తెలంగాణ రాజకీయాల్లో సరికొత్త సమీకరణాలు వేగంగా మారుతున్నాయి. భారత్ రాష్ట్ర సమితి నుంచి బయటకు వచ్చి కల్వకుంట్ల కవిత తెలంగాణ రక్షణ సేన పేరుతో కొత్త రాజకీయ పార్టీని స్థాపించిన సంగతి తెలిసిందే. అయితే, పార్టీ స్థాపన వరకే హడావుడి కనిపించినా.. క్షేత్రస్థాయిలో పార్టీని నడిపించడం మరియు నిలబెట్టడం విషయంలో కవిత ప్రస్తుతం తీవ్రమైన ఆర్థిక సవాళ్లను, ఇబ్బందులను ఎదుర్కొంటున్నట్లు పొలిటికల్ సర్కిల్స్‌లో ఒక గట్టి టాక్ నడుస్తోంది. ఏ రాజకీయ పార్టీ అయినా సుదీర్ఘ కాలం మనుగడ సాగించాలన్నా, క్యాడర్‌ను యాక్టివ్‌గా ఉంచాలన్నా భారీ ఎత్తున నిధులు, వనరులు అవసరం అవుతాయి. కానీ, ప్రస్తుత పరిస్థితుల్లో కవిత చుట్టూ ఆ స్థాయి వనరులు లేకపోవడం పెద్ద చర్చనీయాంశంగా మారింది.
సాధారణంగా ఎవరైనా సరే ఒక కొత్త ప్రాంతీయ పార్టీ పెడితే, అందులోకి బడా కాంట్రాక్టర్లు, పారిశ్రామికవేత్తలు లేదా ఆర్థికంగా గట్టిగా ఉన్న మాజీ ప్రజాప్రతినిధులు రావడం సహజం. కానీ, కవిత పెట్టిన ‘తెలంగాణ రక్షణ సేన’ లోకి ఇప్పటివరకు ఆర్థికంగా గట్టిగా నిలదొక్కుకోగల లేదా పెద్ద ఎత్తున పార్టీ కోసం ఇన్వెస్ట్ చేయగల బడా లీడర్లు ఎవరూ పెద్దగా చేరలేదు. కొత్త పార్టీ భవిష్యత్తుపై నమ్మకం కుదరకపోవడమో, లేదా ఇతర రాజకీయ కారణాల వల్లనో గానీ.. బలమైన ఆర్థిక వనరులు ఉన్న నేతలెవరూ ఈ పార్టీ వైపు కన్నెత్తి చూడటం లేదు. ఫలితంగా పార్టీ ఆఫీసుల నిర్వహణ నుంచి మొదలుకొని క్షేత్రస్థాయి యాక్టివిటీస్ వరకు ప్రతి ఒక్కటి కవితకు ఒక పెద్ద భారంగా మారాయనే విమర్శలు వ్యక్తమవుతున్నాయి.
కవితకు ఒకప్పుడు అత్యంత అండగా నిలిచింది ఆమె స్థాపించిన ‘తెలంగాణ జాగృతి’ సంస్థ. అయితే బీఆర్ఎస్ అధికారంలో ఉన్న పదేళ్ల కాలంలో ఈ జాగృతి నేతలకు ప్రభుత్వం తరఫున ఎలాంటి రాజకీయ, ఆర్థిక ప్రాధాన్యత దక్కలేదు. ఆ సమయంలో కార్పొరేషన్ పదవులుగానీ, ఇతర కాంట్రాక్టులు గానీ అంతా బయటి నుంచి వచ్చిన వలస నేతలకే దక్కాయి తప్ప.. నమ్ముకున్న జాగృతి లీడర్లకు దక్కలేదనే అసంతృప్తి ఉంది. ఫలితంగా, ఇప్పుడు కవిత కొత్త పార్టీ పెట్టిన తరుణంలో.. ఆమె వెంట నిలిచేందుకు జాగృతి పాత క్యాడర్ ఉన్నప్పటికీ, రాజకీయాల్లో భారీగా పెట్టుబడులు పెట్టే అంత ఆర్థిక స్థోమత, బలం ఆ నాయకులకు లేకుండా పోయింది. నాడు అధికారంలో ఉన్నప్పుడు తన సొంత సైన్యాన్ని ఆర్థికంగా బలోపేతం చేసుకోకపోవడమే.. నేడు కవిత కొత్త పార్టీ పెట్టుబడి ఇబ్బందుల్లో పడటానికి ప్రధాన కారణమని రాజకీయ విశ్లేషకులు స్పష్టం చేస్తున్నారు.