భక్తుల విశ్వాసంలో సోమవారం ప్రత్యేకమైన స్థానం కలిగిన రోజు. ఈ రోజు భోళా శంకరుడిని నిష్ఠగా ఆరాధిస్తే కోరుకున్న వరాలు తప్పక సిద్ధిస్తాయని పౌరాణిక విశ్వాసం. ప్రతి సోమవారం శివాలయాల వద్ద కనిపించే భక్తుల సందడి ఆ నమ్మకానికి నిదర్శనమే. జీవితంలో కష్టాలు తొలగాలన్నా, ఆర్థికంగా నిలదొక్కుకోవాలన్నా, మానసిక ప్రశాంతత కావాలన్నా శివుడి ఆశీస్సులే మార్గమని భక్తులు నమ్ముతారు.
సోమవారం రోజున భక్తులు ఉదయం నుంచే ఉపవాసం పాటిస్తూ శివారాధనకు సిద్ధమవుతారు. పూర్తిగా ఆహారం మానలేని వారు పండ్లు, పాలు వంటి సాత్విక ఆహారం మాత్రమే తీసుకోవాలని పండితులు తెలియజేస్తాయి. ఈ ఉపవాసం శరీరంతోపాటు మనసును కూడా నియంత్రించి ఆధ్యాత్మిక శక్తిని పెంచుతుందని భక్తుల అనుభవం చెబుతోంది.
ఈ రోజున శివలింగానికి చేసే అభిషేకానికి ప్రత్యేక ప్రాధాన్యత ఉంది. పాలు, పెరుగు, తేనె, గంగాజలం, చక్కెరతో అభిషేకం చేయడం వల్ల శివుడు త్వరగా ప్రసన్నుడవుతాడని నమ్మకం. ముఖ్యంగా బిల్వపత్రాల సమర్పణ శివారాధనలో అత్యంత శ్రేష్ఠమైన పద్ధతిగా భావిస్తారు. ఒక బిల్వపత్రం సమర్పించినా వెయ్యి పూజల ఫలితం దక్కుతుందన్న నమ్మకం ఉంది.
మంత్రజపానికి సోమవారం చాలా శుభదినమని పండితులు చెబుతున్నారు. “ఓం నమః శివాయ” లేదా మహామృత్యుంజయ మంత్రాన్ని 108 సార్లు భక్తితో జపిస్తే దురదృష్టం తొలగి, ఆరోగ్యము, ఆయుష్షు పెరుగుతుందని విశ్వాసం. సాయంత్రం సమయంలో ఇంట్లో లేదా శివాలయంలో ఆవునెయ్యితో దీపం వెలిగించడం వల్ల ఇంట్లో సానుకూల శక్తి పెరుగుతుందని చెబుతారు.
ఇక దానధర్మాలకు కూడా ఈ రోజు ఎంతో విశేషం. పేదలకు తెల్లటి వస్తువులు దానం చేయడం ద్వారా చంద్రదోషం తగ్గి శివుడి అనుగ్రహం మరింత బలంగా లభిస్తుందని ఆచార్యుల మాట. ఈ విధంగా ప్రతి సోమవారం శివుడిని నిష్ఠగా ఆరాధిస్తే జీవితంలో కష్టాలు క్రమంగా తగ్గి, అదృష్ట ద్వారం తానే తెరుచుకుంటుందని భక్తుల గాఢ విశ్వాసం.