ప్రత్యక్ష రాజకీయాలతో సంబంధం లేకుండానే మంత్రి అయిపోయారు ‘నారాయణ’ విద్యా సంస్థల అధినేత నారాయణ. చంద్రబాబు హయాంలో నారాయణకు దక్కిన ప్రాధాన్యత అంతా ఇంతా కాదు. సీనియర్ టీడీపీ నాయకులు సైతం ముక్కున వేలేసుకోవాల్సి వచ్చింది, నారాయణకు చంద్రబాబు ఇచ్చిన అధిక ప్రాధాన్యత నేపథ్యంలో.
సరే, టీడీపీ అధినేత చంద్రబాబు.. అప్పట్లో ఆంధ్రప్రదేశ్ ముఖ్యమంత్రి గనుక, తన మంత్రి వర్గంలోకి ఎవర్ని తీసుకోవాలన్న విచక్షణాధికారం ఆయనకు వుంటుంది.. అది వేరే సంగతి.
రాజధాని అమరావతి నిర్మాణ బాధ్యతలు పూర్తిగా నారాయణ భుజం మీద పెట్టారు చంద్రబాబు. అమరావతి అనుకున్న విధంగా నిర్మితమయ్యిందా.? అంటే, లేదాయె. ఇప్పుడేమో ఆ అమరావతి అయోమయంలో పడింది. అమరావతిలో భూ కుంభకోణం జరిగిందని వైసీపీ ప్రభుత్వం ఆరోపిస్తోంది.
మరి, గతంలో అమరావతి బాధ్యతల్ని భుజానికెత్తుకున్న నారాయణ, ఈ వ్యవహారాలపై స్పందించాలి కదా.? ఎప్పుడైతే, టీడీపీ అధికారం కోల్పోయిందో.. ఆ తర్వాత నారాయణ అడ్రస్ గల్లంతయ్యింది పొలిటికల్ తెరపై. ప్రస్తుతం నారాయణ చుట్టూనే ఆరోపణలు వినిపిస్తున్నాయి. అయినా, నారాయణ ఆనాటి వ్యవహారాలపై పెదవి విప్పడంలేదు.
మంత్రిగా, ప్రజా ధనం నుంచి వేతనం అందుకున్నారు నారాయణ. అంతేనా, మంత్రిగా ఆయన ప్రోటోకాల్ ప్రకారం చాలా సౌకర్యాలు పొందారు. అదంతా, రాష్ట్ర ప్రభుత్వ ఖజానా నుంచి ఆయనకు అందినదే.
మరి, రాష్ట్రంలో అమరావతి చుట్టూ ఇంత రచ్చ జరుగుతున్నప్పుడు బాధ్యత లేకుండా ఎలా నారాయణ వ్యవహరించగలుగుతున్నారు.? ఇలాంటి సందర్భాల్లోనే అనిపిస్తుంటుంది..బాధ్యత లేనివారికి నామినేటెడ్ కోటాలోనో.. ఇంకో కోటాలోనో పదవులు అప్పగించడం ఎంతటి ప్రజా వ్యతిరేక చర్య అనేది.