుగోలు చేసిన వైట్ స్టాండ్‌లు .. వాటర్ సెటప్‌లన్నీ చాలా ఖరీదైనవి. ఎందుకంటే నీటి సెటప్‌తో ప్రతి టేబుల్ కోసం దాదాపు 15-20 వేలు ఖర్చవుతుంది. అలాంటి 4-5 పొలాలను ఏర్పాటు చేయాల్సి వస్తే, ఎంత పెట్టుబడి పెట్టాలి అన్న‌ది ఊహించ‌డం క‌ష్ట‌మే.
పాలకూర .. బెల్ పెప్పర్స్ వంటివి చాలా మంది దక్షిణ భారతీయులు తమ రోజువారీ ఆహారానికి ఉప‌యోగించేవి కావు. డైట్ ఫ్రీక్స్ అయితే త‌ప్ప ఇలాంటివాటిపై దృష్టి సారించ‌రు. తోట‌కూర గోంగూర‌కు ఇచ్చిన ప్రాధాన్య‌త వేరు. ఇతర ఆకుకూర‌ల‌కు ఇచ్చే ప్రాధాన్య‌త మ‌న‌కు వేరే. ఇక తుల‌సి అనేది ఆరోగ్యానికి ధాతువుగా ఉప‌యోగిస్తుంటారు. అయితే స‌మంతను రోల్ మోడ‌ల్ గా తీసుకుని మ‌నం టెర్రాస్ పై ఏం పండించుకోగ‌లం అన్న‌దే ఇంపార్టెంట్.
