లగడపాటి రాజగోపాల్ పేరు వినగానే అందరికీ గుర్తొచ్చేది ఆయన సమైక్యవాదం పేరుతో చేసిన చిలిపి చేష్టలు. వీర సమైక్యవాదిగా ప్రాచుర్యం పొందేందుకు ఆయన అనేక ప్రయత్నాలు చేసి అభాసుపాలయ్యారు. తెలంగాణ ఉద్యమ కాలంలో జై తెలుగుతల్లి పేరుతో తిక్క తిక్క ప్రకటనలు చేసి తెలంగాణవాదులను రెచ్చగొట్టారు. ఆయన మాటలు శృతి మించడంతో ఓయూ జెఎసి నేత రాజారాం యాదవ్, మరికొందరు ప్రెస్ క్లబ్ వద్ద లగడపాటిపై దాడికి చేసిన పరిస్థితి ఉంది. అంతేకాదు నిమ్స్ లో చికిత్స పేరుతో లగడపాటి పరిగెత్తిన తీరు తెలంగాణవాదులు ఇంకా మరచిపోలేకపోతున్నారు. ఆంధ్రా కసబ్ అని కూడా లగడపాటిని పోల్చారు. ఇక పార్లమెంటులో లగడపాటి పెప్పర్ స్రే సీన్ హైలెట్. తుదకు ఆయన చేసిన చిల్లర పనుల వల్ల పూర్తిగా అభాసుపాలైపోయి రాజకీయ సన్యాసం పుచ్చుకుని ఇప్పుడు రిలాక్స్ అవుతున్నారు.
మరి కేటిఆర్ గురించి కూడా తెలుసుకుందాం. ఉద్యమ నేత కేసిఆర్ కొడుకుగా ఉద్యమ రంగంలోకి దిగారు. సిరిసిల్లలో ఎమ్మెల్యేగా పోటీ చేసి వైఎస్ హవా ఉన్నప్పటికీ స్వల్ప ఓట్లతో గెలిచారు. ఆ తర్వాత మళ్లీ మళ్లీ గెలుస్తూనే ఉన్నారు. ఉద్యమంలో పాల్గొన్నారు. తెలంగాణ స్వరాష్ట్రంలో ఐటి, పరిశ్రమలు, చేనేత మంత్రిగా ఉన్నారు. మంత్రిగా సిరిసిల్లలో దళితులపై దాడులు చేయించినట్లు ఆరోపణలు ఎదుర్కొన్నారు. ఇసుకమాఫియా, డ్రగ్ మాఫియా లో కేటిఆర్ భాగస్వామ్యం ఉందంటూ విపక్షాలు విమర్శలు గుప్పించాయి. ఇక 2018 ఎన్నికల తర్వాత కేటిఆర్ కు రెండు దారులు ఉన్నట్లు చెబుతున్నారు. అందులో ఒకటి టిఆర్ఎస్ ఓడిపోతే కేటిఆర్ లగడపాటి మాదిరిగానే రాజకీయ సన్యాసం తీసుకునే అవకాశం ఉంది. లేదంటే టిఆర్ఎస్ అధికారంలోకి వస్తే 2019 లోక్ సభ ఎన్నికల ముందు కానీ, తర్వాత కానీ ఆయన సిఎం పీఠమెక్కే చాన్స్ కూడా ఉంది. ఈ రెండు దారుల్లో ఆయన ఎటువైపు నడుస్తారన్నది డిసెంబరు 11వ తేదీన తేలనుంది.
ఇదిలా ఉంటే పచ్చి సమైక్యవాదిగా ఉన్న లగడపాటికి, కరుడుగట్టిన తెలంగాణ వాది అయిన కేటిఆర్ కు మధ్య చీకటి స్నేహం ఉందా? ఉద్యమ సమయంలో ఒకరినొకరు ఘోరంగా తిట్టుకున్నారు. టివిల ముందు ఒకరిపై ఒకరు గలీజు భాషలో ధూషించుకున్నారు. ఈ ఇద్దరు ఉత్తర దక్షిణ ధృవాలుగా జనాల మనసులో ముద్ర పడిపోయింది. మరి ఇలంటి వారు స్నేహం చేస్తారా అన్న అనుమానాలు రావొచ్చు. కానీ వీరిద్దరూ గడిచిన నాలుగేళ్లలో మంచి స్నేహమే నడిపారని తెలుస్తోంది. ఒకసారి లగడపాటి ప్రగతి భవన్ కు వచ్చి కేసిఆర్ ను కలిశారు. పూలబొకే ఇచ్చి కేసిఆర్ తో మాట్లాడి వెళ్లిపోయారు. ఆ సమయంలో కేసిఆర్ ఆఫీసు నుంచి ఆ ఫొటోలు మీడియాకు ఇచ్చారు. ఇక లగడపాటి సర్వే సంస్థ నడుపుతారు. ఆయన చాలాసార్లు సర్వేలు చేశారు. లగడపాటి సర్వేలు ప్రజా నాడికి దగ్గరగా ఉంటాయన్న ప్రచారం సాగింది.
ఉద్యమ కాలంలో బద్ధ శత్రువులైనా తదుపరి కాలంలో లడపాటి, కేటిఆర్ స్నేహితులయ్యారు. ఏకంగా కేటిళఆర్ 27 స్థానాల్లో సర్వే చేయాలని కేటిఆర్ సహాయం కోరడం, వెంటనే 35 సీట్లలో లగడపాటి సర్వేలు చేసి కేటిఆర్ కు పంపించడం చకచకా జరిగిపోయాయి. అయితే ఆ సర్వేల్లో టిఆర్ఎస్ కు ప్రజా నాడి వ్యతిరేకంగా ఉన్నట్లు లగడపాటి మాట్లాడారు. దానికి కేటిఆర్ లడగపాటిని ఫలితాల రోజు చూసుకుందామంటూ సవాల్ చేయడం జరిగిపోయాయి. ముందు లగడపాటి సర్వేలో టిఆర్ఎస్ కు అనుకూలంగా ఉందని, తర్వాత కూటమి ఏర్పడిన తర్వాత సీన్ మారిపోయిందని లగడపాటి చెప్పారు. తమకు వ్యతిరేకంగా లగడపాటి సర్వే ఫలితాలు ఉన్నాయని తేలగానే కేటిఆర్, కేసిఆర్, హరీష్ రావు, వినోద్ రావు అంతా లగడపాటి మీద దుమ్మెత్తిపోశారు. లగడపాటి చంద్రబాబు ఏజెంట్ అని, బాబు వత్తిడితోనే లగడపాటి సర్వే రిపోర్టు లు తప్పుగా ఇస్తున్నారని ఎద్దేవా చేశారు. లగడపాటి చిలుక జోస్యం ఎవరూ నమ్మొద్దన్నారు.
కేటిఆర్ కు ఆయనే దొరికిండా ?
నిజంగా సిఎం తనయుడు, కాబోయే సిఎం గా చెప్పబడుతున్న కేటిఆర్ సర్వేలు చేయించుకోవాలంటే లగడపాటే దొరికిండా అన్న ప్రశ్నలు ఉత్పన్నమవుతున్నాయి. తెలంగాణలోకానీ, జాతీయ స్థాయిలో కానీ నమ్మకమైన సర్వే సంస్థలే లేవా అని జనాల్లో చర్చ వస్తున్నది. తెలంగాణకు వ్యతిరేకంగా విషపు చర్యలకు దిగిన లగడపాటే దొరికిండా అని తెలంగాణవాదులు ప్రశ్నిస్తున్నారు. ఒకవైపు కేసిఆర్ తమ సర్వేల్లో వంద సీట్లు 102 సీట్లు 110 సీట్లు అని చెబుతుంటే మరి కేటిఆర్ మాత్రం తెలంగాణ వ్యతిరేకి అయిన లగడపాటి సాయం కోరడమేంటని ప్రశ్నిస్తున్నారు. పైగా లగడపాటి తెలంగాణకు కానీ, కేసిఆర్ ఫ్యామిలీకి కానీ ఎప్పటికైనా వైరిభావంతో ఉన్న మనిషిగానే చూడాలి తప్ప ఆయనను సర్వే చేయించి పెట్టు అని అగడితే ఇప్పుడు లేని వివాదాన్ని రాజేశాడు కదా అని ఒక తెలంగాణవాది ప్రశ్నించారు. ఓడిపోయి అభాసుపాలై రాజకీయ సన్యాసం తీసుకున్న వ్యక్తితో కేటిఆర్ స్నేహం చేసి సిఎం తనయుడిగా ఉన్న స్థాయిని దిగజార్చుకున్నట్లు కాదా అని ఆయన కామెంట్ చేశారు. ఈ వివాదంలో ప్రజా నేతగా ఉన్న కేటిఆర్ కు, సన్యాసం పుచ్చుకున్న లగడపాటికి తేడా లేకుండాపోయిందని ఆయన ఎద్దేవా చేశారు.
ఏది ఏమైనా ఇప్పుడు లగడపాటి సర్వేల పేరుతో రేపిన చిచ్చు నేల మీదున్న లగడపాటికి నష్టం కంటే.. కుర్చీ మీదున్న కేటిఆర్ కే నష్టం అని మాత్రం తెలంగాణవాదులు అభిప్రాయపడుతున్నారు. మరి ఈ వివాదం మరో 48 గంటల్లో ఎన్ని మలుపులు తిరుగుతుందో చూడాలి.