ఫుట్బాల్ సామ్రాజ్యంలో ఒక సువర్ణాధ్యాయం ముగిసింది. అర్జెంటీనాను ప్రపంచ విజేతగా నిలిపిన సాకర్ లెజెండ్ లియోనల్ మెస్సీ అంతర్జాతీయ ఫుట్బాల్కు రిటైర్మెంట్ ప్రకటిస్తూ తన వీడ్కోలు లేఖను రాశాడు. దీనితో ఒక్కసారిగా ఫ్యాన్స్ షాక్ అయ్యారు. వరల్డ్ కప్ ఫైనల్ ఓటమి, అలాగే ఇటీవల తన తండ్రి మరణం వంటి వ్యక్తిగత కారణాల వల్ల అతను ఈ నిర్ణయం తీసుకున్నట్లు తెలుస్తోంది. అయితే ఇంటర్నేషనల్ మ్యాచ్లకు దూరం అయినా, క్లబ్ ఫుట్బాల్లో భాగంగా ‘ఇంటర్ మైయామి’ జట్టు తరఫున మెస్సీ ఆట కొనసాగనుంది.
ఈ సుదీర్ఘ అద్భుత కెరీర్లో మెస్సీ సాధించిన విజయాలు అతనిని ప్రపంచంలోనే అత్యంత సంపన్న అథ్లెట్లలో ఒకరిగా నిలబెట్టాయి. ఫోర్బ్స్ తాజా అంచనాల ప్రకారం, లియోనల్ మెస్సీ నికర ఆస్తి విలువ దాదాపు 1.1 బిలియన్ డాలర్లు అంటే భారత కరెన్సీలో సుమారు రూ. 9,235 కోట్లు. తన కెరీర్ మొత్తంలో ఫుట్బాల్ జీతం, బోనస్లు మరియు కమర్షియల్ ఎండార్స్మెంట్ల ద్వారా మెస్సీ ఏకంగా 1.8 బిలియన్ డాలర్ల అంటే సుమారు రూ. 15,000 కోట్ల ఆదాయాన్ని ఆర్జించాడు.
కేవలం ఆట ద్వారానే ఆయన సాధించిన శాలరీ మరియు బోనస్ ప్యాకేజీలు 700 మిలియన్ డాలర్లు దాటడం విశేషం. మెస్సీ ఆర్థిక సామ్రాజ్యానికి బార్సిలోనా క్లబ్ గట్టి పునాది వేయగా, ఆ తర్వాత పీఎస్జీ లోనూ ఆయన భారీ వేతనాన్ని అందుకున్నాడు. అయితే ప్రస్తుతం ఆడుతున్న ‘ఇంటర్ మైయామి’ క్లబ్తో కుదుర్చుకున్న ఒప్పందం చాలా వినూత్నమైనది. దీని ప్రకారం ఏడాదికి దాదాపు 70 నుండి 80 మిలియన్ డాలర్ల ప్యాకేజీతో పాటు, రిటైర్మెంట్ తర్వాత ఇంటర్ మైయామి క్లబ్లో ఈక్విటీ వాటాను పొందే అరుదైన హక్కును మెస్సీ దక్కించుకున్నారు.
ఆటతో సమానంగా మెస్సీ బ్రాండ్ వాల్యూ ద్వారా భారీగా సంపాదిస్తున్నాడు. కేవలం ఎండార్స్మెంట్ల ద్వారానే కెరీర్లో 600 మిలియన్ డాలర్లకు పైగా ఆర్జించాడు. క్రీడా దిగ్గజం ‘అడిడాస్’ సంస్థతో ఉన్న లైఫ్టైమ్ ఒప్పందం ద్వారా మెస్సీకి ప్రతి సంవత్సరం 25 మిలియన్ డాలర్లు అంటే సుమారు రూ. 210 కోట్లు అందుతాయి. దీంతో పాటు పెప్సి, గేటోరేడ్, మాస్టర్ కార్డ్, బడ్వైజర్ వంటి గ్లోబల్ బ్రాండ్స్కు ఆయన బ్రాండ్ అంబాసిడర్గా ఉన్నాడు. సోషల్ మీడియాలో భారీ ఫాలోయింగ్ ఉన్న మెస్సీ, ఇన్స్టాగ్రామ్లో పెట్టే ఒక్కో స్పాన్సర్డ్ పోస్ట్కు దాదాపు 2.7 మిలియన్ డాలర్లు.. మన కరెన్సీలో సుమారు రూ. 22.6 కోట్లు వసూలు చేస్తాడు.
మెస్సీకి ప్రపంచవ్యాప్తంగా 200 మిలియన్ డాలర్ల అంటే రూ. 1,600 కోట్లకు పైగా విలువైన రియల్ ఎస్టేట్ పోర్ట్ఫోలియో ఉంది. బార్సిలోనా, మైయామి, రొసారియో నగరాల్లో అత్యంత లగ్జరీ ఇళ్లతో పాటు, ‘MiM Hotels’ బ్రాండ్ పేరుతో ఐరోపా వ్యాప్తంగా విలాసవంతమైన హోటళ్లలో పెట్టుబడులు పెట్టాడు. కుటుంబ ప్రయాణాల కోసం ఒక ప్రత్యేక ప్రైవేట్ జెట్ విమానం కూడా ఉంది. మెస్సీ గ్యారేజీలో మెర్సిడెస్ బెంజ్, మసెరటి, రేంజ్ రోవర్, ఆడి వంటి ఎన్నో లగ్జరీ కార్లు ఉన్నప్పటికీ, ఆయన చాలా కాలం పాటు సాధారణ ‘టొయోటా ప్రియస్’ కారును ఉపయోగించడం అందరినీ ఆశ్చర్యపరిచే విషయం. వరల్డ్ కప్ విజయం తర్వాత మరింత పెరిగిన మెస్సీ బ్రాండ్ ఇమేజ్, అంతర్జాతీయ రిటైర్మెంట్ తర్వాత మరిన్ని కొత్త వ్యాపార ప్రకటనలకు దారితీసే అవకాశం ఉంది.